—Israelpa yupaychasqan Tayta Diosmi nin:

“Ñawpaq tiempopi abueloykichikkunam yacharqaku Eufrates Mayupa waklaw chimpanpi.

Paykunam karqa Tareywan churinkuna,

Tareypa churinkunaqa karqa Abrahanwan Nacormi.

Paykunam taytacha-mamachakunata adorarqaku.

3 Ñoqa Tayta Diosmi pusamurqani abueloykichik Abrahamta mayupa waklaw chimpanmanta hinaspam purichirqani lliw Canaan law allpakunapi.

Chaymantam payta mirachirqani churin Isaacta qospay.

4 Isaacmanmi qorani churin Jacobtawan churin Esauta.

Esaumanmi qorqani Seir Orqota dueñochakunanpaq.

Jacobñataqmi mirayninkunapiwan rirqaku Egipto nacionman.

5 Chaymantam ñoqa kacharqani Moisestawan Aaronta hinaspam castigarqani Egipto nacionpi runakunata paykunapi tukuy rurasqaykunawan hinaspam chay nacionmanta taytaykichikkunata horqomurqani.

6 Egipto nacionmantamá paykunataqa horqomurqani.

Lamar qochaman chayaramuptinkum Egipto runakuna carretankunawan chaynataq silladakunawanpas qatimurqaku tayta-mamaykichikta Puka Lamar Qochakama.

7 Chaymi tayta-mamaykichik qayakamuwaptinku churarqani tutayayta paykunapa qepanpi otaq Egipto runakunapa ñawpaqninpi.

Lamar qochatam paykunapa hawanman kutiykachirqani chaymi paykunata taparurqa.

Tayta-mamaykichikmi qawarqaku Egipto runakunawan imam rurasqayta.

Paykunaqa chunniqpim karqaku unay watakuna.

8 Chaymantam qamkunatapas yaykuchirqaykichik Jordan Mayupa waklawninpi yachaq Amor casta runakunapa allpanman.

Paykunam pelearqaku qamkunapa contraykichikpi,

aswanqa ñoqam vencechirqaykichik chaymi allpankutapas dueñochakurqankichik.

Qayllaykichikmantam paykunata chinkachirqani.

9 Chaymantam Siporpa churin Moab casta runakunapa reynin Balac pelearqa qamkunapa contraykichikpi.

Chaymi Beorpa churin Balaamta qayachimurqa ñakasunaykichikpaq.

10 Aswanqa ñoqam Balaamta mana kasurqanichu chaymi bendicionniytaña achka kutipi qamkunapaq mañakuptin Rey Balacpa makinmanta librarqaykichik.

11 Chaymantam Jordan Mayuta chimparuspa chayamurankichik Jerico llaqtaman.

Chay llaqtapi yachaqkunam qamkunawan pelearqaku,

pelearqakutaqmi Amor casta runakunapas,

Ferez casta runakunapas,

Canaan casta runakunapas,

Het casta runakunapas,

Girges casta runakunapas,

Hiv casta runakunapas chaynataq Jebus casta runakunapas.

Ñoqam ichaqa paykunata makikichikman churarqani.

12 Qamkunapa ñawpaqnikichiktam kacharqani wayliskunata hinaptinmi qayllaykichikmanta qarqorqaku Amor casta runakunapa iskaynin reyninkuta.

Chaynaqa manam espadaykichikwanchu nitaq flechaykichikwanchu paykunataqa qarqorqankichik.

13 Qorqaykichiktaqmi mana llamkasqaykichik chakrakunatapas chaynataq mana hatarichisqaykichik llaqtakunatapas.

Chay lawpi kunan yachaspaykichikmi mikuchkankichik mana plantasqaykichik uvas huertakunamantawan aceitunas huertakunamanta” nispa.

14 —Kunanyá Tayta Diosta respetaspa cheqap sonqowan payta adoraychik.

Eufrates Mayupa waklaw chimpanpiraq chaynataq Egipto nacionpiraq kachkaspanku abueloykichikkunapa adorasqanku taytacha-mamachakunatayá qamkunamanta wischuychik hinaspayá Tayta Diosllata adoraychik.

15 Sichum Tayta Dios adorayta mana munaspaqa,

kunanpuni akllakuychik pim adoranaykichikta.

¿Eufrates Mayupa waklaw chimpanpi kachkaspankuraq abueloykichikkunapa adorasqan taytacha-mamacha adoraytachu munankichik icha kay yachasqaykichik allpapi kaq Amor casta runakunapa taytacha-mamachanku adoraytachu munankichik?

Ñoqam ichaqa familiaykunapiwan Tayta Diosllata adorasaqku —nispa.

