—Huk castigotawanmi Faraonman apamusaq chaynataq Egipto runakunamanpas,

chay castigokunapa qepantam kaymanta kachaykusunkichik hinaspam qarqorusunkichik qalay-qalayta.

2 Israel runakunamanyá nimuy qaripas-warmipas vecinonkumanta qori-qollqe alhajakunata mañakunankupaq.

3 Chaymi Egipto runakunawan Israel runakunata Tayta Dios favorecechirqa.

Moisespas ancha respetasqa runam karqa Egipto nacionpi,

respetasqataqmi karqa Faraonpa serviqninkunapa hinaspa lliw runakunapa ñawpaqninpipas.

4 Chaymi Faraonta Moises nirqa:

—Tayta Diosmi kaynata nin:

“Chawpi tutatam ñoqa lloqsimusaq Egipto nacionpa chawpinta.

5 Hinaptinmi Egipto nacionpi lliw piwikuna wañunqa,

tronopi tiyaq Faraonpa piwi churinmanta qallarispa maraypa ladonpi tiyaq sirvientapa piwinkama,

wañunqataqmi llapa animalpa piwinpas.

6 Hatun waqaymi kanqa lliw Egipto nacionpi,

chayna waqayqa manam haykapipas karqachu manataqmi haykapipas kanqachu.

7 Ichaqa lliw Israelpa kaqninkunataqa manam pipas imananqachu runatapas nitaq animaltapas.

Chaynapim yachankichik Egipto runakunamanta Israel runakunataqa Tayta Dios sapaqchasqanta” nispa.

8 Faraontam Moises nirqa:

—Llapallan serviqnikikuna ñoqaman hamuwaspanmi ñawpaqniypi qonqorakuykuspa niwanqaku:

“Lloqsiy llapallan qatisuqniki runakunapiwan” nispa.

Chaymantañam lloqsisaq.

Chaynata rimaruspanmi Moises lloqsirqa Faraonpa ñawpaqninmanta llumpay piñasqallaña.

9 Chaymantam Moisesta Tayta Dios nirqa:

—Faraonqa manam kasusunkichikchu,

chaynapim Egipto nacionpi milagroykunata achkayachisaq —nispa.

10 Moisespiwan Aaronmá tukuy chay milagrokunata rurarqaku Faraonpa ñawpaqninpi.

Ichaqa Faraonpa sonqonta Tayta Dios rumiyarachiptinmi Israelpa mirayninkunata Egipto nacionmanta mana kacharirqachu.