Ungbamvu ku nggo Bulu à charr ku
Anu Galatiya ba
Bulu à chi abiga ba nu Galatiya
1
1 A si ingga Bulu,
uni ko na angu.
À si ingga yo i charr ki imba ungbamvu unggo ku.
A si si anishirr ngga a yo ingga na tu ingga nu undu ku Abachi ku hen.
A si Yesu Kristi mu tuku Abachi Aki wa,
nggo à gɨ Yesu gru ni ibe yi nggo,
aba yo a yo ingga na tu ingga nu undu ku Abachi ku.
2 Ingga na amuya abiga ba wemi ni inggya,
inta i chi imba abiga ba nggo a ga so nu igbu i Galatiya yi we.
3 Inta i so barr Abachi nggo uwa yo à si Aki amunta wa,
ni so barr Yesu Kristi nggo uwa yo su Atiko amunta wa,
di a bu na wre ki imba na bu ni imba isu isisurr.
4 Yesu Kristi à wo ku Abachi,
Aki amunta wa na ba itu ima yi a ni ku ila ure imunta yi,
wre ku a bu kpa inta ttungo ku ila ure i ingbingbru na ase amimi angga ka.
5 Ni ima yo,
inkpinkpye yi bu so ku Abachi sese.
Du yi si meme yo.
Ure ku wre ku Kristi ku ù su uyirr yo
6 Imba i di ingga i ku ayisurr nu nggo ziza nggo yo,
imba i kpamusu na Abachi wanggo nggo a yo imba ku uzizi ku Kristi ku nggo,
ni ka ku so ga itsarr inuma mu.
7 Jiji mu,
itsarr ima nggi i si si Ure ku wre ku hen.
Ingga i hi anishirr abanu ngga a nga ni so na imba ki a kahirr,
na so zha da aba ta ba Ure ku wre ku Kristi ku a kasarr.
8 Inta mi,
ka unitu a Abachi nggo à zhi nu unkplassu nggo,
inta ti bre ki imba itsarr ihe̱he̱ ni ka i ime̱me̱ yi du,
Abachi bu du undurr ma ki iha ase na ase.
9 Ingga i ka da ki imba ba,
ni so da zizo di,
Undurr ti ni bre ki imba Ure ku wre ku Yesu unuma mu nanka nu unggo ku nggo imba i wo ni kpa ni inta ba nggo,
Abachi bu du undurr ma a ki iha ase na ase.
10 Imba ta kye di ingga i ko re meme,
wre ku anishirr ngga bu kpanye nu ure umungga ku.
Iya!
Ingga zha di Abachi nggo a bu kpanye ki ingga.
Imba i kye di ingga ko zha di anishirr ngga bu hi ingga kakami?
A ka du uwama yo a si amarr amungga ka,
ingga ka si ba itu imungga i ni ku undu ku Kristi hen.
Nggo Bulu a na na kaki uni ko na angu ka Kristi nggo
11 Di ingga da ki imba amuya abiga,
Ure ku wre ku Kristi ku nggo ingga i bre ku anishirr nggo,
a si si unushirr mu a na ku hen.
12 Undurr nggo a si ni ingga na ku hen.
Undurr a si tsarr ingga na ku hen.
A si Yesu Kristi nggo ku itu ima a bwu ku tsarr ingga.
13 A da ki imba iso imungga yi ni ikuchi yi.
Nu nggo ingga i ni di si ni iga i anu Yahuda yi kakami ingga i di ki abiga Yesu ba iha kakami ku iga imbarr yi.
Ingga i kri karrkarr di ingga ta kà iga i Yesu yi nado.
14 Ingga i ku ku ani Yahuda a bu ka mungga ba shishemi i chi ni iga imunta i anu Yahuda yi.
Ni i yo itu kakami ni na aseki ka nggo akiki amunta a di na ka nggo.
15 Uwa a si Abachi mu a na wre ni ima na ttu ingga zhi nu umi ine mu,
na yo ingga ku ina wre ima yi ki ni na undu uma.
Abachi a tsarr
16 ingga Uzuma wa,
wre ki ingga bu ka bre Ure ku wre ku ni itu ima yi ku abangga ba nggo a si si ani Yahuda hen.
Ingga i si ku zha amarr nu undurr ku bari ni kpa undu ku hen.
17 Ingga i si kuma nu Urushalima ku zhi abi ko na angu ba nggo a ku ki ingga i chi hen.
Ingga i tsi kuma na anga ka Arrabiya bari ni kanga ni igbu nu Damasika.
18 Mre ingga i ki ase atarr bari ni kuma nu Urushalima di ingga ta ku hi Biturr,
ni ku kuso na ku ki ivi iwurr ni kywi.
19 Ingga i si hi uni ko na angu numa hen.
Ingga i hi Yakubu,
uzayirr a Atiko Yesu wa yo mre.
20 Inkindirr yi nggo ingga i charr nu ungbamvu unggo ku Abachi à hi di a si ure ujiji na si si ire̱ are hen.
Ingga i si so da gigyemi hen.
21 Ingga i sha so na ku ni gru kuma ni igbu i Sirriya tuku Silisiya.
22 Na attuttu akama abiga Kristi ba nu Yahudiya a si hi di ingga i su unggonggo hen.
23 A wo si are ka nggo anishirr mu a bre ni itu imungga.
Anishirr ba a bre di:
“Ugo nggo à so ki inta iha ku iga yi nggo,
uwa nggo à di bre ku anishirr ure ku iga yi nggo uwa yo à di zha anko du uwa à ta ngu yi yo nggo!”
24 Aba a wo na gbyarr ku Abachi asa ku inkindirr yi nggo a na ki ingga nggo.