Agbugba a unfu ku Abachi wa
16
1 Mre ingga wo ukorr unkpi zhi nu uki ku umi ku Uki Unkpi ku Ibarr Abachi ku.
Ukorr ku u ko re na abitu atangba ba ba da di,
“Kuma ku ka agbugba atangba ka nggo a tsarr ssu nu unfu ku Abachi ku kahre ni ingbingbru yi.”
2 Unitu uni ime̱me̱ wa à kuma na ku ka agbugba ama wa a kahre ni ingbingbru yi.
Ankpa ankpinkpi ka vri kakami a ssuzzu ku abangga ba nggo a se na angba a ininazzu wa na kuttu na gbyarr ku ankpunkpru ama wa asa nggo.
3 Unitu a Abachi unu uha wa à ka agbugba ama wa kahre ni inyi unkpi wa.
Amasirr wa a kaki nâ ta si ayiyi a unushirr wa nggo a ttu nggo.
Inyarrki i so tsitsirr i amasirr yi i kɨ wemi.
4 Unitu unu utarr wa à ka agbugba ama wa à kahre ni ihagbu yi tuku na amasirr ka nggo a so ssuzzu zhi ni imimi nggo.
Amasirr ka a kaki ayiyi.
5 Ingga wo unitu wa nggo a so di kye amasirr ka a da di:
“Ibre amu imuwa yi ima ma,
ùwà nggo se ziza tuku ùwà nggo i se ni ikuchi,
ùwà Uni wre wa.
6 Nu nggo anishirr a ka ayiyi a anishirr ba Abachi ba tuku abi kpa are ba kahre,
Ùwà nu ba ayiyi di a bu so.
A kpa inkindirr yi nggo à zha nggo.”
7 Ingga i wo ukorr u zhi na akikre ka to ka da di,
“Yo-o,
Atiko Abachi Uni Inkpinkpye we wa,
ibre amu imuwa yi i si jiji ni ma ma.”
8 Mre unitu nu ne̱ wa à ka agbugba ama wa kahre na azhi wa.
Aba a kpanye ku na du ma à tu anishirr nu uru.
9 Irrirri uru yi u tu ba.
Aba a marr Abachi nggo à se nu ukyekye na tu iha inggi yi we.
Aba a kà,
uyirr mi à si ba ttungo ni ila ure ima yi na nu Abachi inkpinkpye ima yi hen.
10 Mre,
unitu nu kywi wa à ka agbugba ama wa a surr ni imburr ittu i ininazzu yi,
igbu ittu ima yi i kaki ibwu.
Anishirr ama ba a ta irrirri ku ivri yi nggo si kakami,
11 na marr Abachi nu unkplassu ku ivri tuku ankpa ambarr ka.
Na si kasarr ni ina imbarr yi hen.
12 Unitu nu tani wa à ka agbugba ama wa à kahre ni inyi unkpi nu Yufretu wa.
Inyi wa à gbu kre,
wre ba bu ssu anko bi ku atuttu ba nggo a ta nga zhi na anza ambre.
13 Ingga hi anazhi andanda atarr a zzu nâ ta si anigbahru.
A ssuzzu zhi na angu ka ìwǎ drago wa,
tuku na angu ka ininazzu wa,
tuku angu ka uni kpa are uni imu wa.
14 A si anazhi andanda nggo a di na aseki ka ikagri.
Anazhi atarr angga ba a ssuzzu kuma na atuttu ba kago ingbingbru yi we.
A ta ku gri ba nggurr bi ku iku na azhibarr ankpi a Abachi Uni Inkpinkpye we wa.
15 Kye nggo Kristi a da di,
“Kye,
ingga nggo i so nga nâ ta si unayi nggo!
Abachi à ta yo angu azizi ku uwanggo nggo à ti so gbye anko,
na abangga ba nggo a ssu inkinkru imbarr yi bi,
i ta wre aba bu si zirr ni ihorr,
ishisha i ki ba na anishirr ba ba hen.”
16 Anazhi ba a gri atuttu ba nga ni nggurr bi na abubo wa nggo a yo wa ni irrirri i Ibraniya di Amagedo.
17 Mre unitu nu tangba wa à ka agbugba ama wa a kahre nu unddunddu.
Ukorr unkpi u zhi ni imburr ittu yi nu uki ku umi ku Uki Unkpi ku Ibarr Abachi ku da di,
“A kre ba.”
18 Mre abubo wa a ri inge̱ nzarrnzarr,
ni yi ngbungbru,
abubo wa battu kakami.
Bazhi nu nggo a na unushirr mu a nise hi ibattu imimi nâ ta si inggi yi.
Uwanggo yo a si ibattu ndanda kakami yi.
19 Igbu unkpi wa a nggarr ki anga atarr.
Igbu i anishirr abi ingbingbru ba i kaki ndanda ni kuhre.
Abachi à ssu hi ila ure i Babilo ukyekye wa,
na du ìgbù wa a so ahi a unfu kakami wa nu umplango umaku.
20 Igbu yi nggo amasirr a ka yi yo na atsutsu nggo i ka nado we.
Igbigbu yi wemi i ka nado meme.
21 Angbinta ka ahru nggo a lɨ kakami nggo a kuhre zhi nu unkplassu na atu a anishirr.
Anishirr ba a marr Abachi ku agbre angbinta ka ahru ka.
Iha yi i si ndanda kakami.