—¿Mayqanniykutaq puntata risaqku Canaan casta runakunawan peleaq?

—nispa.

2 Hinaptinmi Tayta Dios nirqa:

—Juda ayllukunam puntataqa rinqaku,

ñoqam Canaan casta runakunapa allpantaqa qosaq paykunaman —nispa.

3 Chaymi Juda ayllu runakuna castamasin Simeon ayllu runakunata nirqaku:

—Hakuchik tocaqniyku herencia allpaman hinaspayá peleamusun Canaan casta runakunapa contranpi,

chaynataqchá ñoqaykupas qamkunapa tocanciaykichikman risaqku —nispa.

Chaymi Simeon ayllu runakunaqa paykunawan rirqaku.

4 Juda ayllu runakuna riptinkum Tayta Dios paykunaman qoykurqa Canaan casta runakunata chaynataq Ferez casta runakunatapas.

Paykunaqa Bezec lawpim vencerurqaku chunka waranqa runakunata.

5 Chaypim Adoni-bezec sutiyoq reyta tarirurqaku hinaspam paypa contranpi peleaspanku Canaan casta runakunata hinaspa Ferez casta runakunata vencerurqaku.

6 Adoni-bezec reyñataqmi lluptikururqa ichaqa Israel casta runakuna hapiruspankum makinkunapa hinaspa chakinkunapa maman dedonta qorururqaku.

7 Chay reymi nirqa:

—Qanchis chunka reykunapa makinkunapa hinaspa chakinkunapa maman dedonkunatam qorurachirqani hinaptinmi mesaypa ukunpi kaspanku mesay- manta wichiqkunata huñuspa mikuqku.

Hina chaynallatam Diospas pagaykapuwan rurasqayman hina —nispa.

Adoni-bezecta Jerusalen llaqtaman pusamuptinkum chaypi wañukurqa.

8 Judapa mirayninkunam Jerusalen llaqtapa contranpi peleaspanku vencerurqaku hinaspam chaypi yachaqkunatapas espadawan wañurachirqaku,

kañaykurqakutaqmi llaqtatapas.

9 Judapa mirayninkunaqa rirqakutaqmi orqokunapi,

Neguev lawpi chaynataq waqtakunapi yachaq Canaan casta runakunapa contranpi peleaqpas.

10 Hebron llaqtapi yachaq Canaan casta runakunapa contranpi peleaq Juda ayllu runakuna pasaspankumá wañurachirqaku Sesai sutiyoq runata,

Ahiman sutiyoq runata chaynataq Talmai sutiyoq runatapas.

Hebron llaqtapa ñawpaq sutinqa karqa Kiriat-arbam.

11 Rirqakutaqmi Debir llaqtapi yachaqkunapa contranpi peleaqpas.

Chay Debir llaqtapa ñawpaq sutinqa karqa Kiriat-sefermi.

12 Calebmi nirqa:

—Pipas Kiriat-sefer llaqtata atacaspa venceruqtaqa warmi churiy Acsawanmi casarachisaq —nispa.

13 Hinaptinmi Cenazpa churin Otoniel vencerurqa,

Cenazqa karqa Calebpa sullka wawqenmi.

Calebqa Otonieltamá warmi churin Acsawan casarachirqa.

14 Acsam qosan Otonielman hamuspan umacharqa taytan Calebmanta chakrata mañanankupaq.

Asnonmanta Acsa uraykuptinmi taytan Caleb tapurqa:

—¿Imataq pasasunki?

—nispa.

15 Chaymi Acsañataq nirqa:

—Neguev allpata qoykuwachkaspaykiqa ama hina kaspayá pukyukunatapas qoykuway —nispa.

Chaymi Caleb qoykurqa hanay lawpi pukyukunatapas chaynataq uray lawpi pukyukunatapas.

16 Cain casta runakunamanta kaqkunam otaq Moisespa suegronpa mirayninkunam Judapa mirayninkunapiwan rirqaku Palmeras sutiyoq llaqtamanta Juda lawpi chunniqman,

chay chunniqqa kachkan Neguev law Arad llaqtapa hichpanpim.

Rispankumá chaypi runakunawan yacharqaku.

17 Juda ayllu runakunam castamasin Simeon aylluwan rispanku Sefat llaqtapi yachaq Canaan casta runakunata vencerurqaku hinaspam llaqtatapas purmarachirqaku,

chayraykum chay llaqtataqa suticharqaku Hormawan.

18 Juda ayllu runakunaqa dueñochakuykurqakutaqmi Gaza llaqtatapas,

Ascalon llaqtatapas,

Ecron llaqtatapas chaynataq muyuriqninpi allpakunatapas.

