Diosta Deborawan Barac alabasqankumanta
5
Chay punchawpim Deborawan Abinoampa churin Barac takirqaku kaynata:
2 Israel casta runakunapa jefenkunam
kamachinankupaq listollaña churakururqaku.
¡Chayraykuyá Tayta Diosta alabaychik!
Runakunam peleanankupaq ofrecekurqaku.
¡Chayraykuyá Tayta Diosta alabaychik!
3 ¡Yaw reykuna,
uyariwaychikyá!
¡Yaw gobiernaqkuna,
atiendewaychikyá!
Ñoqam Tayta Diosman takisaq.
Israelpa yupaychasqan Tayta Diosmanmi takisaq.
4 Dios Taytalláy,
Seir Orqomanta lloqsimuptikim,
Edom nacion pampamanta pasakuptikim
allpa katkatatarqa.
Cielokunam parachimurqa.
Puyukunam parachimurqa.
5 Orqokunam Tayta Diospa qayllanpi mastarikururqa.
Sinai Orqopas paypa qayllanpim mastarikururqa.
Israelpa yupaychasqan Tayta Diospa qayllanpim
mastarikururqa.
6 Anatpa churin Samgarpa tiemponkunapim
manaña ñannintapas purirqakuchu.
Jaelpa tiemponkunapim
manaña ñannintapas viajarqakuchu.
Illaqkunam llutan ñanninkunataña purirqaku.
7 Israel nacionpi chakra runakunam qonqasqa karqaku.
Qonqasqaqa karqaku ñoqa Debora hatarinaykamam,
Israel nacionpa maman hina hatarinaykamam.
8 Mana reqsisqanku dioskunatam paykunaqa akllakuykurqaku.
Hinaptinmi llaqtakunapa punkunpiña kachkarqa guerrapas.
Israel casta tawa chunka waranqa runakunapiqa
manam karqachu huk lanzallapas.
Paykunapiqa manam karqachu huk harkachikunallapas.
9 Israel casta runakunapa jefenkunawanmi ñoqaqa kusikuchkani.
Kikillankumanta yanapakuqkunawanmi ñoqaqa kusikuchkani.
Qamkunaqa Tayta Diostayá yupaychaychik.
10 Yuyaymanaychikyá,
yuraq asnopi sillakuqkuna.
Yuyaymanaychikyá,
pellonpi tiyaqkuna.
Yuyaymanaychikyá,
chakillawan illaqkuna.
11 Yakupa kananpi yaku qoqkunapa kasqanpiyá yuyaymanaychik.
Paykunaqa chakra llaqtachakunapim vencesqanmanta willakunku.
Tayta Diospa runankunam llaqtapa punkunkunaman rirqaku.
12 ¡Rikchariy Debora,
rikchariy!
¡Rikcharispaykiyá takiy takikunata!
Abinoampa churin Barac,
hatarispayá pusay presoykikunata.
13 Israel casta runakunamanta puchuq jefekunam
uraykamurqaku.
Tayta Diospa runankunam kallpasapa soldadokuna
hina ñoqaman uraykamurqaku.
14 Amalec casta runakunata venceq Efrain
ayllum hamurqa.
Hina qepantañataqmi Benjamin ayllu hamurqa.
Hamurqakumá Maquir castamantapas jefekuna.
Hamurqakumá Zabulon ayllumantapas kamachikuqkuna.
15 Isacar ayllumanta kamachikuqkunapas
ñoqa Deborawanmi rirqaku.
Isacar ayllu runakunapas
ñoqa Baracwanmi karqaku.
Ñoqapa qepaytamá qechwaman kallparqaku.
Ruben ayllupa yachasqanpipas
sinchillatañam tanteanakurqaku.
16 ¿Imanasqataq qeparurqankichik ovejakunapa kanchanpiqa?
¿Imanasqataq qeparurqankichik
michiqkunapa ovejankuna qayasqanta uyarinaykichikpaqqa?
Ruben ayllupa yachasqankupipas sinchillatañam tanteanakurqaku.
17 Galaad casta runakunam
Jordan Mayupa chimpanpi qeparamurqaku.
Dan ayllu runakunam
buquekunapa waqtanpi qeparamurqaku.
Aser ayllu runakunam
lamar qochapa patanpi qeparamurqaku.
Paykunaqa buquekuna sayananpim qeparamurqaku.
18 Zabulon ayllu runakunaqa
wañuytapas manam manchakurqakuchu.
Neftaliy ayllu runakunaqa
moqokunapi wañuytapas manam manchakurqakuchu.
19 Reykunam Taanac llaqta lawman
hamuspanku pelearqaku.
Canaan allpapi reykunam
Meguido yakukunapa hichpan Taanacpi pelearqaku.
Aswanqa manam ima qollqetapas ganarqakuchu.
20 Cielokunapi lucerokunam pelearqaku.
Maymi kasqanmantam Sisarapa contranpi pelearqaku.
21 Cison sutiyoq wayqopi lloqllam
paykunataqa aparurqa.
Cison sutiyoq wayqopi ñawpaq lloqllam
tropankunata aparurqa.
Atiywanmi ñawpaqman risaq ñoqallayqa.
22 Caballokunapa kallpasqanmi
nisyullataña uyarikurqa.
Kallpasapa aguilillokunapa
kallpasqanmi uyarikurqa.
23 Tayta Diospa angelninmi nin:
“Meroz llaqtapi yachaq runakunatayá ñakaychik.
Chaypi yachaqkunatayá llumpayllataña ñakaychik.
Tayta Diosta yanapaqnin
mana hamusqankumantayá ñakaychik.
Soldado hina yanapaqnin
mana hamusqankumantayá ñakaychik.”
24 Cain casta Heberpa warmin Jaelqa
llapa warmikunamanta aswan bendecisqayá kachun.
Karpapi yachaq warmikunamantapas
aswan bendecisqayá kachun.
25 Yakuta Sisara mañakuptinmi
Jaelqa lecheta qoykurqa.
Sumaqllaña tazonpim
llukllusqa lecheta qoykurqa.
26 Huknin makinwanmi estacata hapiykurqa.
Alleq makinwanñataqmi llamkaqpa mazonta hapiykurqa.
Hinaspam Sisarata umanpi estacarurqa.
Umanta pakiruspam sentidonta pasarachirqa.
27 Chaynapim Sisaraqa qepichakururqa Jaelpa chakinkunapi.
Qepichakuruspanmi ankallarurqa chayllapi.
Wañururqamá maymi qepichakurusqanpi.
28 Sisarapa mamanmi ventanamanta qawarqa.
Ventanapa rejillasninta qawaspam nirqa:
“¿Imanasqataq wawaypa guerra carretanqa
mana chayamunchu?
¿Imanasqataq guerra carretankunaqa
mana uyarikunchu?”
29 Aswanqa yuyayniyoq señorakunam nirqa.
Chaynataqmi kikillanpas nikurqa:
“Segurochá maskachkanku qechunankupaq kaqta.
Otaqchá rakinakuchkanku qechusqankuta.
30 Sapa jefemanchá hukta otaq iskay sipasta qochkanku.
Sisaramanqa colorniyoq pachatachá qochkanku.
Hukta otaq iskay sumaq bordasqa telakunatachá
qechuqkunapa kunkanpaq qochkanku” nispa.
31 ¡Dios Taytalláy,
llapa enemigoykikunaqa chaynatayá wañuchun!
¡Kuyasuqnikikunayá ichaqa kancharichkaq qespimuq inti hina kachun!
Chaynapimá chaylawpiqa mana guerra karqachu tawa chunka wata.