2 —Akllaychik chunka iskayniyoq runakunata,

sapa ayllumantam akllankichik huk runata.

3 Kamachiytaqyá paykunata chaynapi mayupa chawpinpi sacerdotekunapa allin sayasqanku sitiomanta chunka iskayniyoq rumikunata horqomunankupaq,

chaykunata apaspankum montonqaku kunan tuta maypim samanaykichik sitiopi —nispa.

4 Chaymi Josuey qayarqa chay akllasqan runakunata,

sapa ayllumantam qayarqa huk runata.

5 Paykunatam nirqa:

—Yupaychasqanchik Tayta Diospa baulninpa ñawpaqninmanyá riychik mayupa chawpinkama.

Chaymantayá sapakama huk rumita horqomuspa hombromuychik hayka ayllum Israelpa mirayninkunamanta kasqanchikman hina.

6 Chay rumikunaqa señal hinam qamkunapaq kanqa,

hamuq punchawkunapim churikichik tapusunkichik:

“Qamkunapaqqa ¿ima ninantaq kay rumikunaqa?”

nispa.

7 Hinaptinmi ninkichik:

“Tayta Diospa contrato baulnin chimpachkaptinmi ñawpaqninpi Jordan Mayu rakikururqa.

Chaynaqa kay rumikunaqa Israelpa mirayninkuna wiñaypaq yuyarinankupaqmi” nispa.

8 Chaymi Israelpa mirayninkuna Josueypa kamachisqanta hina rurarqaku.

Josueyman Tayta Diospa imaynam nisqanta hinam Israelpa mirayninkunamanta hayka ayllum kasqankuman hina chunka iskayniyoq rumita aparqaku.

Jordan Mayupa chawpinmantamá aparqaku maypim chay tuta samananku sitiokama.

9 Josueypas montorurqataqmi chunka iskayniyoq rumikunata Jordan Mayupa chawpinpi,

chaynataqa rurarqa contrato baul apaq sacerdotekunapa sayasqan sitiopim.

Chaypiraqmi kachkan kay libro qellqasqa kasqan tiempokamapas.

10 Chaymi baulta apaq sacerdotekuna mayupa chawpinpi sayarurqaku,

sayarurqakuqa Josueynintakama runakunaman rimananpaq Tayta Diospa tukuy kamachisqanta cumplinankukamam.

Cumplirqakumá Josueyman Moisespa tukuy kamachisqanpi hina.

Chaymi runakuna utqayllamanña chimparurqaku.

11 Llapallan runakuna chimpayta tukuruptinkuñataqmi Tayta Diospa baulnintapas sacerdotekuna pasachirqa runakunapa ñawpaqninman chayanankukama.

12 Chimparqakutaqmi Rubenpa miraynin soldadokunapas,

Gadpa miraynin soldadokunapas chaynataq Manasespa parten ayllu armasqa soldadokunapas.

Chimparqakumá Israelpa wakin mirayninkunapa puntanta paykunaman imaynam Moisespa kamachisqanpi hina.

13 Tayta Diospa qayllantam guerrapi peleanankupaq armasqa yaqa tawa chunka waranqa soldadokuna chimparurqaku Jerico llaqtapa pampan lawman.

14 Chay punchawmi Israelpa llapallan mirayninkuna qawachkaptinku Josueyta Tayta Dios hatuncharqa chaynapi Moisesta respetasqankuta hina Josueytapas kawsanan punchawkama respetanankupaq.

15 Tayta Diosmá kamachirqa Josueyta:

16 —Chunkantin Kamachikuy waqaychana baul apaq sacerdotekunata kamachiy Jordan Mayumanta lloqsimunankupaq —nispa.

17 Chaymi Josuey kamachirqa Jordan Mayumanta lloqsimunankupaq.

18 Tayta Diospa contrato baulnin apaq sacerdotekunam Jordan Mayumanta lloqsiramuspanku mayu patan chaki allpapiña sayachkarqaku hinaptinmi manaraq chakichkaspan risqanta hina mayu kuchun-kuchun kallparqa.

19 Chaymi llapallan runakuna Jordan Mayuta chimparurqaku punta kaq killapa chunka kaq punchawninpi,

campamentonkutam sayachirqaku Gilgal law Jerico llaqtapa chimpan intipa qespimunan lawpi.

20 Chay Gilgal lawpim Josuey montorurqa Jordan Mayumanta apamusqanku chunka iskayniyoq rumikunata.

21 Hinaspam Israelpa mirayninkunata nirqa:

—Miraynikichikkunam tayta-mamanta hamuq punchawkunapi tapunqaku:

“¿Imaninantaq kay rumikunaqa?”

nispa.

22 Hinaptinmi paykunaman willankichik:

“Israel casta runakunam kay Jordan Mayuta chaki allpanta chimpamurqaniku.

23 Yupaychasqanchik Tayta Diosmi qayllaykupi Jordan Mayuta chimpay tukunaykukama chakirachirqa,

Puka Lamar Qochata hinam payqa rurarqa.

Chay qochatam ñawpaqniykupi chakirachirqa chimpay tukunaykukama” nispa.

24 Chaynapim kay pachapi kaq llapallan runakuna Tayta Diospa llumpay atiyninta reqsinqaku,

qamkunapas sapa punchawmi yupaychasqanchik Tayta Diosta respetankichik.