Are ka nggo a charr ku abiga ba ni igbu nu Sadi
3
1 Ugo nggo ingga hi à ddu ingga di,
“Charr ku unitu a abiga ba nu uni ku nggurr bi ku Abachi ku ni igbu nu Sadi.
Charr di,
“Uwanggo yo a su ure ku nggo u zhi nu uwanggo nggo a hru izhi itangba i Abachi yi tuku intsintse̱ itangba yi.
Ingga hi inkindirr yi nggo ùwà so na yi nggo.
Anishirr ahi ùwà kago na kye du ùwà so tsitsirr,
meme mi ùwà si iku mu.
2 Ùwà bu kasi,
ni vu ivi inkindirr yi nggo i ni ji ku ùwà gri ngbangba,
kye yi ta ko ttu.
Ingga kye hi di uzirr muwa ku u klonyarr na age̱ ka Abachi mungga we.
3 Uwa si ni ima yo,
ùwà bu si kpamusu ni inkindirr yi nggo ùwà i wo ni inta ba ni kpa yi hen.
Ùwà bu na inkindirr yi nggo are ka da di ùwà bu na,
ni ba ttungo ni ila ure imuwa yi.
Ùwà ti si kasi hen,
ùwà si ta hi inga mungga yi hen.
Ingga i ta nga nu ùwà ku nâ ta si unayi nggo.
4 “Ni igbu nu Sadi mi,
abanu a se ni imba nggo a si kpurr iki isurr imbarr yi ki ndanda ni ina umimi hen.
A ta zirr ni ingga ku ni iki ikikla,
nu nggo a ma i na meme.
5 Undurr wa nggo ti ba nggurr,
aba ta surr ku iki ikikla yi meme.
Ingga si ta ttu isa ima yi glo nu ungbamvu ku nggo a charr asa a abi so tsitsirr ba hen.
Na ashishi ka Aki amungga wa,
na abitu ama ba,
ingga ta da ssuzzu di à sa amungga.
6 Uwanggo nggo à ti se na atu ka iwo,
uwa bu wo inkindirr yi nggo Izhi yi i so da ku abiga ba na aki ka nggurr bi ka Abachi ka.”
Are ka nggo a charr ku abiga ba ni igbu nu Filadefiya
7 Ugo wa à ddu ingga di,
“Charr ku unitu a abiga ba nu uki ku nggurr bi ku Abachi ku ni igbu nu Filadefiya.
Charr ba di,
“Uwanggo yo su are ka uwanggo nggo a su uni wre wa na su ujiji nggo gri inkpe̱ i ibwu anko i Doda yi.
À ti bwu,
undurr ka si ka ttu hen,
uwa ti kattu,
undurr ka si bwu hen.
8 Ingga hi inkindirr yi nggo ùwà di na yi nggo.
Kye,
ingga bwu anko zu ku ùwà,
undurr ka si ka wa a ttu kpa hen.
Ingga hi di ùwà ni sha su ukyekye,
ni so ga inkindirr yi nggo ingga tsarr ùwà nggo.
Ùwà si kisa di ùwà i si hi ingga hen.
9 Wo,
a ta si abanu ba nggo a ga Isheta wa nggo,
abi ki imu abama nggo a bre gigyemi di aba si ani Yahuda,
anishirr abangga ba nggo Abachi à hla ba,
ingga ta turr gbigbi du ba nga ni kuttu ku ùwà,
na ta hi wemi di ingga kpanye nu ùwà ku.
10 Nu nggo ùwà wo ure mungga ku u du ùwà kri ngbangba,
ingga ta kri ùwà sharri ni ivi ndanda yi nggo i so nga ni ingbingbru yi,
nye tsarr anishirr ba wemi kye nggo.
11 “A ji ntsɨmi ingga i nga.
Vu inkindirr yi nggo ùwà se na yi nggo gri zizi,
wre ku undurr bu si vu ùwà kpa anzɨ amuwa wa hen.
12 Undurr wa nggo ti ba nggurr,
ingga ta na ma ki angga anggo nggo a ta vu Uki ku Ibarr ku Abachi amungga ku gri.
Uwa si taka ttu ku ttungo hen.
Ingga ta charr isa i Abachi amungga wa na ku,
ni ta charr isa i Urushalimaa uhe̱he̱,
ìgbù a Abachi amungga wa nggo a so ji zhi nu unkplassu na Abachi amungga wa ku nggo,
ni ta charr isa ihe̱he̱ imungga meme nu ukpa umaku.
13 Uwanggo ti se na atu ka wo ure,
uwa bu wo inkindirr yi nggo Izhi i da ku abiga ba na aki ka nggurr bi ka Abachi ka.”
Are ka nggo a charr ku abiga ba ni igbu nu Lawodikiya
14 Ugo wa à ddu ingga di,
“Charr ku unitu a abiga ba nu uki ku nggurr bi ku Abachi ni igbu nu Lawodikiya.
Charr ba di,
“Uwanggo yo su ure ku nggo u zhi nu uwanggo nggo à ri ‘Du yi si meme yo,’
b wanggo nggo à di tsarr ujiji ku Abachi yo,
nggo uwa yo su uni ime̱me̱ wa nu umi ku aseki ka nggo Abachi à na.
15 Ingga hi aseki ka nggo ùwà na ka nggo,
ùwà si sù hen,
ni si ssu hen.
Ingga zha du ùwà ka sù ka ssu.
16 Nu nggo ùwà si nâ ta si amasirr latata nggo ni si ssu hen,
ni si su hen,
ingga mi ki ywhiywhirr ke̱ ùwà ssuzzu na angu amungga ba.
17 Ùwà da di,
‘Ingga si ni inklo,
ni se na aseki shishemi,
ni si zha inkindirr chankarr hen.’
Ùwà si hi du ùwà si ni iha,
ni sama ni inkindirr hen,
ni si na kreshishi ni zirr ni ihorr.
18 Ni ima yo ingga nu ùwà amarr ùwà bu re izinarriya ni ingga ku,
u izinarriya ku nggo a tu ku nu uru,
wre ku ùwà bu se nu ungo jiji.
Ùwà bu re iki isurr ikikla,
wre ku ùwà surr yi ni ttu ku itu muwa ishisha i inkpohorr muwa yi.
Ùwà bu re ahun ni ingga ku surr na ashishi,
wre ku ùwà bu kye hi zizi.
19 “Ingga di glo ni nggurr uwanggo nggo ingga kpanye na ku mu nggo.
Ùwà mi bu nggurr ssu ni kasarr ni ila ure muwa yi.
20 Kye!
Ingga kri na angu ankonki ni so du di a bu bwu ki ingga anko wa.
Unu ti wo ukorr mungga na bwu ki ingga,
ingga ta mirri ni ri na ku,
uwa mi à ta ri ni ingga ku meme.
21 “Undurr wa nggo ti ba nggurr,
uwa mi à taka hun so ni ingga ku ni imburr ittu mungga yi,
na ti nggo ingga mi i ri iku yi ni i hun so na Aki amungga wa ku ni imburr ittu ima yi.
22 Uwanggo à ti se na atu ka wo ure,
uwa bu wo inkindirr yi nggo Izhi yi i da ku abiga ba na aki ka nggurr bi ka Abachi ka.”