Filistea runakunawan guerrapi peleasqankumanta
13
Israel nacionpi Saul gobiernayta qallaykuspanqa karqa yuyayniyoq runañam,
chay nacionpim gobiernarqa iskay wata.
2 Israel casta runakunamantam akllaykurqa kimsa waranqa soldadokunata,
chay soldadokunamantam kikin Saulwan qeparqa iskay waranqa soldadokuna,
paykunaqa qeparqa Micmas llaqtapim chaynataq Betel llaqta law moqopim.
Waranqa soldadokunañataqmi qeparqa Jonatanwan,
paykunaqa qeparqa Benjamin ayllupa allpan Gabaa llaqtapim.
Puchuq runakunatañataqmi Saul aviarurqa wasinkuman ripukunankupaq.
3 Gabaa llaqta lawpi Filistea tropakunapa cuartelnintam Jonatan vencerurqa,
chaytam wakin Filistea runakunañataq yacharurqaku.
Hinaptinmi Saul tocachirqa cornetakunata enteron Israel nacionpi,
tocachirqaqa Hebreo casta runakuna llapallanku uyarinankupaqmi.
4 Llapallan Israel casta runakunam yacharurqaku Saulqa Filistea tropakunapa cuartelninpi vencerusqanta.
Yacharurqakutaqmi chay Filistea runakunaqa paykunata cheqnipakurusqankutapas.
Chayraykum Saulqa tropankunawan huñunakurqa Gilgal llaqtapi.
5 Filistea runakunapas huñunakururqakumá Israel runakunawan peleanankupaq.
Guerrapaq carretakunam Filistea runakunapa kapurqa kimsa chunka waranqa,
kapurqataqmi soqta waranqa sillakuq soldadokunapas.
Chaki-puri soldadokunañataqmi karqa mana yupay atina aqo hinaña.
Filistea runakunamá Micmas llaqtaman rispanku chaypi sayachirqaku campamentonkuta,
sayachirqakuqa Bet-aven llaqtapa intipa qespimunan lawninpim.
6 Israel runakunam llumpay sasachakuypi rikurirurqaku Filistea runakuna ñakarichiptin chaymi machaykunapi,
uchkukunapi,
qaqakunapi,
yarqakunapi hinaspa chakisqa pozokunapi pakakurqaku.
7 Wakin Hebreo casta runakunañataqmi Jordan Mayuta chimparuspa pasakurqaku Gad ayllupa allpan lawman chaynataq Galaad lawmanpas.
Saulmi ichaqa qeparurqa hina Gilgal llaqtallapi,
tropankunañataqmi qatirqa llumpay manchakuyllawanña.
8 Chaypim Saulqa suyarqa qanchis punchawpuni Samuelpa nisqanman hina.
Ichaqa Samuelmi mana chayamurqachu Gilgal llaqtaman chaymi runakunaqa ripukuytaña qallaykurqaku.
9 Chaymi runakunata Saul kamachirqa:
—Animalkunata apamuwaychik Tayta Diosman kañaspa ofrecenaypaq.
Apamuwaychiktaq paywan allinlla kasqanchikpaq ofrecena animalkunatapas.
Chaynapimá kikinpuni chay animalkunata ofrecespan lliwta kañarqa.
10 Chay ofrecesqanta tukuykuptillanmi chayaramurqa Samuel.
Chaymi Saulñataq lloqsirqa Samuelta rimaykuspan chaskiykunanpaq.
11 Ichaqa Samuelmi nirqa:
—¿Imatataq kayta rurarunki?
—nispa.
Hinaptinmi Saulñataq nirqa:
—Runakunam ripukuytaña qallaykurqa,
qampas niwasqayki punchawpiqa manataqmi chayamurqankichu.
Filistea runakunam Micmas llaqtapi huñunakurunku.
12 Chaymi piensarqani:
“Tayta Diospa favorninta manaraq mañakuchkaptiychá Filistea runakunaqa uraykamuspa Gilgal llaqtapi peleowan hapiruwanqa” nispay.
Chaymi mana munastinpas kikiyña animalkunata ofrecespay Tayta Diospaq kañapuchkarqani —nispa.
13 Hinaptinmi Samuelñataq nirqa:
—¡Loco hinam kaytaqa rurarunki!
Sichum kasukuwaq karqa Tayta Diospa kamachisusqaykita hinaptinqa paymi cheqapta takyachinman karqa Israel nacionpi gobiernoykita chaynapi wiñaypaq kananpaq.
14 Kunanmi ichaqa kay gobiernoykiqa chaylla tukurunqa.
Tayta Diosmi maskanqa paypa agradonpaq kaq runata hinaspam paytaña churanqa runakunata kamachinanpaq.
Qamqariki manam kasukurqankichu imam kamachisusqaykita —nispa.
15 Chaymantam Samuelqa pasakurqa Gilgal llaqtamanta.
Wakin tropakunañataqmi Saulta qatirqa guerrapi hapinakamunankupaq.
Chay Gilgal llaqtamanta lloqsispamá chayarurqaku Benjamin ayllupa allpanpi Gabaa llaqtaman.
Chaypim Saul yuparqa compañaqnin tropakunata.
Chay yupasqan tropankunaqa karqa soqta pachak qarikunam.
16 Saulqa churin Jonatanwanmi qeparurqa Benjamin ayllupa allpan Gabaa llaqtapi.
Paykunawantaqmi tropankunapas chaypi quedarqa.
Filistea runakunañataqmi samarurqaku Micmas llaqta lawpi.
17 Chaymi Filistea runakunapa campamentonmanta lloqsirqa kimsa grupo salteaqkuna.
Huknin grupom lloqsirqa Sual law Ofra sutiyoq llaqtaman.
18 Huknin grupoñataqmi pasarqa Bet-horon llaqta lawman,
kimsa kaq tropañataqmi pasarqa Zeboim sutiyoq qechwa law qawarina orqoman,
chay orqoqa qawachkan chunniq lawmanmi.
19 Israel lliw nacionpim huk herrerollapas mana tarikurqachu.
Filistea runakunam nirqa:
—Hebreo casta runakunaqa amam ruranqakuchu espadatapas nitaq lanzatapas —nispa.
20 Chaynapim llapallan Israel casta runakunaqa Filistea runakunamanña apaqku yapuna rejankuta,
lampankuta,
hachankuta hinaspa piconkutapas.
Aparqakuqa chaypi afilachimunankupaqmi.
21 Lampatawan rejatam afilaqku yaqa media onza qollqemanta.
22 Guerrapi peleananku punchaw chayaramuptinqa Saulwan hinaspa churin Jonatanwan kaq soldadokunapaqa manam karqachu espadanku nitaq lanzankupas,
kaspaqa-karqa Saullapam hinaspa churin Jonatanllapam.
23 Huknin grupo Filistea tropakunañataqmi hichparamurqa Micmas llaqtapa qasankama.