24
Israel casta runakunata Tayta Dios bendeciy munasqanta Balaam yacharuspanmi manaña rirqañachu wakin kutikunapi hinaqa Diospa imam nimunanta uyariq,
payqa chunniq lawmanñam qawarirqa.
2 Israel casta runakunata ayllupuralla samasqankuta qawachkaptinmi Diospa Espiritun Balaamta huntaykurqa.
3 Chaymi Balaam kaynata rimarirqa:
Beorpa churin ñoqa Balaanmi,
imakunapas allinta qawaq ñoqa Balaanmi,
4 Diospa rimasqankuna uyariq ñoqa Balaanmi,
Tukuy Atiyniyoq Diospa qawachisqan
qawaq ñoqa Balaanmi,
mosqoypi hina kaspay revelacionkuna
qawaq ñoqa Balaanmi kaynata nini:
5 Jacobpa miraynin runakuna,
¡mayna kuyayllapaqmi karpaykikunaqa!
Israelpa mirayninkuna,
¡mayna kuyayllapaqmi yachanaykikunaqa!
6 Qamkunaqa rikchakunkichik
seqella plantasqa palmera sachakunamanmi
chaynataq mayu patanpi huertakunamanmi.
Qamkunaqa rikchakunkichik
Tayta Diospa plantasqan aloes plantakunamanmi
chaynataq yaku patanpi cedro sachakunamanmi.
7 Israel casta runakunaqa
manam yakumantapas muchunqakuchu.
Tukuy ima tarpukusqankupaqpas
manam yakuqa pisinqachu.
Reyninkuqa Rey Agagmantapas aswan
hatunraqmi kanqa.
Payqa hatun munaychakuqmi kanqa.
8 Paykunataqa Diosmi Egipto nacionmanta horqomurqa.
Monte toro hina kallpasapallañam payqa.
Israel casta runakunaqa
enemigon nacionkunatapas pasaypaqtam tukurunqa.
Israel casta runakunaqa
enemigonkunapa tulluntapas ñutuypaqmi-ñutuparunqa.
Paykunaqa enemigonkutam
flechankuwan tuksiypaq-tuksiparunqa.
9 Paykunaqa leon hinaraqmi kurkuykunpas.
Paykunaqa china leon hinaraqmi waqtapanpas.
¿Pitaqsi atinman rikchachiytaqa?
¡Diospa bendecisqanyá kachun
bendecisuqnikichik runaqa!
¡Diospa ñakasqanyá kachun
ñakasuqnikichik runaqa!
Hamuq punchawkunapaq Balaam imam rimarisqanmanta
10 Balaampa nisqanta uyarispanmi Rey Balac anchallataña rabiarurqa hinaspam rabiamanta makintapas taqllakuspanraq Balaamta nirqa:
—Enemigoykunata ñakanaykipaqmi qayachimurqayki,
aswanqa kimsakamañam paykunapaq bendicionta mañakurunki.
11 Chaynaqa wasikimanyá kutikuy.
Ñoqaqa allin reqsisqatam ruraykiman karqa aswanqa Tayta Diosmi harkakurun —nispa.
12 Chaymi Balaamñataq nirqa:
—Ñoqapas nimurqaniñam kachamuwasqayki runakunata:
13 “Yachasqayki palaciopi huntataña qori-qollqeta qowaptikipas,
Tayta Diospa kamachiwasqanpa contranpiqa manam imatapas ruraymanchu.
Allin kaqtapas otaq mana allin kaqtapas kikillaymantaqa manam ruraymanchu,
Tayta Diospa niwasqallantam rimasaq” nispa.
14 Arí kunanqa llaqtaymanmi kutikusaqña aswanqa willaykusqaykiyá hamuq tiempokunapi runaykikunata wak runakuna imam ruranankumanta —nispa.
15 Balaanmi kaynata rimarirqa:
Beorpa churin ñoqa Balaanmi,
imakunapas allinta qawaq ñoqa Balaanmi,
16 Diospa rimasqankunata uyariq
ñoqa Balaanmi,
Alto-altopi kaq Diospa tanteasqankuna yachaq
ñoqa Balaanmi,
Tukuy Atiyniyoq Diospa qawachisqan qawaq
ñoqa Balaanmi,
mosqoypi hina kaspay revelacionkuna qawaq
ñoqa Balaanmi kaynata nini:
17 Rikuchkaniñam aswanqa manam kunankuna kaqtachu,
qawachkaniñam aswanqa manam hichpallapi kaqtachu.
Lucerom Jacobpa mirayninmanta lloqsimunqa.
Munayniyoq reymi Israelpa castamanta hatarimunqa.
Moabpa castan runakunapa umantam taqñunqa.
Setpa llapallan mirayninkunatam ñutuparunqa.
18 Edompa allpantam dueñochakunqa.
Seir Orqopi kaq enemigonkunatam vencenqa.
Israelpa castankunaqa atiywanmi ruranqa.
19 Jacobpa mirayninmantam munaychakuq lloqsinqa.
Payqa llaqtapi puchuqkunatam chinkachinqa.
20 Amalec casta runakunapa allpan lawman Balaam qawarispanmi kaynata rimarirqa:
Amalec nacionqa wakin nacionkunamantapas
ancha reqsisqallañam.
Chaywanpas wiñaypaq tuñichisqa
kaspam purmarunqaña.
21-22 Balaamqa Cain casta runakunatapas qawarispanmi kaynata rimarirqa:
Cainpa mirayninkuna,
amparakunayki sitiokuna
mayna seguroña kaptinpas,
qesachakuq hina qaqa
rumikunapi yachaptikipas,
chay qesaykiqa kañasqam kanqa.
Asiria lawmanta hamuqkuna
presocharusuptikichikmi chaynaqa kankichik.
23 Balaamqa rimarirqataqmi:
Ay ¿piraq kawsanqa tukuy kaykunata Dios ruraptinqa?
24 Chipre islamantam buquekuna hamunqa.
Hinaspam Asiria nacionpi munaychakunqa.
Heberpa mirayninkunapim munaychakunqa.
Ichaqa chay munaychakuqkunapas wiñaypaqmi puchukarunqa.
25 Chaymantam llaqtanman Balaam kutikurqa,
Rey Balacpas ñannintam pasakurqa.