Nehemias corregispan imakunapas rurasqanmanta
13
Chay tiempopim llapa runakunapaq leerqaku Moisespa qellqasqanta,
chaypim tarirurqaku Amon casta runakunawan Moab casta runakunaqa Diospa runankunawanqa wiñaypaq mana hukllawanakunankumanta.
2 Chaynaqa karqa Israel runakuna hamuchkaptin mikuywan,
yakuwan mana chaskisqankuraykum,
paykunaqariki Balaam sutiyoq runamanmi pagarurqaku Israel runakunata ñakaykunanpaq,
ichaqa Diosniykum chay ñakanantaqa tikrarurqa bendicionmanña.
3 Chaynaqa chay leesqanku yachachikuypa imam nisqanta uyariykuspankum Israel runakunamanta rakirqaku llapallan forastero runakunata.
4 Ñawpaqmantaraqmi sacerdote Eliasib karqa Diosniykupa templonpi almacen cuartokunamanta nanachikuq.
Payqa Tobiaspa familianña rikurirusqanraykum
5 paypaq alistapurqa huk hatun cuartota,
chay alistapusqan cuartoqa pasaq tiempokunapiqa karqa kawsaymanta ofrendakunapas,
inciensopas,
templopa servicionkunapas,
trigomanta,
vinomanta,
aceitemanta diezmokunapas waqaychananku cuartom,
chay almacenpi tukuy imapas kaqkunaqa karqa Leviy casta runakunapaqwan takiqkunapaqmi hinaspa punkukunawan cuentallikuqkunapaqmi,
chaypitaqmi churaqku sacerdotekunapaq ofrendakunatapas.
6 Tukuy chaykuna pasakuptinqa ñoqa Nehemiasqa manam Jerusalen llaqtapichu tarikurqani,
ñoqaqa Babilonia lawpi Rey Artajerjes kimsa chunka iskayniyoq watanmanña gobiernachkaptinmi paypa kasqanman kutikurqani.
Ichaqa punchawkuna pasaruptinmi reymanta permisota mañakuspay
7 Jerusalen llaqtaman kutimurqani,
chayñam musyarurqani Eliasib sutiyoq runapa imam mana allin rurarusqantaqa.
Payqariki Tobiaspaqmi huk cuartota alistarapusqa Diospa templonpa pationpi.
8 Chay rurasqanmantam ñoqaqa sinchillataña piñakururqani hinaspam chay cuartomantaqa wischururqani Tobiaspa familianpa tukuy ima kapuqninkunata.
9 Hinaspam kamachirqani chay cuartotaqa chuyanchanankupaq,
kamachirqanitaqmi Diospa templonpi serviciokunatapas,
kawsay ofrendakunatapas hinaspa inciensotapas maymi kananman kutiykachinankupaq.
10 Yacharurqanitaqmi Leviy casta runakunaman tupaqninta manaña qosqankutapas,
Leviy casta runakunawan Diospa templonpi servicio ruraq takiqkunaqa ripukusqaku maymi chakrankumanñam.
11 Chaymi autoridadkunata nirqani:
—¿Imanasqataq Diospa templonqa kayna saqesqa kachkan?
—nispa.
Chaymi sacerdotekunatawan Leviy casta runakunata huñuruspay maypim ruranankuman churarqani.
12 Chaynapim Juda lawpi llapallan yachaqkuna chay almacen cuartoman apamurqaku trigo diezmonkuta chaynataq vinomantawan aceitemanta diezmonkutapas.
13 Chay almacen cuartokunapi nanachikunanpaqñataqmi churarqani sacerdote Selemiastawan Diospa yachachikuynin yachachiq Sadocta,
churarqanitaqmi Leviy castamanta kaq Pedaias sutiyoq runatapas.
Paykunapa yanapaqnin kananpaqñataqmi churarqani Hananta,
paypa taytanmi karqa Zacur,
Zacurpa taytanñataqmi karqa Matanias.
Chay churasqay runakunaqa allin confianza runakunam karqa.
Chaynaqa paykunamá castamasinkunamanqa imapas tupaqninta aypunanku karqa.
14 Diosnilláy,
amayá qonqaruychu kay imam rurasqaytaqa,
amayá qonqaruychu qam Diosnillaypa hinaspa temploykipa favorninpi tukuy allinkuna rurasqaytaqa.
15 Chay tiempopim Juda lawpi rikurqani samana punchaw kachkaptinpas wakin runakunaqa vinota horqonankupaq uvas sarusqankuta,
rikurqanitaqmi wakin runaqa rutusqa trigotapas apamuspa asnoman churkuchkaqta,
chay asnomanqa churkurqakutaqmi vinotawan uvas frutakunatapas chaynataq higos frutatawan tukuy imakunatapas.
Paykunaqa hina chay samana punchawpitaqmi Jerusalen llaqtamanpas tukuy chaykunata aparqaku.
Paykunatam qaqchaparqani chay punchawpi mikuykunata rantikusqankurayku.
