—Sichu pipas ñoqa Tayta Diosta serviwananpaq huk runata prometekuwaptinqa chay runapa precionta pagaspam reclamanqa.

3 Iskay chunka watayoqmanta soqta chunka watayoqkama qari kaptinqa tasankichik medio kilo masnin qollqetam santuariopi pesoman hina.

4 Warmi kaptinñataqmi tasankichik cuarto kilo masnin qollqeta.

5 Pichqa watayoqmanta iskay chunka watayoqkama qari kaptinqa tasankichik yaqa cuarto kilo qollqetam.

Warmi kaptinñataqmi tasankichik tawa onza qollqeta.

6 Huk killayoq wawapaqñataqmi pichqa watankama tasankichik iskay onza qollqeta,

warmi wawapaqñataqmi kanqa huk onza tumpa maschan qollqe.

7 Soqta chunka watayoqmanta hanaymanñataqmi tasankichik qari kaptinqa soqta onza qollqeta.

Warmi kaptinñataqmi tasankichik tawa onza qollqeta.

8 Ichaqa chay prometekuq runa llumpay wakcha kaspan tasasqaykichikta mana pagayta atiptinqa chay prometesqa runatam sacerdoteman pusankichik hinaptinmi pay churanqa precionta prometekuqpa pagay atinanpaq hinalla.

9 —Sichu ñoqa Tayta Diosman ofrecewanaykichikpaq ofrenda animal kaptinqa chay animalmi ñoqallapaqña sapaqchasqa kanqa.

10 Amam cambiankichu allin otaq mana allin kaptinpas,

sichu chay animalta cambiarunki huk animalwan hinaptinqa iskaynin animalmi ñoqapaq sapaqchasqa kanqa.

11 —Sichu ñoqa Tayta Diosman mana ofrecewanaykichikpaq hina chay animal kaptinqa,

sacerdotemanmi pusankichik chay animalta.

12 Paymi qawaspan precionta churanqa allin otaq mana allin kaptinpas.

Chaynapim chay animalpa precionqa kanqa sacerdotepa churasqanman hina.

13 Chay animalta pipas reclamayta munaspaqa,

chay precionmanmi yapanqa pichqa parteman rakisqapa hukninta.

14 —Pipas wasinta ñoqa Tayta Diospaqña sapaqchapuwaptinqa sacerdotem precionta churanqa allin otaq mana allin kaptinpas.

Precionqa kanqa sacerdotepa churasqanman hinamá.

15 Sapaqchapuwasqan wasita pipas kutichikuyta munaspaqa chay wasipa precionmanmi yapaykunqa pichqa parteman rakisqapa hukninta hinaspam kutichikunqa.

16 —Pipas huk kaqnin herencia chakranta ñoqa Tayta Diospaq sapaqchapuwaptinqa precionmi kanqa tarpunapaq muhu yaykusqanman hina.

Chakraman pachak iskay chunkan kilo cebada yaykuptinqa valenqa medio kilo masnin qollqem.

17 Sichu pipas sapaqchapuwanqa chakranta Jubileo Watapi hinaptinqa hina medio kilo masnin qollqellam chay precionqa kanqa.

18 Aswanqa sichu Jubileo Watapa qepantaña pipas chakranta sapaqchapuwaptinqa sacerdotem precionta churanqa.

Chay watamanta qallarispa Jubileo Watakama precionta churaspanmi bajanqa precionta.

19 —Sichu chay chakran sapaqchapuwaqniy reclamakuyta munanqa hinaspaqa precionmanmi yapanqa pichqa parteman rakisqapa hukninta hinaspam kutichikunqa.

20 Chay chakrapa dueñon mana reclamakuptinqa otaq huk runamanña rantikusqa kaptinqa manam reclamanmanñachu.

21 Sichu Jubileo Watapi chay chakra libre kaspaqa ñoqallapaqñam kanqa hinaptinmi sacerdoteña dueñon kanqa.

22 —Sichu pipas ñoqa Tayta Diosman rantisqan chakrata otaq mana herencian kaq chakrata sapaqchapuwaptinqa

23 sacerdotem chay chakrayoqpaq precionta churanqa Jubileo Watakama.

Hinaptinmi chay chakra sapaqchapuwaqniy runaqa chay punchawpuni sacerdotepa tasasqanman hina paganqa chaynapim chay qollqeqa ñoqa Tayta Diospaq sapaqchasqa kanqa.

24 Jubileo Watapiñam chay chakraqa kutiykunqa rantikuqnin runaman otaq chay herenciayoq runaman.

25 —Imakunapapas precion tasasqaykichikqa kanqa santuariopi pesoman hinam,

chay santuariopi pesoqa yaqa media onzam.

26 —Animalkunapa punta criankunaqa punta naceq kasqanraykum ñoqa Tayta Diospaq kanqa.

Chay animalkunataqa manam pipas sapaqchapuwanmanñachu.

Toro kaspa otaq carnero kaspapas ñoqa Tayta Diospam.

27 Animalkunapa chay punta kaq crian mana mikuna animal kaptinqa tasasqan qollqeman pichqa parteman rakisqapa hukninta yapaspanmi reclamakunqa.

Mana reclamayta atispanqa sacerdotepa tasasqan preciopim rantikurunqa.

28 —Sichu pipas kapuqninkunamanta ñoqa Tayta Diosllapaqña rakipuwanman runata otaq animalta otaq herencia allpanta hinaspaqa chaykunataqa manam rantikunmanchu nitaqmi reclamanmanchu,

tukuy chay rakisqakunaqa ñoqa Tayta Diosllapaqña sapaqchasqam kanqa.

29 Wañunanpaq sentenciasqa runataqa manataqmi pipas reclamanmanchu.

Chay wañunanpaq rakisqa runaqa wañuchisqamá kanqa.

30 —Ñoqa Tayta Diospaqmi kanqa kawsaykuna cosechamanta diezmoqa chaynataq frutakunamanta diezmopas.

Chaykunaqariki ñoqallapaqña sapaqchasqam.

31 Sichu pipas chay diezmomanta wakinta reclamayta munaspaqa reclamakunanpaqmi chaykunapa precionman yapaykunqa pichqa parteman rakisqapa hukninta.

32 —Vacamanta kaptin otaq ovejamanta kaptinpas sapa chunka animal yupasqamantam huknin kanqa ñoqa Tayta Diospaq.

Chay animalkunaqa diezmo kasqanraykum ñoqallapaqña sapaqchasqa kanqa.

33 Amam akllasqachu kanqa allin kaspapas otaq mana allin kaspapas,

chay animalkunaqa amataqmá cambiasqachu kanqa.

Cambiasqa kaspaqa chay diezmo animalpas hinaspa cambianapaq qosqa animalpas iskayninmi ñoqallapaqña sapaqchasqa kanqa.

Chaynaqa mana reclamay atinañam kanqa.

34 Israelpa mirayninkunapaqmi kay kamachikuykunata Tayta Dios qorqa Moisesman Sinai Orqopi.