19 Juda aylluta Tayta Dios yanapaptinmi orqokunapi yachaqkunata qarqorurqaku.

Aswanqa qechwapi yachaqkunataqa manam qarqorqakuchu guerrapaq carretanku fierromanta kasqanrayku.

20 Hebron llaqtatam Calebman qorqaku Moisespa nisqanman hina.

Calebñataqmi chay llaqtamanta Anacpa kimsa churinkunata qarqorurqa.

21 Ichaqa Jerusalenpi yachaq Jebus casta runakunataqa Benjaminpa mirayninkunaqa manam qarqorqakuchu chaymi Jebus casta runakunaqa yacharqaku Benjaminpa mirayninkunawan Jerusalen llaqtapi.

Chaypimá yacharqaku kay libro qellqasqa kanankama.

22 Josey ayllu runakunapas Betel llaqtapa contranpim rirqaku Tayta Dios yanapaptin.

23 Paykunamá Betel llaqtapa contranpi wateqaqkunata churarqaku.

Chay Betel llaqtapa ñawpaq sutinmi karqa Luz.

24 Chay wateqaqkunam rikururqaku llaqtamanta huk runa lloqsimuchkaqta,

paytam nirqaku:

—Qawaykachiwayku imaynam llaqtaman yaykunata hinaptinqa llakipayasqaykikum —nispa.

25 Chay runam qawachirqa mayninmi yaykunata hinaptinmi chay llaqtapi llapallan runakunata espadawan wañurachirqaku ichaqa chay llaqtaman mayninmi yaykuna qawachiq runataqa llapallan familiantintam mana imanarqakuchu.

26 Hinaptinmi chay runaqa pasakurqa Het casta runakunapa allpanman hinaspam chaypi huk llaqtata hatarichispan Luzwan suticharqa.

Chaynam sutin karqa kay libro qellqasqa kasqan punchawkama.

27 Manases ayllu runakunam ichaqa mana qarqorqakuchu Bet-sean llaqtapi,

Tanaac llaqtapi,

Dor llaqtapi,

Ibleam llaqtapi hinaspa Meguido llaqtapi yachaqkunata nitaq chay llaqtakunapa muyuriqnin llaqtachakunapi yachaqkunatapas.

Chaynapimá Canaan casta runakunaqa hinalla yachakurqaku chay llaqtakunapi.

28 Israel casta runakuna atiyniyoqña karuspam ichaqa Canaan casta runakunata devaldella llamkachirqaku,

manamá qarqorqakuchu.

29 Efrain casta runakunapas manataqmi Gezer llaqtapi yachaq Canaan casta runakunataqa qarqorqakuchu chaymi Canaan casta runakunaqa paykunawan yacharqaku Gezer llaqtapi.

30 Zabulon ayllupas manataqmi Quitron llaqtapi yachaqkunata qarqoqchu nitaq Nabal llaqtapi yachaqkunatapas,

chay Canaan casta runakunaqa paykunawan yachaspam devaldella llamkarqaku.

31 Aser ayllupas manataqmi Aco sutiyoq llaqtapi yachaqkunataqa qarqorqakuchu nitaq Sidon llaqtapi,

Ahlab llaqtapi,

Aczib llaqtapi,

Helba llaqtapi,

Afec llaqtapi hinaspa Rehob llaqtapi yachaqkunatapas.

32 Chaynapim Aser aylluqa Canaan casta runakunawan kuska yacharqaku mana qarqosqankurayku.

33 Neftaliy ayllupas manataqmi Bet-semes llaqtapi yachaqkunataqa qarqorqachu nitaq Bet-anat llaqtapi yachaqkunatapas,

paykunaqa Canaan casta runakunapa yachasqanku allpapim yacharqaku.

Ichaqa Bet-semes llaqtapi yachaqkunatawan Bet-anat llaqtapi yachaqkunataqa devaldellam llamkachirqaku.

34 Amor casta runakunam Dan aylluta orqokunaman qatirurqaku hinaspam mana dejarqakuchu qechwaman hamunankuta.

35 Chaynapim Amor casta runakunaqa hinalla yachakurqaku Heres Orqopi,

Ajalon Qechwapi hinaspa Saalbim llaqtapi.

Ichaqa Josey ayllum atiyniyoq karuspan paykunawan devaldella llamkachikurqa.

36 Amor casta runakunapa linderonqa karqa Acrabim Qasamanta Sela llaqtakamam hinaspam hanay lawman chutarikurqa.