—Tayta Diosmi kachamuwarqa Israel runakunapa reyninpaq aceitewan tallispa qamta nombranaypaq.

Chaynaqa uyariyá Llapallan Kamachiq Tayta Diospa imam nisusqaykita:

“Israel runakuna Egipto nacionmanta hamuchkaptinkum paykunapa contranpi sayarirqa Amalec casta runakuna chayraykum paykunata castigasaq.

3 Chaynaqa rispayá Amalec casta runakunata wañuchimuy.

Tukuy imantintam paykunataqa chinkachimunkichik.

Amam paykunataqa puchuchinkichikchu.

Wañuchinkim qarikunata,

warmikunata,

warmakunata chaynataq ñuñuq wawakunatapas.

Wañuchimunkimá vacakunatapas,

ovejakunatapas,

camellokunatapas chaynataq asnokunatapas” nispa.

4 Chaynapimá Saulqa qayachimurqa llapa runakunata hinaspam yuparqa Telaim llaqta lawpi.

Chaki-puri tropakunam karqa iskay pachak waranqa runakuna,

Juda casta runakunañataqmi karqa chunka waranqa qarikuna.

5 Chaymantam Saulqa pasarqa Amalec runakunapa yachanan llaqtaman hinaspam pakakururqa wayqopi.

6 Chaymantam Saulqa chaypi yachaq Cain casta runakunata nirqa:

—Kaymanta lloqsispa karuman ripukuychik.

Amalec runakunawan kuska kaptikichikqa paykunatawan kuskatam chinkarachikikuman.

Qamkunaqariki llakipayarirqankichikmi Israelpa llapallan mirayninkunata Egipto nacionmanta hamuptinku —nispa.

Chaynapimá Cain casta runakunaqa rakikururqaku Amalec casta runakunamanta.

7 Hinaptinmi Saulqa Amalec casta runakunata vencerurqa Havila lawmanta qallaykuspa Shur sutiyoq lawkama otaq Egipto nacionman yaykunakama.

8 Saulmi presocharurqa Amalec casta runakunapa reynin Agagta hinaspam chay reypa tropankunatañataq espadawan llapachallanta wañurachirqaku.

9 Ichaqa Saulmi tropankunapiwan puchuykachispa Rey Agagta mana wañuchirqakuchu,

manataqmi wañuchirqakuchu allinnin ovejakunatapas,

allinnin torokunatapas,

poqosqa malta torokunatapas hinaspa allinnin malta carnerokunatapas.

Manataqmi chinkachirqakuchu allinnin kaqkunataqa.

Mana valeq kaqkunatam ichaqa wañuchirqaku hinaspapas chinkachirqaku.

10 Chaymi Samuelta Tayta Dios nirqa:

11 —Pesakunim Saulta reypaq churasqaymanta.

Payqa ñoqamanta karunchakuruspanmi mana cumplinchu imapas kamachisqaykunata —nispa.

Chay nisqanwanmi Samuel llakikururqa hinaspam Tayta Diosta mañakurqa tukuy tuta.

12 Paqarinnintin punchawtam Samuel hatarirqa tutapayta Saulwan tupanankupaq.

Ichaqa Samuelmanmi willaykurqaku:

—Saulqa Carmel sutiyoq sitiomanmi pasakun,

chaypim allin reqsisqa kananpaq huk saywata hatarirachin,

chaymantañataqmi muyuriykuspan kutikun Gilgal llaqtaman —nispa.

13 Saulpa kasqanman Samuelqa pasaptinmi payta nirqa:

—¡Tayta Diosyá bendecisunki taytáy!

Ñoqaqa ñam ruraramuniña Tayta Diospa kamachiwasqanta —nispa.

14 Chaymi Samuelñataq nirqa:

—Hinaptinqa ¿imanasqataq uyarichkani ovejakunapa waqayninta hinaspa torokunapa qaparkachasqanta?

—nispa.

15 Chaymi Saulñataq nirqa:

—Amalec casta runakunapa kasqanmantam runakuna aparamunku.

Paykunam allinnin ovejakunatawan allinnin vacakunata puchuchirqaku chaynapi yupaychasqanchik Tayta Diosman ofrecespa kañapunapaq.

Wakiqnintam ichaqa lliwta chinkarachimuniku —nispa.

16 Hinaptinmi Samuel nirqa Saulta:

—¡Upallaykuyraq!

Kunanmi willasqayki chisi tuta imam Tayta Diospa niwasqanta —nispa.

Chaymi Saulñataq nirqa:

—Niwayá —nispa.

