Iso ku Abachi
4
1 Nu nggo Kristi à ki iha nggo,
imba mi bu gbyarr ukpa umba ku na amarr angga ka nggo a si nâ ta si ka Kristi ka nggo à ki iha nu ukpa.
Undurr wanggo à ti ki iha,
undurr uwama à ka ba ttungo ni ila ure ba.
2 Ta ukpa ni na inkindirr yi nggo Abachi nggo à zha di imba bu na yi,
ni du ma ni na umimi ku nggo inina ikpa imba yi i zha.
3 Ni ikuchi yi imba i so di na aseki ka abangga ba nggo a si hi Abachi hen.
Ni ima imba i di rri so ni ila ure ni di kurr ni ikpa ku,
ni izharr aseki,
ni iso ahi,
ni ga ankla ka irro,
ni ika ttudu na ahi,
ni ina aseki ka nggo a kye ka ki azhi.
4 I ziza nggo abangga ba nggo a si hi Abachi hen,
a ta ku ayisurr nu nggo imba i si ga ba ni na aseki ndanda akama zizo hen.
Ima yo i du ba a marr imba.
5 Ni ina imbarr ima,
aba mu a taka ku zha inkindirr yi nggo a taka da ku Abachi nggo chankarr.
Uwa yo à taka bre amu ka ku abi so tsitsirr na abi kɨ ba.
6 Uwa a si ni ima yo aba a bre ku abi kɨ ba Ure ku wre ku.
Inkindirr yi nggo a na,
ima yo i gri ba ittu,
aba kɨ nâ ta si nggo anishirr a di kɨ nggo.
Inina ukpa imbarr yi i kɨ,
Abachi à zha di izhi imbarr yi bu so sese.
7 Ikikre i aseki ka wemi ki ywhiywhirr ba.
Ni ima yo,
imba bu han kye zizi ni vu atu amba gri,
wre ki imba bu hi ibarr Abachi.
8 Inkindirr inkpi inggi i si di imba bu kpanye ni ikpa imba yi kakami.
Ikpanye ni ikpa iyo i di ka ila ure shishemi ttu nado.
9 Kpa amuya abiga na ako amba wa ni si re ngbungbru hen.
10 Abachi à ka ga ini na nkanka a ni imba ba,
na undu ni ini aseki na nkanka ima,
nggo a ni ku uzizi ni na ku abanu undu na yi.
11 Uwanggo nggo à ti si ni ini ibre ku anishirr ure ku Abachi,
uwa bu bre are ka Abachi.
Uwanggo nggo à ti si ni ini ina undu,
uwa bu na undu ku nu ukyekye ku nggo Abachi à nu ma nggo,
wre ku anishirr a bu gbyarr ku Abachi asa ni itu i Yesu Kristi nggo inkpinkpye tuku ukyekye a si ama sese.
Du yi si meme yo.
Iki iha na ti abiga a di ki yi nggo
12 Akpukpamburr abiga,
si ku ayisurr ku itsarr kye nu uru yi nggo imba i so hi yi hen.
Si kye di inkindirr yi nggo imba i so hi yi ziza nggo i si ihe̱he̱ hen.
13 Imba bu nyarr mi kye,
nu nggo imba mi i yo ungo ni ki iha yi na ti Kristi à ki yi nggo.
Meme nggo imba taka me̱ nyarr na azhibarr wa nggo Yesu à taka kanga,
anishirr a taka hi ma ni inkpinkpye tuku ukyekye umaku.
14 Anishirr a ti ki imba iha nu nggo imba si abiga Kristi,
Abachi à ta yo ki imba angu ka iwre.
Ima yo i ta du imba i hi di Izhi i inkpinkpye yi nggo i si Izhi i Abachi i so ni imba ba.
15 Undurr ni imba ba ati ki iha,
uwa bu si si di undurr wama à ki iha yi di a ngu undurr mu,
ka à ki ayi,
ka à zha are,
ka à yo angu ama na are ka abanu mu hen.
16 Uwa a ti si di uwa i ki iha nu nggo uwa i si uniga,
uwa bu si du ishisha i ki uwa ku ima hen.
Meme nggo uwa bu gbyarr ku Abachi asa nu nggo a yo uwa ki a Kristi.
17 Ziza nggo yo,
a ta ba ibre amu yi zhi na anishirr ba Abachi ba ba.
Ibre amu ima yi i ti bazhi ni inta ba,
aba a ta na kingginggi na anishirr angga ba nggo a si kru isisu i Ure ku wre ku Abachi ku hen?
18 A charr nu ungbamvu ku Abachi ku di:
“A ta si inkindirr i tsɨ kakami aba kpa unushirr uzizi ttungo,
aba a ta na kingginggi na abi la ure na abanu ba nggo a si kru isisu i Abachi nggo hen?”
19 Ni ima yo,
abangga ba nggo Abachi mu kpanye na du ba a ki iha nggo,
a bu vu atu ambarr wa a ni uwanggo nggo à na ba nggo,
na si di kasarr hen,
na bu si ba ttungo ni na uzizi hen.