16 Jerusalen llaqtapi yachaq Tiro llaqtayoq wakin runakunapas apamurqakum challwakunatawan tukuy imakunata hinaspam samana punchaw kachkaptinpas Jerusalen llaqtapi Juda casta runakunaman rantikurqaku.
17 Chayraykum ñoqaqa Juda lawpi kamachikuq runakunata qaqcharqani kaynata:
—Mana allintam rurachkankichik samana punchawpi mana samaspaqa.
18 Chaynatamá abuelonchikkunapas rurarqaku,
chayraykum kikin Diosninchik kay mana allinkunata ñoqanchikman aparamuwanchik,
aparamuntaqmi kay llaqtapa hawanmanpas.
¿Samana punchawpi mana samaspaqa astawanraqchum munachkankichik Diosninchik piñarachiyta?
—nispa.
19 Jerusalen llaqtapa punkunkunaman llantuy chayaramuptinmi manaraqpas samana punchaw qallaykuchkaptin kamachirqani Jerusalen llaqtapa punkunkunata wichqanankupaq,
kamachirqanitaqmi chay punchaw pasaruptinqa kichanankupaqpas.
Chay punkukunapiqa churarqanitaqmi wakin serviwaqniy runakunatapas chaynapi samana punchawpiqa ima cargapas ama yaykumunanpaq.
20 Chaynapim negociantekunapas hinaspa tukuy ima rantikuqkunapas Jerusalen llaqtamantaqa hawapi achka kutita achikyarqaku.
21 Paykunata qaqchaspaymi kaynata nirqani:
—¿Imanasqataq qamkunaqa murallapa qepanpi samachkankichik?
Sichum huktawan chaynata ruraptikichikqa presocharusqaykichikmi —nispa.
Chaymantapunim paykunaqa manaña kutimurqakuchu samana punchawpiqa.
22 Leviy casta runakunatapas kamachirqanitaqmi chuyanchakuspanku punkukunaman cuidaq rinankupaq chaynapi samana punchawtaqa Diosllapaqña sapaqchanankupaq.
Diosnilláy,
amayá qonqaruychu kay rurasqaytapas,
qamqa kuyapayakuynikiman hinayá llakipayariykullaway.
23 Chay tiempopiqa rikurqanitaqmi imaynam Juda castamanta wakin runakuna Asdod llaqtayoq warmikunawan casarakurusqankutapas,
rikurqanitaqmi Amon casta warmikunawan hinaspa Moab casta warmikunawan casarakurusqankutapas.
24 Chaynapim paykunapa wawa-churinpa partenqa rimarqa Asdod runakunapa rimaynintawan huklaw nacionniyoq runakunapa rimaynintaña ichaqa manam rimarqakuchu Juda casta runakunapa rimaynintaqa.
25 Paykunawan atipanakuspaymi ñakaykurqani,
wakintaqa maqaruspaymi chukchantapas chutaparurqani hinaspam Diosrayku jurachispay kaynata nirqani:
—Amam warmi churikichikkunataqa casarachinkichikchu paykunapa qari churinkunawanqa nitaqmi qari churikichiktapas casarachinkichikchu paykunapa warmi churinwanqa,
kikikichikpunipas amamá chaynataqa rurankichikchu.
26 Israel nacionpa reynin Salomonpas chaynatamiki huchallikururqa huklaw nacionkunapa reyninqa pay hina mana kachkaptinpas.
Paymi Diosninpa kuyasqan kasqanrayku Israel nacionpa reyninpaq churasqa karqa.
Chaywanpas paytaqa huklaw nacionniyoq warmikunam huchallirachirqa.
27 Chaynaqa ¿manachum ñoqaykuqa uyarichkaniku Diosninchikpa contranpi kaynaña mana allin rurasqaykichikta?
Qamkunaqariki Diosninchiktam traicionarunkichik huklaw nacionniyoq warmikunawan casarakuruspaykichik —nispa.
28 Joiada sutiyoq runapa huknin churintam ñawpaqniymanta qarqorurqani,
Joiadaqa karqa sacerdotekunapa jefen Eliasibpa churinmi.
Chay churintaqariki qarqorurqani Horon llaqtayoq Sanbalatpa masan kasqanraykum.
29 Diosnilláy,
qamqa amayá qonqaruychu paykunataqa.
Paykunaqariki sacerdote kayninkutam millakuypaqtaña rurarunku,
sacerdotekunawan hinaspa Leviy castakunawan contrato rurasqaykitapas hina chayna millakuypaqtam rurarunku.
30 Chaynaqa kikiypunimá sacerdotekunatawan Leviy casta runakunata imapas huklaw nacionniyoq kaqkunamanta chuyancharqani hinaspam sapakamata maypim ruranankuman churarqani.
31 Kamachirqanitaqmi tiempollanpi yantatapas hinaspa punta kaq rurukunatapas apamunankupaq.
Diosnilláy,
qamqa favorecewanaykipaqyá yuyariykullaway.