Sacerdotekunapa pachanmanta
28
—Israelpa mirayninkunamanta akllaspayá Aarontawan churinkunata ñawpaqnikiman asuykachiy sacerdoteykuna kananpaq chaynapim sacerdoteykuna kanqa Aaronqa churinkunapiwan,
paypa churinkunam Nadab,
Abiu,
Eleazar hinaspa Itamar.
2 Wawqeki Aaronpaqmi rurapunki serviwananpaq pachakunata chaynapi ancha reqsisqa suma-sumaqllaña kananpaq.
3 Ninkitaqmi yachaywan huntachisqay llapallan maestrokunatapas,
paykunataqa ninki Aarompa pachanta ruranankupaqmi chaynapim Aaronqa kanqa sapaqchasqay sacerdote.
4 Rurananku pachakunaqa kaykunam kanqa:
pechera,
efod,
sotana,
bordasqa camison,
uma wankina hinaspa chumpi.
Serviwanankupaq pachakunataqa ruranqaku wawqeki Aaronpaqwan churinkunapaqmi chaynapi sacerdoteykuna kanankupaq.
5 Pacha ruraqkunam huñunqaku qorita,
morado qaytuta,
grosella qaytuta,
guindo qaytuta hinaspa lino kawpusqata.
6 —Chaynaqa efodtamá ruranqaku qorimanta,
morado qaytumanta,
grosella qaytumanta,
guindo qaytumanta,
lino kawpusqamanta suma-sumaq kuruyoqta.
7 Iskaynin hombronkunapim kanqa tirantekuna efodta huñunaspa hapinanpaq.
8 Efodpa hawanpi kaq watakupas huk piezallam kanan qorimanta,
morado qaytumanta,
grosella qaytumanta,
guindo qaytumanta hinaspa lino kawpusqanmanta.
9 —Onice sutiyoq iskay alhaja rumikunapa hawanpim Israelpa churinkunapa sutinta qellqachinki.
10 Qatinaslla nacesqankuman hinam soqtankupa sutinta huknin rumipi qellqachinki,
wakin soqtankupa sutintañataqmi qellqachinki huknin rumipi.
11 Sellokuna ruraq hinam Israelpa churinkunapa sutinta qellqachinki chay alhaja rumikunapi,
hapiqnintañataqmi qorimanta rurachinki.
12 Chay iskay alhaja rumikunatam churachinki efodpa hombronpa hawanpi chaynapi Israelpa mirayninkunata ama qonqarunaypaq,
chaynaqa iskaynin hombronpimá Aaron apanqa paykunapa sutinkunata hinaptinmi ñawpaqniyman apamuwaptin mana qonqasaqchu.
13 Chay rumikunapa hapiqninkunatapas rurachinki qorimantamá.
14 Hinaspam qori-puromanta simpasqa iskay cadenakunata rurachinki cordonman rikchakuqta hinaspam chay simpasqa cadenakunata hapichinki alhaja rumipa hapiqninkunaman.
15 —Efod rurasqankuta hinataqmi pecheratapas rurachinki,
chayqa kanqa suma-sumaq rurasqam qorimanta,
morado qaytumanta,
grosella qaytumanta,
guindo qaytumanta hinaspa lino kawpusqamanta.
16 Chay pecheraqa kanqa cuadradom chawpinmanta doblasqa,
tawa waqtankunam kanqa cuarto metrokama.
17 Chay pecherapa hawanmanmi hapichinki tawa seqe alhaja rumikunata,
punta kaq seqepim kanqa sardio,
topacio hinaspa carbunclo alhaja rumikuna.
18 Iskay kaq seqepim kanqa esmeralda,
zafiro hinaspa diamante alhaja rumikuna.
19 Kimsa kaq seqepim kanqa jacinto,
agata hinaspa amatista alhaja rumikuna.
20 Tawa kaq seqepiñataqmi kanqa berilo,
onice hinaspa jaspe alhaja rumikuna,
tukuy kaykunam sapakama qoriwan hapichisqa kanqa.
21 Chaynaqa Israelpa chunka iskayniyoq churinpa sutinkunaman hinam alhaja rumikunapas chunka iskayniyoq kanqa,
sellopi hinam sapakamapa sutin sapa rumipi qellqasqa kanqa chunka iskayniyoq ayllukunaman hina.
22 —Pecherapipas rurachinkitaqmi qori-puromanta simpasqa cadenakunata,
cordon hina rurasqata.
23 Rurachinkitaqmi qorimanta iskay anillokunatapas,
chaykunataqa pecherapa iskaynin puntankunamanmi churachinki.
