SAMUELWAN SUTICHASQA
ISKAY KAQ LIBRO
Saulpa wañukusqanta David yacharusqanmanta
1
Saulpa wañukusqanpa qepantam Amalec casta runakuna vencerusqanmanta David kutimuspa iskay punchawña Siclag llaqtapi kachkarqa.
2 Kimsa kaq punchawmantam Saulpa campamentonmanta huk runa hamurqa llumpay llakisqa,
pachankunapas llikisqa hinaspa allpallaña umayoq.
Davidpa kasqanman chayaramuspanmi qayllanpi qonqoranpa pampaman kumuykurqa.
3 Chaymi David tapurqa:
—¿Maymantataq hamuchkanki?
—nispa
Chaymi payñataq nirqa:
—Israel tropapa campamentonmantam lluptiramuni —nispa.
4 Hinaptinmi David tapurqa:
—¿Imataq pasakun?
¡Ama hina kaspayá willaykullaway!
—nispa.
Hinaptinmi chay runañataq nirqa:
—Peleasqankumanta soldadokuna lluptiruspam achkallaña wañurunku.
Saulwan churin Jonatanpas wañurunmi —nispa.
5 Chay willaqnin mozotam David nirqa:
—¿Imaynanpitaq yachanki Saulpas chaynataq Jonatanpas wañurusqanta?
—nispa.
6 Chaymi payñataq nirqa:
—Gilboa Moqopi kachkaspaymi qonqaymanta Saulta rikururqani lanzanpi tawnapakusqata,
rikurqanitaqmi carretakunawan caballopi sillasqakunapas payta haypaykuchkaqtaña.
7 Qepanta qawarimuspanmi rikuramuwaspa qayamuwarqa.
Chaymi ñoqañataq nirqani:
“¿Imanantaq?”
nispa.
8 Chaymi niwarqa:
“Qamqa ¿pitaq kanki?”
nispa.
Hinaptinmi ñoqañataq nirqani:
“Ñoqaqa kani Amelec casta runam” nispa.
9 Paymi niwarqa:
“Ama hina kaspaykiyá asuykamuspa wañurachiwayña,
herido kaspaypas kawsachkaniraqmi” nispa.
10 Chaymi asuykuspay wañurachirqani wañuy patanpiña kasqanta yachaspay.
Umanpi coronatawan brazonpi brazaletetaqa qanmanmi apamurqayki.
11 Davidmi llumpay llakisqa kaspan pachanta llikiparqa,
hina chaynallatam rurarqa paywan kaqkunapas.
12 Llumpayllataña waqaspankum ayunarqaku tardeykuqkama Saulpa hinaspa churin Jonatanpa wañukusqanmanta.
Waqarqakutaqmi Tayta Diospa runankuna vencesqa kasqanmantapas chaynataq Israel casta runakuna guerrapi wañusqankumantapas.
13 Willaqnin mozotam David nirqa:
—¿Maymantataq qamqa kanki?
—nispa.
Chaymi payñataq nirqa:
—Ñoqaqa kani Amalec casta forasterom —nispa.
14 Davidmi nirqa:
—¿Imanasqamá manaqa manchakurqankichu Tayta Diospa nombrasqan rey wañuchiytaqa?
—nispa.
15 Chaymi huk kaqnin runata qayaykuspan David nirqa:
—Anchuykuspa wañuchiy —nispa.
—Wañuchisqaykimantam huchayoq kanki,
qampunim nirqanki:
“Tayta Diospa nombrasqan reytam wañuchirqani” nispa.
Saulmantawan Jonatanmanta David aya takita takisqanmanta
17 Saulpa hinaspa churin Jonatanpa wañukusqanmantam David kay aya takita takirqa.
18 Judapa mirayninkunaman yachachinanpaqmi “Flechana Arma” sutiyoq kay aya takita kamachikurqa.
Kay aya takiqa Jazerpa libronpi qellqasqam kachkan.
19 Israel castakuna,
qamkunamanta sumaq kaqmi
moqokunapi wañurun.
¡Imaynamá valeroso soldadokunaqa wichirun!
20 Gat llaqtapi ama willakuychikchu.
Ascalon llaqtapa callenkunapi
ama willakuychikchu
chaynapi Filistea warmikuna
ama kusikunankupaq,
chaynapi Dios mana reqsiq warmikuna
kusikuymanta ama pawaykachananpaq.
21 Gilboa Moqokuna,
qampa hawaykimanqa sullapas
amañayá chayamuchunchu.
Gilboa Moqokuna,
qampa hawaykimanqa parapas
amañayá chayamuchunchu.
Gilboa Moqokuna,
allin wiñachiq chakrakunapas
amañayá kachunchu.
Chaypim valeroso soldadokunapa
harkachikunanpas wischusqa karqa.
22 Jonatanpa flechankunaqa
wañuqkunapa yawarninpim
chapusqapuni karqa.
Valeroso soldadokunapa wirankunapim
chapusqapuni karqa.
Saulpa espadanmi wañuqkunapa yawarninpi
chapusqapuni karqa.
Valeroso soldadokunapa wirankunapim
chapusqapuni karqa.
23 Saulwan Jonatanqa kuyachikuqmi karqaku.
Saulwan Jonatanqa waylluchikuqmi karqaku.
Kawsaspapas manam rakinakurqakuchu.
Wañuspapas manam rakinakurqakuchu.
Ankakunamantapas aswan pawaqmi karqaku.
Leonkunamantapas aswan kallpasapam karqaku.
24 Israel casta warmikuna,
waqaychik Saulmanta.
Waqaychik guindo pachawan
pachachisuqnikichikmanta.
Waqaychik kuyayllapaq pachawan
pachachisuqnikichikmanta.
Waqaychik qori alhajawan pachaykichik
adornaqmanta.
25 ¡Imaynatam valeroso soldadokuna
peleopi wichirun!
Chaynam yachanaykichik moqokunapi
Jonatanpas wañusqa karun.
26 Jonatan wawqelláy,
llumpaytam qamqa llakirachiwanki.
Ñoqapaqqa mayna kuyaypaqmi karqanki,
warmikunapa kuyakuyninmantapas
aswan mastam kuyawarqanki.
27 ¡Imaynatam valeroso soldadokuna
wichirun!
¡Imaynatam guerrapi peleana armakunapas
tukurun!