Ungbamvu ku nggo à charr ku
Anu Ibraniya ba
Uvuvurr wa à mri abitu ba Abachi ba
1
1 Ni ikuchi ngbangba yi,
Abachi à re na akiki amunta ba ba na angu ka abi kpa are ba na anko ka tankpami.
2 Uwa a ta si ni ivi ikikre inggi yi,
Abachi à so re ni inta ba nu Uzuma wa ku.
Abachi à na ingbingbru yi zhi nu uwa yo ku.
Ni ikikre yi Abachi à ttu uwa yo di a bu gri aseki ka wemi.
3 A di hi inkpinkpye i Abachi yi nu Uzuma uwa yo ku.
Uwa yo à di du inta i hi di Abachi à si ki ngginggi.
Uwa yo so gri aseki ka we nu ukyekye ku ure umaku.
Nggo Uzuma wa ngla ila ure yi glo ku anishirr na ku ji so nu ungo ri ku Abachi Unkpi nu unkplassu wa.
4 Abachi à du Uzuma wa à mri abitu ama ba nâ ta si nggo isa yi nggo Abachi à yo ku Uzuma wa nggo,
i mri isa i abitu bu unkplassu ba.
5 A si ni ima yo Abachi à si ddu unitu ama numa di,
“Ùwà yo su Uzumu mungga,
ari ingga kaki Ati muwa” hen.
a
Abachi à si ddu unitu unuma di,
“Ingga i ta su ku uwa Aki,
ùwà à ta su ki ingga Uzumu” hen.b
6 Nggo Abachi à ta tu Uzuma ni ime̱me̱ ama wa nga ni ingbingbru yi na da ku abitu ama ba wemi di,
“Abitu ba Abachi ba wemi a ta kuttu na gbyarr ku asa.”c
7 Uwa ta si ni itu i abitu ba,
Abachi à da di,
“Ingga i ka abitu ba ki unddunddu,
ni ka amirr iko amungga ba ki irrirri i uru.”d
8 Ni itu i Uzuma wa Abachi à da di,
“Ùwà Abachi,
ittu imuwa yi ì ta so ku ùwà ase na ase.
Ùwà bu hru anishirr muwa ba narrnarr.
9 Ùwà di zharr aseki azizi,
ni karr aseki amimi.
A si ima yo du ingga Abachi amuwa wa,
i ttu ùwà
ni nu ùwà inkpinkpye inggi yi nggo i du ùwà ì si ni inyarr mri abu ka amuwa ba.”e
10 A charr zizo na angbamvu ka di,
“Ni ime̱me̱ yi,
Ùwà Atiko,
i na imimi,
ni na unkplassu ku na ango amuwa.
11 Aseki akama a taka gru ka nado,
uwa ta su ùwà na anko,
ùwà so iso inggi.
A taka ngla kre na ta sa ankru.
12 Ùwà taka vu ba chi nâ ta si ikpo ankru nggi.
Ùwà ta sarr ba nâ ta a sarr ankru ngga.
Uwa ta su ùwà na anko,
ùwà so so inggi meme yo,
ùwà ta so sese.”f
13 Abachi à si ddu unitu ama unuma di,
“Ji so nu ungo ri umungga bi
nggo ingga taka ka abi karr ùwà ba ka
ki ku ùwà inkpu imburr i sa aza” hen.g
14 Abitu ba sa abata ngga?
Abitu ba wemi a si izhi yo nggo a di nga ni zi abangga ba nggo a taka kpa ba ttungo nggo.