24 Hinaspam pecherapa puntankunapi kaq iskaynin anillokunapi churachinki qorimanta iskay cordonkunata.
25 Iskaynin qori cordonkunapa puntankunatañataqmi churachinki onice alhaja rumipa iskaynin hapichiqninkunaman otaq efodpa tirantenkunapa ñawpaqnin lawman.
26 Iskay anillokunatawanmi qorimanta rurachinki,
chaykunatam pecherapa iskaynin puntankunaman churachinki otaq efodwan tupanakuq ukun law patanpi.
27 Rurachiytaqyá qorimanta iskay anillokunatapas,
chaykunatam churachinki efodpa iskaynin tirantenkunapa ñawpaqninpi otaq uran kaq costurapa hichpan efodpa watakunpa tumpa hanaychanpi.
28 Hinaspam morado qaytumanta cordonwan pecherapa anillonkunamanta hapichinki efodpa anillonkunaman chaynapim pecheraqa efodpa watakunpa hawanpi kanqa,
chaynapim pecherapas efodmantaqa mana kacharikunqachu.
29 Aaronmi sapa kuti “Chuya” sutiyoq lugarman yaykuspan qasqonpa hawanpi apanqa Israelpa churinkunapa chunka iskayniyoq sutinkunata,
juzgana pecherapi chay sutikunata ñawpaqniyman apamuwaptinmi mana qonqasaqchu.
30 Chay juzgana pecherapim churanki “Urim” sutiyoq rumitawan “Tumim” sutiyoq rumita,
chaykunatam Aaron qasqonpi apamunqa ñawpaqniyman.
Chaynatam Aaronqa siemprepuni qasqonpi apaykachanqa.
Chay rumikunawanmi Israelpa mirayninkunapaq ñoqa Tayta Dios arreglota rurasaq.
31 —Efodpa ukunpi kaq sotanatapas rurachinkimá,
chayqa kanqa enteronmi morado qaytumanta.
32 Sotanapa chawpinpim kanqa uma ustuchinapaq huk uchku,
chaypa muyuriqnin mana llikikunanpaqmi ponchopa uchkun hina ribetesqa kanqa.
33 Chay sotanapa uray muyuriq patanpim granadapa rurunta hina adornokunata rurachinki,
chaykunam kanqa morado qaytumanta,
grosella qaytumanta hinaspa guindo qaytumanta,
chay adornokunapa chawpinpiñataqmi qorimanta campanillakuna kanqa.
34 Puntatam churanqa qorimanta huk campanillata,
chaypa qepanmanñataqmi churanqa huk granadata,
chaypa qepanmanñataqmi churanqa qorimanta huk campanillata,
chaypa qepanmanñataq huk granadata,
chayna pawa-pawam kanqa sotanapa muyuriqnin patanpi.
35 Chay sotanawan pachakuspam Aaron yaykunqa ñoqapa ñawpaqniyman servicio ruraq,
chay campanillakunam uyarikunqa yaykuspanpas-lloqsimuspanpas mana wañurunanpaq.
36 —Qori-puromanta huk letrerotapas rurachispaykim chaypi qellqanki sellopi hina “TAYTA DIOSPAQ SAPAQCHASQA” niqta.
37 Chay letrerotaqa morado cordonwanmi uma wankinaman watanki,
watankiqa uma wankinapa urku lawnin kaqpim.
38 Chay letreroqa siemprem Aaronpa urkunpa hawanpi kanqa chaynapim Aaron cuentallikunqa Israelpa mirayninkunapa huchanmanta ñoqapaq sapaqchasqa ofrenda qosqankupi pantaruptinkupas.
Chay letrerom kanqa Aaronpa urkunpi tukuy tiempo chaymi ofrendankuta chaskisaq.
39 —Awachiytaqyá huk camisontawan huk uma wankinatapas.
Huk chumpitapas rurachinkim kuruyoqta.
40 Aaronpa churinkunapaqpas rurachinkimá camisonkunata,
chumpikunata,
uma watakunata chaynapi ancha reqsisqa suma-sumaqllaña kanankupaq.
41 —Chay pachakunawanmi wawqeki Aaronta hinaspa churinkunata pachachinki hinaspam paykunata aceitewan tallispa nombranki,
ñoqapaq sapaqchaptikim sacerdoteykuna kanqaku.
42 Paykunapaqmi rurachinkitaq linomanta calzoncillokunata chaynapi weqawninmanta moqonkama tapakunankupaq.
43 Chaywan hinakuspam Aaronqa churinkunapiwan yaykunqaku ñoqaman asuykuna karpaman,
hina chayna pachasqallam kanqaku “Chuya” lugarpi kaq altarman serviwanankupaq asuykuspankupas chaynapim paykunataqa huchankurayku mana wañurachisaqchu.
Kayqa wiñaypaq decretom kanqa Aaronpaq chaynataq mirayninkunapaqpas.