16 Chaymi runakunañataq nirqaku:

—Tayta Diosta saqeruspa taytacha-mamachakuna adoraytaqa amayá yanqallapas piensasaqkuchu.

17 Yupaychasqanchik Tayta Diosmi ñoqanchiktaqa chaynataq abuelonchikkunatapas Egipto nacionmanta sirviente kachkaptinchik horqomuwarqanchik.

Paymi qayllanchikpi chay hatun milagrokunata rurarqa,

paytaqmi waqaychawarqanchik hamusqanchik ñanpipas hinaspa pasamusqanchik allpapi runakunamantapas.

18 Tayta Diosmi qayllanchikmanta qarqorqa llapallan runakunata otaq chay allpapi yachaq Amor casta runakunata.

Chaynaqa ñoqaykuqa adorasaqku Tayta Diosllatam.

Payllam ñoqaykupa Diosniykuqa —nispa.

19 Chaywapas Josueymi nirqa paykunata:

—Tayta Dios adoraytaqa manam atiwaqchikchu,

payqa Chuya Diosmi chaynataq sientikuq celoso Diosmi.

Payqa manam pampachasunkichikchu mana kasukuptikichikqa hinaspa huchallikuptikichikqa.

20 Sichu Tayta Diosta saqeruspa taytacha-mamachakunataña adoraptikichikqa paypas contraykichikpi kaspanmi castigasunkichik hinaspam chinkarachisunkichik.

Chaynatamá rurasunkichik kunankama qamkunapaq allinkunata rurachkaspanpas —nispa.

21 Runakunam Josueyta nirqaku:

—Manam chaynaqa kanmanchu.

Ñoqaykuqa adorasaqku Tayta Diosllatam —nispa.

22 Chaymi runakunata Josuey nirqa:

—Kikillaykichikmi testigo kankichik Tayta Diosllata adoranaykichikpaq akllakusqaykichikmanta —nispa.

Chaymi paykunañataq nirqa:

—Arí,

testigom kaniku —nispa.

23 Josueymi paykunata nirqa:

—Kunanyá hatallisqaykichik taytacha-mamachakunata wischuychik hinaspayá tukuy sonqoykichikwan Israelpa yupaychasqan Tayta Diosman kutirikuychik —nispa.

24 Chaymi runakunañataq nirqaku:

—Ñoqaykuqa yupaychasqanchik Tayta Diostam adorasaqku hinaspapas niwasqankutam kasukusaqku —nispa.

25 Josueymi chay punchawpi rurarqa contratota runakunawan chay huñunakusqanku Siquem llaqtapi hinaspam paykunaman qorqa decretokunatawan leykunata.

26 Chaykunatam Josuey qellqarqa Diospa yachachikuyninkuna libropi.

Chaynataqmi hatun rumita hapispan Tayta Diospa santuarionpa hichpan encina sachapa sikinpi sayachirqa

27 hinaspam llapallan runakunata nirqa:

—Kay rumim serviwasunchik testigomanta Tayta Diospa niwasqanchik palabrakunata uyarisqanrayku.

Kay rumimá testigo kanqa qamkunapa contraykichikpi chaynapi Diosninchiktaqa ama traicionanaykichikpaq —nispa.

28 Chaymantam Josuey runakunata aviarqa herencianku allpanman sapakama kutikunankupaq.

29 Manapas unaymantam Tayta Diospa serviqnin Nunpa churin Josuey wañukurqa pachak chunkan watayoqña.

30 Hinaptinmi pamparurqaku Timnat-sera llaqta law allpanpi.

Chay Timnat-sera llaqtaqa karqa Efrain ayllupa allpan orqokunapim otaq Gaas Moqopa norte lawninpim.

31 Israelpa castankunam adorarqaku Tayta Diosta Josuey kawsanankama chaynataq Josueypa ancianomasinkuna kawsanankamapas.

Chay ancianokunam qawarqaku Israel castakunapaq Tayta Dios tukuy ima rurasqankunata.

32 Israelpa mirayninkunam Siquem llaqtapi Joseypa herencian chakrapi pamparqaku Egipto nacionmanta Joseypa tullunkuna apamusqankuta.

Chay allpatam Jacob rantirqa tawa kilo parten qollqewan Hamorpa churinkunamanta.

Hamorqa karqa Siquempa taytanmi.

Chay chakram karqa Joseypa mirayninkunapaq herencia.

33 Wañukurqataqmi Aaronpa churin Eleazarpas hinaptinmi pamparurqaku churin Fineespa allpan moqopi otaq Efrain ayllupa allpan orqopi,

chay allpataqa Josueymi qorqa Fineesman.