—Reina Ester ¿imataq qampa mañakuynikiqa?

ñoqaqa imapas mañakuwasqaykitam qosqayki,

gobiernasqaypa partentapas qoykusqaykim —nispa.

3 Chaymi reina Esterñataq nirqa:

—Reynilláy,

qampa favorecesqan kaptiyqa chaynataq qampa agradoykipaq kaptiyqa mañakusqaytayá uyariykullaway.

Qamqa vidaytayá qoykullaway,

chaynataqyá salvaykuytaq castaykunapa vidantapas.

4 Ñoqaqa castaykunapiwan kuskam rantikusqaña kachkaniku,

ñoqaykuqa ñakarichisqa,

wañuchisqa,

chinkachisqa kanaykupaqñam citasqa kachkaniku.

Sirvientekuna kanaykupaq rantikusqa kaspachiki ñoqaqa upallakuykuyman,

chayna kaptinqa manach qampa umayki nanachiq hamuymanchu karqa —nispa.

5 Hinaptinmi Rey Asueroñataq reina Esterta tapurqa:

—¿Pitaq chayqa?

¿Maypitaq kachkan chayna ruray munaq runaqa?

—nispa.

6 Hinaptinmi Esterñataq nirqa:

—Chay enemigoyku runaqa hinaspa contraykupi sayariq mana allin ruraq runaqa kay Amanmi —nispa.

Chaymi Amanqa mancharikururqa reypa hinaspa reinapa qayllanpi.

7 Chaymi reyqa piñakuruspan hatarirurqa convidomanta hinaspam pasakurqa palacionpa huertanman.

Amanñataqmi qeparqa vidanmanta reina Esterta ruegakunanpaq,

Amanqa cuentatam qokururqa payta wañurachinanpaq reyqa churakuykusqanta.

8 Huertamanta convido salaman rey kutiramuptinmi waqtapaspa tiyanan kamapi Ester kachkaptin Amanpas wischukuykuspantaq chay kamapa waqtanpi kachkasqa,

hinaptinmi rey nirqa:

—¿Hina palaciopichu reinatapas abusaytaraq munarqanki?

—nispa.

Rey chaynata niruptinmi Amanpa uyanta taparurqaku.

9 Chaymi reypa serviqnin Harbona sutiyoq runa nirqa:

—Amanpa wasinpim kachkan iskay chunka iskayniyoq metro altoyoq warkuna,

chaytaqa kikin Amanmi rurachirqa reypa favorninpi rimariq Mardoqueopaq —nispa.

Chaymi rey kamachirqa:

—Chaynaqa Amantayá chaypi warkumuychik —nispa.

10 Chaymi Amantaqa warkururqaku Mardoqueopaq rurachisqan warkunapi,

chayñam reypa piñakuynin pasarurqa.