Imba si du ba re imba mi hen
4
1 Akpukpamburr,
abi kpa are abi imu shishemi a ga rri ni ingbingbru inggi yi.
Ni itu ima yo imba bu si kpanye ni izhi tankpa hen.
Tsarr izhi yi kye ni hi ka i zhi izhi si na Abachi ku.
2 Kye uwanggo yo sa anko wa nggo uwa ta hi Izhi i Abachi yi.
Izhi yi nggo ti kpanye krizhizhi mi di Yesu Kristi a nga ni inina ikpa,
Izhi ima yi si i Abachi.
3 Izhi yi nggo ti kisa di Yesu Kristi à si nga ni inina kpa hen i si si Izhi i Abachi hen.
Ima i si izhi i uni karr Kristi yi nggo a ka da ki imba ba di i so nga,
ziza nggo à se ni ingbingbru inggi yi.
4 Amarr mu,
imba zhi na Abachi ku ni si anishirr ba Abachi,
ni ka ba ingbingbru inggi yi nggurr ba,
wanggo nggo à se nu umi umba ku à mri wanggo nggo se ni ingbingbru inggi nu ukyekye.
5 A si abi ingbingbru ba,
na re nâ ta si nggo abi ingbingbru ba di re,
abi ingbingbru ba di shirr ba atu.
6 Inta si anishirr ba Abachi,
u abangga ba nggo a hi Abachi à di shirr ki inta atu.
Undurr wa nggo à ta si si Abachi hen,
uwa si di shirr ki inta atu hen.
Na anko ama,
inta di hi izhi yi nggo si ijiji ni izhi yi nggo si i imu.
Abachi kpanye ni inta ba, inta mi kpanye na Abachi ku
7 Imba akpukpamburr,
di inta kuchi ni ikpanye ni ikpa,
nggo inta hi di ikpanye di zhi si na Abachi ku.
U undurr wa nggo à ti kpanye na anishirr ba,
uwa à su uni ngri a Abachi na hi Abachi.
8 Undurr wa nggo à ta si di kpanye na anishirr ba hen,
uwa à si hi Abachi hen,
nu nggo Abachi yo si ikpanye.
9 Abachi à tsarr inta ikpanye ima yi nu nggo à tu Uzuma ingbre iyirr à nga ni ingbingbru yi,
wre ki inta bu so tsitsirr ni itu ima yi.
10 Uwanggo yo a si ikpanye ijiji,
Abachi nggo à kuchi kpanye ni inta ba na ni inta Uzuma wa di a bu nga ni to itu ima wre ku bu sarr inta ttungo ni ila ure imunta yi bari,
inta mi gru kpanye na ku.
11 Amuya,
Abachi ti kpanye ni inta ma mi,
uwa à si inkindirr i iwre inta bu kpanye na atu munta wa meme.
12 Undurr nise hi Abachi na ashishi kye.
Inta ti kpanye ni ikpa Abachi à rri so nu umi umunta i ikpanye ima yi i tsarr ssu ni inta ba.
13 Abachi a ni inta Izhi ima yi du yi ki angba wa nggo a tsarr di inta so na ku uwa a so ni inta ba.
14 Inta i ka hi na ashishi ni ka da na angu amunta ba di Aki wa à ni Uzuma wa na du ma a su uni kpa ingbingbru wa ttungo.
15 Undurr wa nggo ti da di Yesu à su Uvuvurr a Abachi,
uwa a se na Abachi nu umi umaku,
u undurr wama so nu umi ku Abachi.
16 Inta i ka hi ni yo isisurr kakami ba di Abachi à kpanye ni inta ba.
Abachi à si ikpanye.
Abangga ba nggo a so nu umi ku ikpanye i Abachi yi,
a so nu umi ku Abachi,
Abachi so nu umi umbarr ku.
17 Inta ti kpanye ni ikpa jiji ni so nâ ta si nggo Kristi à so ni ingbingbru inggi yi,
inta si ta se ni isisu na azhibarr ibre amu wa hen.
18 Unto ku nggo ikpanye i Abachi yi se,
isisu i di sama,
nu nggo ikpanye i Abachi yi nggo ittu aseki ka pempe i di han isisu.
A si iha nggi i di du unushirr ki isisu,
ni itu ima yo ikpanye i si di na aseki ku kre nu umi ku unushirr wa nggo a se ni isisu hen.
19 Inta i so di kpanye ni kpa nu nggo Abachi yo a kpanye ni inta ba kuchi.
20 Nggo inta ti da di inta kpanye na Abachi ku,
ni kà uzayirr uniga,
inta i si abi ki imu.
Nggo inta ka si kpanye na Abachi ku nggo,
inta nise hi ma kye,
nggo inta ta si kpanye na abanu nggo inta hi ba hen.
21 U Abachi à ni inta ure ku nggo u da di:
“Abangga ba nggo kpanye na Abachi ku,
i si gbigbi mu di a bu bi kpanye na amuyirr meme.”