2
Nikurqanitaqmi:
“Kunanqa kusikuymanyá qokusaq allin kawsayta tarinaypaq” nispa.
Ichaqa chaypas chinkaruq waspiy hinallam.
2 Asikuymantam nirqani chayqa mana yuyayniyoq runapa ruranan kasqanta.
Kusikuymantañataqmi nirqani chayqa mana imapas apamuq kasqanta.
3 Yachayniyman hina yuyaywan ruraspaymi cuerpoyman gustota qonaypaq upyaykunaman qokurqani.
Kay pachapi runakuna pisi tiempollapaq kawsaspa loco hina rurasqankutam ñoqapas rurarqani cheqapchus chay rurasqankuwan allin kawsasqankumanta cuentata qokunaypaq.
4 Hatun trabajokunatam rurarqani.
Kikiypaqmi palaciokunata rurachirqani.
Chakraykunapim uvasta plantachirqani.
5 Huertakunatawan parquekunatam
rurachirqani.
Tukuy rikchaq ruruyoq sachakunatam
plantarqani.
6 Plantachisqay sachakunata parqochinaypaqmi
estanquekunata rurachirqani.
7 Rantirqanim sirvientekunatawan sirvientakunatapas.
Kapuwarqataqmi palacioypi naceq criadoykunapas.
Achkallañataqmi vacaykunawan
ovejaykunapas kapuwarqa.
Jerusalen llaqtapi ñoqamanta ñawpaq
gobiernaqkunamantapas aswan achkaraqmi kapuwarqa.
8 Ñoqaqa huñukururqanitaqmi qori-qollqetapas.
Chaykunataqa munapayanmi reykunapas.
Chaykunataqa munapayanmi nacionkunapas.
Kapuwarqam takiqkuna qarikunapas-warmikunapas.
Gozakunaypaqmi kapuwarqataq huk warmikunapas.
9 Jerusalenpi ñawpaq gobiernaqkunamantapas
aswan reqsisqam rikurirurqani.
Chaywanpas yachayniytam
hinalla waqaycharqani.
10 Gozakurqanim qawaspay munarusqaykunapi.
Gozakurqanim sonqoypa munarusqankunapi.
Ñakariywan tukuy rurasqaypim gozakurqani.
Tukuy chaypa pagontam
gozakuyta chaskirqani.
11 Chaymantam piensarqani llapa rurasqaymanta.
Piensarirqanim ñakariywan rurasqaymanta.
Hinaptinmi chaykunaqa karqa chinkaruq waspiy hinalla.
Hinaptinmi chaykunaqa karqa wayrata hapirunapaq qatikachay hinalla.
Kay pachapiqa tukuy imam mana valeqlla.
12 Ñoqaqa piensarirqanitaqmi yachaymantapas
chaynataq mana yuyayniyoq kaymantapas
chaynataq sonso kaywan ruraymantapas.
Qepay hamuq reyqa ¿imataraqtaq ruranman?
Payqa imapas rurasqa kaqllatañam ruranman.
13 Cuentatam qokuruni:
Imaynam achkiypas tutayaymanta aswan valorniyoq,
chaynam yachayniyoq kaypas
mana yuyayniyoq kaymantaqa aswan valorniyoq.
14 Yachayniyoq runaqa allinta qawaspam purin.
Sonso runam ichaqa tutayaypi hina purin.
Ichaqa hina kaqllam pasan yachayniyoq runatapas.
Hina kaqllataqmi pasan sonso runatapas.
15 Chaymi nikurqani:
“Sonso runata imapas pasarusqanqa,
ñoqatapas hina kaqllam pasaruwanqa.
Chaynaqa manam serviwanchu yachayniyoq kayniyqa” nispa.
Nikurqanitaqmi:
“Chaypas chinkaruq waspiy hinallam” nispa.
16 Yachayniyoqmantaqa manam haykapipas yuyarinqakuchu.
Manataqmi sonso runamantapas yuyarinqakuchu.
Tiempopa risqanman hinam llapallanku qonqasqaña kanqaku.
Yachayniyoqpas hinaspa sonsopas iguallam wañunqaku.
17 Chayraykum kay pachapi lliw ruraykunatapas amiruspay vidaytapas cheqnipakururqani.
¡Tukuy imapas chinkaruq waspiy hinallam chaynataq wayrata hapirunapaq qatikachay hinallam!
18 Cheqnipakurqanitaqmi kay pachapi ñakariywan tukuy ima rurasqaykunatapas.
Chaykunataqariki saqesaq qepay hamuq runamanmi.
19 Ichaqa ¿pimá yachan,
ichapas chay qepay hamuq munaychakuqqa kanman yachayniyoqpas otaq sonsopas?
paychiki kay pachapi ñakarispa yachaywan tukuy ima llamkasqaykunapi munaychakunqa.
¡Chaypas chinkaruq waspiy hinallam!
20 Chaymi ñakariywan kay pachapi llapa llamkasqaymanta yuyariptiy sonqoy tukukurqa.
21 Kanmi yuyaywan,
yachaywan chaynataq experienciawan llamkaq runa,
ichaqa mana llamkaq runamanmi tukuy imankunata saqeykun.
¡Chaypas chinkaruq waspiy hinallam chaynataq hatun mana allinllam!
22 Runaqa ¿imatataq horqokun afanakuspa ñakariywan kay pachapi llamkasqanmanta?
23 Tukuy vidanmi nanaylla chaynataqmi ñakarisqanmantapas llakillataq.
Tutapas pensamientowanmi mana puñunchu.
¡Chaypas chinkaruq waspiy hinallam!
24 Runapaq allinqa kanman mikukuyllam,
tomakuyllam chaynataq llamkasqanmanta kusikuyllam.
Tukuy chaykunaqa Diosmanta kasqantam yacharuni.
25 Mana chayna kaptinqa ¿pitaqsi mikunman hinaspa gozakunman?
26 Agradaqnin runamanqa Diosmi qon yuyayta,
yachayta chaynataq kusikuyta.
Huchallikuq runamanmi ichaqa qon llamkayta chaynapi huñuruspa hinaspa montokuruspa Diospa agradonpaq kaq runaman qonanpaq.
¡Chaypas chinkaruq waspiy hinallam chaynataq wayrata hapirunapaq qatikachay hinallam!