2
1 Imba ka hi nggo ingga i so cha ukpa kakami ni itu imba na anishirr bu Lawodikiya ba tuku abangga ba nggo a nise hi ingga kye.
2 Ingga i so na meme,
wre ba bu gru kri gbangba na bu kpanye ni ikpa imbarr yi kakami.
Na bu hi Kristi kakami.
Ihi imbarr yi i bu du ba a yo isisurr kakami.
Meme nggo,
aba a ta hi Kristi wa ni itu ima,
nggo Abachi a ssu ma zu sharri ba nggo.
3 Abachi à ka sha ihi tuku ukrizhizhi umaku wemi sharri nu umi Kristi ku.
4 Ingga ko da ki imba ni ima yo di imba bu si du undurr a re imba mi na are ka imarr iwo hen.
Are akama a ti marr ki nggi mi imba si wo ka hen.
5 Nu nggo imba i si so hi ingga na ashishi mi hen,
izhi imungga yi i so ni imba ba.
Ingga i nyarr kakami nu nggo ingga i hi nggo imba i ko zirr ndindi,
nu nggo imba ka zirr,
tuku nu nggo imba so kri gbangba ni iyo isisurr imba yi nu Kristi ku.
Imba bu so meme yo ni Kristi ku
6 Nu nggo imba i kpa Kristi Yesu ki Atiko amba,
imba bu nggurr atu bi ni zirr na ku.
7 Surr injinja imba yi nu umi ku Kristi ku rri kuma nu umi,
ni na uwa yo ki uni du imba tsitsirr wa.
Kaki kyekye ni iga imba yi nâ ta si nggo a bre ki imba nggo.
Imba bu di nyarr ttuttumi ku Abachi.
8 Si du undurr a na imba ki agarr na re imba na are ka marr iwo,
nggo anishirr ngga gri ka zhi na amarr ambarr hen.
Itsarr yi nggo i zhi na amarr ka unushirr,
ni zhi nu umimi wa nggo a so gri ingbingbru inggi yi nggo,
ni si zhi nu Kristi ku hen.
9 Aseki ka we nggo a sa ka Abachi à so nu Kristi ku we nggo a so nu ukpa ku unushirr.
10 Abachi à ni imba iso ijiji nu nggo à gri imba ni nggurr bi ni Kristi ku nggo.
Kristi yo à gri ukyekye ku ihru atuttu ni ingbingbru yi.
11 Kristi a ttu imbwimbwe ndanda imba yi nggo i di du imba ila ure nggo a glo,
nâ ta si nggo a yo ku uvuvurr nggo iji na sha inina ikpa glo ku nu ukpa.
12 A zzu imba na amasirr wa nggo,
uwa a si na ta a zzu imba ni ibe mu ni Kristi ku,
na gɨ imba gru na ku meme ki ahe̱he̱.
Imba i kpanye di Abachi a se nu ukyekye ku nggo u gɨ Kristi gru ni ibe yi nggo.
Ima yo i du Abachi a gɨ imba gru nu Kristi ku ki ahe̱he̱.
13 Ila ure i du imba kaki aku,
ni si si anishirr ba Abachi hen.
Abachi à du Kristi ka imba ki atsitsirr,
na nggurr ila ure i imba yi zhi we.
14 Kristi à kpurr uhla ku ila ure ku nggo a charr zu ki inta azhi.
Na vu ila ure ima na share ku ukpa nu unkunkurr ku nggo a klo ma nggo.
15 Nu unkunkurr ukuma yo i Kristi a tsi na vu ankpinkpye na atuttu bi ingbingbru angga ba anggurr.
A bri kago na ba na du anishirr a kye ba na ta a di na ku agarr nggo a vu ba ni iku nggo.
16 Uwa a si ni ima yo imba si du undurr mu a bre ki imba inkindirr yi nggo imba ta ri ni so hen.
Ni si du undurr mu a da ki imba ivi yi nggo i si i Abachi hen.
Ni iga yi nggo imba na yi nu uhwa uhe̱he̱ ku tuku Azhibarr a Isu ani Yahuda wa hen.
17 Aseki akama wemi a si iyu mu i aseki ka nggo a taka nga ni ichi nggo.
Inkindirr ijiji yi inggi i si Kristi.
18 Si du undurr wanggo a di na chě ni imu mi,
na di kuttu ku abitu ba Abachi ba ngga ki Abachi ama wa,
imba bu si du undurr uwama re imba na di imba i ssu azadi amba ka hen.
Unushirr ni na meme wa à di ga angba ssu na abubo gigyemi.
Isisurr ima yi nggo i si ni izhi ndanda i di du ma a si ssu na amarr ndanda.
19 A si di nggurr bi na ampu ukpa a Kristi wa zizo hen.
Uwa yo a si itu ikpa yi we,
na di ssu nu ukpa ku we ni inina ikpa yi na achi ka gri ni inkla iyirr zizi,
na du ukpa ku so furr nâ su nggo Abachi à zha nggo.
Iso tsitsirr ihe̱he̱ ni Kristi ku
20 Imba i ka ttu ni Kristi ku ba,
ziza a ka kpa imba ttungo na ango ka anazhi ba nggo a so hru ingbingbru yi nggo,
anggi mu i du imba i na aseki ka ingbingbru ka nggo ddu imba di:
21 “Si sa ungo ni inggi hen!
Si la inggi yi kye hen!
Ni si vu inggi yi gri hen!”?
22 A ti na undu na aseki angga ka,
aseki akama a sama nu undu zizo.
A si are ka tsarr iso nggo anishirr ngga a na ka,
imba i cha ukpa na ka da angginggi?
23 A zzu na ti iga are angga ka inggi i si inkindirr izizi yi nggo unushirr a bu na.
A zzu na ti iga are akama i di du unushirr a kpanye na Abachi ku mwe ma,
na si chě,
na si ttu ukpa ttungo na na aseki tankpami hen.
Are ka tsarr iso akama a si si nu ukyekye ku han inta ni na aseki amimi ka nggo inta di zharr na ka nggo hen.