4
1 Nggo Yesu taka nga nye gri anishirr ama ba nâ ta si uttu,
uwa taka ni bre ku abi so tsitsirr ba na abi kɨ ba amu.
Ni ima yo,
na age̱ ka Abachi tuku Kristi Yesu ingga ko da ku ùwà di
2 ùwà bu bre ure ku Abachi ku.
Ka ivi yi ti wre ka i ti si indanda,
ùwà bu tsarr ba umimi umbarr ku,
ni kisa ba ni ila ure imbarr yi,
ni du ba a vu isisurr.
Na meme ni ivu isisurr,
ni so di tsarr ba ndindi.
3 Ivi i taka nga nggo anishirr a ta kà iwo itsarr izizi yi,
na ta zha iwo inkindirr yi nggo abangga a kye di wre ba nggo.
A ta ga abitsarr tankpami,
aba a ta tsarr ba aseki ka nggo a zha di aba a ta wo ka nggo.
4 A ta kà iwo ure ujiji ku,
na ta shirr atu na wo are ka imu.
5 Ùwà na anko a ti so na meme,
ùwà bu vu itu imuwa gri.
Vu gri ni iha,
ni na undu ku uni bre Ure ku wre ku,
ni na indu yi wemi nggo abi na ku Abachi undu ba a di na nggo.
6 A ti si ingga nanko,
ivi imungga yi i ma ba a so ba ingga a ni nâ ta si ininazzu ni to,
nggo a ka ba a to ba.
Ivi i kuma imungga yi i ma ba.
7 Ingga i tsi wre,
ni kru ukru ku ku kre.
Ni kri karrkarr ni iga yi.
8 Ziza nggo a zu ki ingga azadi ka ibwa cha ka nu nggo ingga zirr uzirr ku nggo wre ku Abachi.
Atiko wa yo su Uni bre amu ujiji wa à ta turr ki ingga anzɨ na azhibarr ankpi a ikanga ama wa.
A si si ingga na nkpamu mu taka turr anzɨ wa hen,
abangga ba nggo so di gbye ikanga ima yi mi a taka turr ba na wa meme.
Ure uzizi ni itu i abiga Abachi ba
9 Ùwà bu ta ukpa ni nga ni ingga ku korr.
10 Dima à kà isisurr ima yi ka ko na aseki ka ingbingbru ka,
na ka ka ingga du ba,
na kuma nu Tesalonika.
Krese à kuma nu Galatiya,
u Titu à kuma nu Dalimatiya.
11 Luka yo so ni ingga ku na nkpama.
Ùwà bu zha Marrku gri ki ingga.
À ta ni zi ingga nu undu ku nggo Abachi à ni ingga nggo.
12 Ingga i tu Tikiku kuma nu Afisa.
13 Ùwà ti taka nga,
ùwà gri ki ingga ankru arire ka ttu umvru ka.
Ingga i ka kà du nu Karrpu ku nu Torrowa.
Ka vu angbamvu ka charr ka kye.
Si kpamusu ni inggakpaa yi nggo ingga charr na yi nu ungo hen.
14 Alezanda uni la ankpu inklo wa à na ki ingga inkindirr indanda kakami.
Abachi mu à taka nu ma azadi ama ka.
15 Na ni bu kye ma,
nu nggo à kri karrkarr na varr ure ku Abachi ku nggo inta i gri ku kakami.
16 Undurr a si chi ki ywhiywhirr na zi ingga ni ibre amu ime̱me̱ yi hen.
A ga nado na kà ingga du.
Ingga so barr da Abachi bu si glo ba ku ina ima yi hen.
17 Atiko wa à si kà ingga du hen.
Uwa yo à ni ingga ukyekye ku nggo ingga ibre ure ku ni inggya wemi ku abangga ba nggo a si si ani Yahuda hen.
Uwa yo à kpa ingga ttungo na angu ka iche.
18 Atiko wa si ta du inkindirr numa imimi i vu ingga farr hen,
na ta gri ingga nga zizi mi nu unkplassu,
nggo a su Uttu.
Nyarr ku sese.
Du yi si meme yo.
Ichi ikikre yi
19 Chi ki ingga anu Priskila tuku Akila na abi iko i Onesiforru ba.
20 Irrasitu à ka so nu Korrintiya.
Trofimu à sama nu ukpa ukyekye ingga i ka ma du nu Miletu.
21 Ta ukpa ni nga ni ingga ku bari ikɨ yi ka ma.
Anu Yubulu tuku Pudeni,
u Linu tuku Klawudiya a di ingga bu chi ùwà.
Amuya abiga abanu ba mi a so chi ùwà meme.
22 Ingga barr di Abachi bu zi izhi imba yi.
Ni barr di Abachi bu na wre ki imba we.