Ñakarispa qaparisqanmantawan alabaspa takisqanmanta
Takiqkunapa maestronpaq, “Achikyaq taruka” sutiyoq tonoman hina Davidpa Diosman takisqan
22
Diosnilláy,
Diosnilláy,
¿ñoqallaytaqa
imanasqamariki saqerullawanki?
¿Imanasqataq karuncharuspaykiqa
manaqa salvaykullawankichu?
¿Imanasqataq qayakullasqaytaqa
manaqa uyariykuwankichu?
2 Diosnilláy,
punchawpim qayakullayki
ichaqa manam contestawankichu.
Diosnilláy,
tutanpim qayakullayki
chaywanpas manam upallaykunichu.
3 Qamllamriki sapachallan
chuyay-chuyay reyqa gobiernanki.
Israelpa castallankunaqa
qamtam alaballasunki.
4 Ñoqaykupa abueloykum
qanman hapipakuykusurqanki.
Paykunatam librarqanki
qampi confiakullasqankurayku.
5 Qamta qayakullasqanraykum
libraykusqa kallarqaku.
Qampi confiakullasqankuraykum
penqaypichu kallarqaku.
6 Ñoqallayqa kani
utuskuru hina mana valeq runam.
Ñoqallayqa kani
runakunapapas kamillasqan runam.
Ñoqallayqa kani
runakunapapas despreciasqan runam.
7 Llapachallan qawaqnillaykunam
ñoqamanta burlakunku.
Yachapayawaspam umankutawanpas
aywikachaykunku.
8 Paykunaqa ñoqamantam kaynataraq ninku:
“Payqariki Tayta Diosllapimya confiakurqa.
Tayta Diosyá librachun payta kuyaspanqa.
Paypuniyá salvachun payta kuyaspanqa.”
9 Qanmi ñoqataqa horqoykuwarqanki
mamallaypa wiksan ukupiraq kasqaymanta.
Qanmi confiakuyta yachachiwarqanki
kuyay mamallaypa marqayninpi kasqaymanta.
10 Ñoqallayqa manaraqpas naceptiymi
qamqa ñoqamanta cuentallikuykullarqanki.
Mamallaypa wiksanmantapuniraqmi
qamqariki ñoqallaypa Diosniy kapuwanki.
11 Ama ñoqamanta karunchakullaychu.
Llakikuymi haypaykamuwachkan ñoqallayta.
Manamriki yanapaykuqniyqa kapuwanchu.
12 Llapa torokuna
muyuwachkaq hinam
enemigollaykunapas muyuparuwanku.
Basan lawpi
kallpasapa toro hinam
paykunaqa ñoqallayta chawpicharuwanku.
13 Leonpas hinaraqmi hakaykachawanku.
Qaparispam ñoqallayta llikiparuwanku.
14 Yaku talliykusqa hinam kallachkani.
Tullullaykunapas moqapasqam kallachkani.
Sonqollaymi cera hina chullurichkan.
Ukullaypim tukuy sonqollaypas chullurichkan.
15 Kallpallaymi teja hina pasaypaq chakirirun.
Qallullaypas paladarniymanmi laqakurun.
Qamqa ñoqallaytam churaykullawanki
wañuqkunapapas kasqan qotqo allpakama.
16 Allqokuna hinam muyuriruwanku.
Mana allin runakunam chawpicharuwanku.
Ñoqallaypa makillaytam uchkurunku.
Ñoqallaypa chakillaykunatam uchkurunku.
17 Lliw tulluymi yupariykunaña kachkan.
Enemigoykunam qawapayaykullawachkan.
18 Pachallaykunatam rakinakurqaku.
Pachallaypaqmiki suertetaraq choqarqaku.
19 Dios Taytalláy,
Amapuniyá ñoqamantaqa
karunchakuruychu.
Kallpanchaqnilláy yanapaykuway,
ama qepamuychu.
20 Libraykuwayá espadawanraq wañurunaymanta.
Libraykuwayá allqokunaraq sipiwananmanta.
21 Salvaykuwayá leonkunapa simillanmantapas.
Libraykuwayá torokunapa waqrayninmantapas.
22 Qamllamantam wawqeykunaman
ñoqallayqariki willakullasaqpas.
Qamllatañam alaballasaq
ñoqallayqariki huñunakuypipas.
23 Tayta Diosta respetaqkuna,
payta llapachallaykichik alabaychik.
Jacobpapas mirayninkuna,
Diosta llapachallaykichik yupaychaychik.
Israelpapas mirayninkuna,
Diosta llapachallaykichik respetaychik.
24 Diosqa manam despreciarqachu
ñakariqkunapa ñakarisqantaqa.
Diosqa manam millakurqachu
ñakariqkunapa ñakarisqantaqa.
Diosqariki manapunimya
pakakuykurqachu paykunamantaqa.
Payqariki uyariykurqam
qayakuqkunapa qayakusqantaqa.
25 Qamllaraykum alaballasaq
hatun huñunakuypapas kallasqanpi.
Qollasqaykim prometesqayta
respetaqnikikunapa ñawpaqninpi.
26 Mikuykuspam saksaykunqaku
yarqarachikullaq humildekunapas.
Tayta Diostam alabanqaku
llapachallan cheqap maskaqninkunapas.
Chayna payta maskaqkunaqa
wiñaypaqñamiki kawsakunqakupas.
27 Tukuy hinastinpi kaqkunaqa
Tayta Diosmantam yuyarinqaku.
Tukuy hinastinpi kaqkunaqa
Tayta Diosmanmi kutimunqaku.
Llapallan nacionpipas ayllukunaqa
qamtataqmiki adoranqaku.
28 Tayta Diosmi lliwta gobiernaqqa.
Paymi lliw nacion munaychakuqqa.
29 Kay pachapi llapallan apu runakunam
mikuspanku paytaqa adoraykunqaku.
Ñutu allpaman llapallan kutiykullaqkunam
paypa ñawpaqnillanpiraq qonqorakunqaku.
Vidankupas mana takyachiy atiqkunam
paypa ñawpaqnillanpi qonqorakunqaku.
30 Qepa wiñaymi paytaqa serviykullanqaku.
Qepa hamuqmanmi Señormanta willanqaku.
31 Manaraqpas naceqmanraqmi willanqaku
alli-allin arreglokuna rurasqanmanta.
Hinaspataqmi paykuna willakullanqaku
Tayta Diospa chaykunata rurallasqanmanta.