17 Hinaptinmi Samuel nirqa:

—Mana valeqpaq kikikita hapikuchkaspapas qamqa karunki Israel ayllukunapa kamachiqninraqmi.

Tayta Diospunim nombrasurqanki Israel casta runakunapa reynin kanaykipaq.

18 Chaymi Tayta Diosqa kachasurqanki chay huchasapa Amalec casta runakunawan peleaspa chinkachimunaykipaq.

19 Hinaptinqa ¿imanasqamá Tayta Diospa kamachisusqaykitaqa manaqa kasukurqankichu?

¿Imanasqamá Tayta Diospa mana gustasqantaqa rurarunki enemigopa imanmanpas pawakuykuspaqa?

—nispa.

20 Chaymi Samuelta Saul nirqa:

—Ñoqaqa kasukurqanim Tayta Diospa kamachiwasqantaqa.

Ruramurqanim paypa imam niwasqanta.

Chaymiki Amalec runakunapa reynin Agagtapas presota pusamurqani,

chinkachimurqanitaqmi llapallan Amalec casta runakunatapas.

21 Tropaykunam ichaqa hapikuykurqa chinkachinapaq kaq allinnin ovejakunata hinaspa vacakunata.

Arí,

chaytaqa puchuykachirqaku yupaychasqanchik Tayta Diosman Gilgal llaqtapi ofrecenapaqmi —nispa.

22 Chaymi Samuel nirqa:

24 Chaymi Saulñataq nirqa:

—Arí,

huchallikurunim.

Manam kasukurqanichu Tayta Diospa kamachiwasqantaqa nitaq qampa niwasqaykikunatapas.

Runakunata manchakuspaymi paykunapa mañakusqanta kasurqani.

25 Ichaqa ama hina kaspaykiyá chay huchaymanta pampachaykullaway,

kutiraysillawayá Tayta Diosta adoranaypaq —nispa.

26 Chaymi Samuelñataq nirqa:

—Manam qanwanqa kutiymanchu.

Qamqa yanqacharqankim Tayta Diospa kamachisusqaykita chaymi paypas qarqorusunki Israel runakunapa reynin manaña kanaykipaq —nispa.

27 Chaymi pasakunanpaq Samuel muyuriykuptin paypa capanpa puntanta Saul hapikururqa hinaptinmi chay capa llikikururqa.

28 Hinaptinmi Saulta Samuel nirqa:

—Kaynatam Tayta Dios llikirun Israel nacionpi gobiernoykita.

Qanmantam qechurusunki runamasikimanña qoykunanpaq.

Payqa qanmantaqa allin runam.

29 Israel runakunapa alabanan Diosqa manam llullakunchu,

manataqmi payqa imamantapas wanakunmanchu,

payqa manam runallachu wanakunanpaqqa —nispa.

30 Hinaptinmi Saulñataq nirqa:

—Huchallikurunim ñoqaqa.

Ichaqa ama hina kaspaykiyá Israel runakunapa ancianonkunapa ñawpaqninpiwan llapa runakunapa ñawpaqninpi ñawpaqta hinalla kunanpas reyta hina respetaway.

Chaynaqa ñoqawanyá kutirisun yupaychasqanchik Tayta Diosta adoramunaypaq —nispa.

31 Chaymi Samuel kutirqa Saulwan hinaptinmi Saulñataq Tayta Diosta adorarqa.

32 Samuelmi runakunata kamachirqa:

—Pusamuwaychik Amalec casta runakunapa reynin Agagta —nispa.

Agagñataqmi qewikachastin hamurqa Samuelpa kasqanman kaynata piensastin:

—Cheqaptapunim pasarunña rabiawan wañuchinakuyqa —nispa.

33 Ichaqa Samuelmi nirqa:

—Espadaykiwanmi wañuchirqanki achkallaña mamakunapa wawankunata.

Chaynapunim mamaykipas kanqa manaña wawayoq —nispa.

Chaynata rimariykuspanmi Agagta wañurachispan chika-chikanta kuchuparurqa Tayta Diospa ñawpaqninpi.

Chaynatam Samuel rurarurqa Gilgal llaqtapi.

34 Chaymantam Samuelqa pasakurqa Rama llaqtaman hinaptinmi Saulñataq ripukurqa Gabaa llaqtapi wasinman.

35 Samuelmi wañukunan punchawkama manaña rikurqañachu Saulta.

Tayta Diosmi pesakurqa Israel runakunapa reynin kananpaq Saul churasqanmanta chayraykum Samuelqa Saulmanta llumpayta waqarqa.