Ayamba wa tuku ìwǎ drago nggo se na aza
12
1 A hi inkindirr i ku ayisurr inuma nu unkplassu.
Ayamba à surr azhi a la wa ki ankru,
uhwa ku u se ku na aza,
na turr anzɨ ittu ni itu nggo a na wa ni intsintse̱ iwurr ni iha.
2 Ayamba wa à ki ywhiywhirr ingri,
na so yì ine yi kakami.
3 Inkindirr inuma i nggurr ssuzzu nu ussu.
Kye,
ìwǎ dragoa ususarr unkpi ku a se na atu atangba,
injinju iwurr,
na hru anzɨ tangba na atu ama wa wemi.
4 A ki azzuzzu ama wa a gba anga ayirr na anga atarr ka intsintse̱ yi zhi nu ussu ku ji nga ni imimi.
Ìwǎ drago wa à kri na so kye,
wre ku ayamba wa à ti ngri,
uwa à ta ba uvuvurr wa ttumri.
5 Ayamba wa à ngri uvuvurr unuru,
nggo à taka gri ingbingbru anishirr yi we na anjingba ka ittu.
Aba narr uvuvurr wa glo ma,
a ba ma gri ku Abachi ku sa ni ittu ima yi.
6 Ayamba wa à kru rri na ankpuji.
À kru kuma na abubo wa nggo Abachi à ssu wa bi ku nggo.
A ta di ssu ma gri ki ivi ukrɨ uyirr na ayiyirr aha ni so tani (1,260).
7 Iku i gru nu unkplassu.
Makyarrb na abitu ama ba à tsi ni ìwǎ drago wa ku.
Ìwǎ drago wa mi à gri abitu ama ba na tsi.
8 Nu nggo a ri ìwǎ drago wa ni iku yi nu unkplassu.
Ima yo du ba a han ma na abitu ama ba nu unkplassu.
9 Aba han ìwǎ drago unkpi wa ji nga ni imimi.
Uwa yo à su uchuche ìwǎ ku nggo ri Umimi ka Isheta,
nggo à re ingbingbru yi wemi nggo.
A ta ma na abitu ama ba we ji nga ni ingbingbru yi.
10 Ingga gru wo ukorr hantu zhi nu unkplassu u da di:
“Ziza nggo inta hi ikpa ttungo nu ukyekye,
ni ittu i Abachi amunta wa
tuku ukyekye ku Kristi ama wa.
Kye uni kri angbachi na amuya abiga ba ba,
nggo uwa yo à kri di glo amuya amunta ba na age̱ ka Abachi na azhi ni ibittu,
a ta ma ji nga ni ingbingbru yi.
11 Aba a kpa ma ka
na ayiyi a Uvuvurr Inkru wa
tuku ure ujiji ku Abachi ku na kri ngbangba du ure ku Abachi ku u su ujiji.
Na a kpanye da
aba a ta ni atu ambarr wa na kɨ.
12 Uwa a si ni ima yo,
imba unkplassu ku,
ni imba nggo i so na ku nggo,
imba bu nyarr!
Uwa ta si ingbingbru yi tuku amasirr ka nanko,
uje umba,
nu nggo Isheta à ka ji nga ni imba ba ba,
nu unfu kakami,
nu nggo à hi di ivi i ma yi i ji ntsɨmi.”
13 Nggo ìwǎ drago wa à hi di a turr ùwà ji nga ni ingbingbru yi,
mre na gru so han ayamba wa nggo à ngri uvuvurr unuru wa nggo.
14 Aba a nu ayamba wa angba ka bwa aha ka ankpa ankpi,
nggo a ta bwa share ku ìwǎ drago wa kuma na abubo ama wa na ankpuji wa.
Nabo yo a ta ku ssu ma gri zizi ki ase atarr ni inkpu,
nggo ìwǎ drago wa à si ta hi ma hen.
15 Ìwǎ drago wa à ta amasirr ssuzzu na angu nâ ta si inyi nggo.
Na zha da amasirr wa bu gu ayamba nado.
16 Imimi yi i zi ayamba wa,
ni gburr amasirr wa nggo a ssuzzu na angu ka ìwǎ drago wa ttumri.
17 Ìwǎ drago wa à ki unfu na ayamba wa ku,
na kuma du uwa a ta ku ta iku na ahinhan abanu ba ayamba ba ba,
abangga ba nggo a di kru isisu i ure ku Abachi na di kri ngbangba da aba sa abi Yesu.
18 Ìwǎ drago wa kri nu ugbuhun nu unddu inyi unkpi ku.