MAJIBꞌAL RE RI KꞌAKꞌ TESTAMENTO PA TZIJOBꞌAL KꞌICHEꞌ
We wuj riꞌ, ri kꞌo pa ri aqꞌabꞌ are waꞌ ri utzij ri Dios chawe xuqujeꞌ are utzij ri Dios chike konojel ri winaq cho ri uwachulew. Ri Dios xuꞌkoj kꞌi winaq chutzꞌibꞌaxik we tzij riꞌ. Ri Dios xuꞌkoj winaq ri jaljoj taq keꞌl wi xuqujeꞌ jaljoj taq kibꞌiꞌ. Konojel we winaq riꞌ xkitzꞌibꞌaj we tzij riꞌ pa ri kitzij xuqujeꞌ jetaq ri kenaꞌw aꞌreꞌ chubꞌanik, are waꞌ ri tzij ri xraj ri Dios xkitzꞌibꞌaj. Rumal kꞌu cher jaljoj taq winaq ri xetzꞌibꞌanik jaljoj jutaq bꞌiqꞌ xbꞌan chutzꞌibꞌaxik jetaq ta ne kebꞌ winaq kamik ri kakitzijoj jun jastaq ri xkꞌulmatajik, jaljoj jubꞌiqꞌ kakibꞌan chutzijoxik rij jun xkꞌulmatajik. Qas tzij kꞌu riꞌ ri kakitzijoj we utz kakibꞌan chutzijoxik. Rumal riꞌ kaqilo chi jaljoj jubꞌiqꞌ bꞌantal chutzijoxik ri xkꞌulmatajik. Ronojel ri Tyox laj Wuj ta kꞌu are Ojer Testamento o Kꞌakꞌ Testamento xtzꞌibꞌax kumal jaljoj taq winaq pa sibꞌalaj kꞌi junabꞌ, ri mayijabꞌal jastaq are chi junam ri xkitzijoj. Are waꞌ ri tzij ri kutzijoj chi ri Dios kujuloqꞌaj xuqujeꞌ are karaj chi kꞌo jun qariqoj ibꞌ rukꞌ Areꞌ rumal kꞌu cher jewaꞌ karaj kakꞌulmatajik rumal riꞌ ri Dios xukoj jaljoj taq tzijobꞌelil xuqujeꞌ kꞌambꞌejabꞌal noꞌj rech jeriꞌ xul ri utz laj tzij qukꞌ. Ri Ojer Testamento xtzꞌibꞌax nabꞌe pa ri tzijobꞌal hebreo. Are kꞌu ri Kꞌakꞌ Testamento xtzꞌibꞌax pa ri tzijobꞌal griego, e kꞌo xuqujeꞌ jujun wuj che ri Kꞌakꞌ Testamento ri xtzꞌibꞌax pa arameo xuqujeꞌ pa latin. We wuj riꞌ xwi ri Kꞌakꞌ Testamento kꞌo chupam. Kaqayeꞌj chi pa jun janipa qꞌotaj kaqꞌaxax na ri Ojer Testamento pa ri atzijobꞌal. Jaljoj taq wuj ri qꞌaxatal pa juleꞌ taq tzijobꞌal chik xkojik chuqꞌaxaxik ri utz laj tzij pa ri kꞌicheꞌ tzijobꞌal. Ri rayibꞌal kꞌuꞌx are re we wuj riꞌ are chi kaqꞌaxax ri qas kꞌo loq pa ri ojer taq wuj rech jeriꞌ kachomatajik jas jeꞌ ri qas kꞌo loq pa taq ri ojer wuj. Man kꞌo ta jun ojer wuj ri tzꞌibꞌatal ojer chikixoꞌl we kꞌo qukꞌ kamik. We uwach wuj kꞌut riꞌ are waꞌ we kꞌo qukꞌ kamik are waꞌ ri kꞌa te xbꞌanik xesax loq pa ri ojer taq wuj ri kꞌo ojer taq tzꞌibꞌatalik chupam. Katzijox xuqujeꞌ chupam sibꞌalaj kꞌi jastaq rech ojer ri man qetaꞌm ta uj uwach kamik.
1. Kꞌo jun tzukubꞌal tzij ri kuqꞌalajisaj sibꞌalaj kꞌi paj tzij ri man kakoj ta ronojel qꞌij kamik. Kꞌi chike we tzij riꞌ xeqꞌaxax pa taq ri tzijobꞌal ri kakoj kamik jacha ta ne ri tzijobꞌal ojer ri xkikoj ri winaq are xkitzꞌibꞌaj ri Kꞌakꞌ Testamento, we tzijobꞌal riꞌ are waꞌ ri katzijobꞌexik xuqujeꞌ kachomatajik xa kꞌu kamik kꞌo tzij chike ri pune kakojik xa kꞌu man kachꞌobꞌotaj taj jas kel kubꞌij jacha ta ne ri tzij “Kaxa rech ri chꞌekom tzij” ri kel kubꞌij “Cofre del Pacto” pa kaxlaꞌn tzij. We tzij pa ri tzijobꞌal kꞌicheꞌ kubꞌij jas kel kubꞌij ri tzij riꞌ. Ri tzij ri kojtal pa ri tzukubꞌal tzij kojtal jun la retal rech jeriꞌ kariq ri kel kubꞌij ri tzij.
2. /…/ Are taq kawil we juchꞌ riꞌ chirij jupaj tzij kel kubꞌij chi ri jupaj tzij riꞌ man kꞌo ta pa ri ojer taq wuj ri xtzꞌibꞌaxik, pune jeriꞌ xkꞌam uqꞌabꞌ xkoj pa taq ri wuj ri ukojom loq ri komontyox ojer. Kꞌi che we tzij riꞌ kariqitaj pa ri Wuj Reina Valera.
3. Ri tzij ri esatal pa ri Ojer Testamento ri yaꞌtal pa ri Kꞌakꞌ Testamento kꞌo bꞌantal tzalatzik taq tzꞌibꞌ che jacha te ne ri Mateo 1:23. Are ri Dios kꞌo qukꞌ, are waꞌ ri kariqitaj pa Isaías 7:14.
4. Kꞌo xuqujeꞌ alaj taq nitzꞌ juchꞌ jacha we jun riꞌ.
We riꞌ kel kubꞌij chi kꞌo jupaj tzꞌibꞌ chuchiꞌ ri uxaq wuj ri kel kubꞌij jawjeꞌ kꞌo wi jupaj tzij o are ne kutzijoj rij naqꞌatajibꞌal ri man kakibꞌan ta chi ri winaq kamik.
5. Chirij ri tzukubꞌal tzij kꞌo nikꞌaj tzukubꞌal kꞌolibꞌal rech kukꞌutu jas ubꞌanik ri kꞌolibꞌal jawjeꞌ ri xkꞌulmataj wi ri utzij ri Dios.