San Lucas
¿Tayta Diosga pobricunapita maschu cuyan rïcucunata?
¿Ollgucunatachu warmipita mas cuyan?
¿Pitaj isquirbiran? Lucas caran juc mëdicumi. Paypis apóstol Pablutami purëshiran (Col. 4.14). Lucas isquirbisha San Lucas y Hechos de los apóstoles nishan libruta. Payllami mana Israel runaga isquirbisha bibliacho caycaj libruta.
¿Picunapätaj isquirbiran? Lucasga cay librucunata isquirbiran rispitashan amïgun Teofilupämi (Luc. 1.3). Griego rimaycho Teófilo caycan «Tayta Diosta cuyaj» ninanmi. Teofilupis caran mana Israel runami. Chaymi cay libroga mas caycan Tayta Jesucristuman yäracoj mana Israel runacunapaj.
¿Imaytaj isquirbiran? Waquin yarpan Jerusalenta juchuchishanpitaraj isquirbishantami. Chay caran wata 70 d.C.
¿Imataj caycan cay librucho? Lucas munaycan amïgun Teófilo Jesuspita «rasun cajta» musyanantami (1.1-4). Achca partitami Mateo y Marcos isquirbishannölla Lucaspis Jesuspa bïdanta isquirbisha. Ichanga waquin particunata yapaycan. Chaycunataga pay mayacachar estudyaran. Chaymi Lucasga Mateopita masta niycan Jesús imanöpis yurishanta (1–2). Chaycho niycan Bautisaj Juan yurishanpäpis. Chaynöpis Jesuspa unay famillyancunapa jutinta isquirbir niycan Jesuspis Adanno Tayta Diospa wamran cashanta (3.38). Runacunami ichanga yarparan Josëpa wamran cashanta (3.23).
Jesuspa waquin yachachicuynincunaga cay librullachömi caycan. Mas rejsishanchi caycan cuyacoj taytapita yachachishan (15.11-32) y cuyapäcoj juc-lä runapita yachachishanpis (10.25-37). Juc-lä marca runacunatapis Tayta Dios cuyashantami Lucas musyachicuycan. Chaymi cay librucho tarinchi achca juc-lä runacuna agradësicushanta (17.11-18). Chaura «pobricunapäga mushoj alli willacuymi» caran (1.51-53; 4.18; 7.22). Cay alli willacuy caycan «ogracasha» caycajcunapämi (19.10). Paycuna caran impuestuta cobrajcuna (19.1-9), «pobricuna», mancucuna, cöjucuna y gapracuna» (14.13; 16.19-31), Samaria runacuna (10.25-37; 17.11-19) warmicunapis (7.36-50; 8.2, 3; 10.38-42).