11
1 Imba bu ga uzirr mungga ku nâ ta si nggo ingga so ga uzirr ku Kristi.
Anko ka iga Abachi
2 Ingga di nggurr anke̱ ni imba,
nggo imba so di ri amarr amungga ni di ga itsarr yi nggo ingga tsarr imba nggo.
3 Ziza nggo ingga zha di imba bu hi di Kristi nggo a si itu i aniru we,
unuru nggo si itu i ayamba.
Abachi nggo a si itu i Kristi yi.
4 Ingga ko da di,
unuru wa nggo à ti ko barr ka,
ka da ure ku Abachi ku na ttu inkindirr ni itu uwa gri ki itu ima ishisha.
5 Ayamba wa nggo ti ko barr ka ta da inkindirr yi nggo si ni ichi na si ttu itu ima yi hen,
uwa gri ku uruma nggo uwa yo si itu ima yi ishisha.
Ina ima i si iyirr nu nggo à kurr itu ima yi.
6 Ayamba nggo à ti si ttu itu ima yi hen,
uwa bu kurr yi glo.
Ikurr yi ti si ku inkindirr ishisha,
uwa bu zha inkindirr a ttu yi.
7 A na aniru du ba zzu Abachi,
wre ba bu gri ku Abachi inkpinkpye.
Ima tsarr di i si wre u unuru bu lo inkindirr ni itu hen.
Na a na amba,
wre ba bu kru isisu aniru.
8 A na ayamba zhi nu unuru ku,
na si na unuru zhi na ayamba ku hen.
9 A si na unuru nggo ku ayamba hen.
A na ayamba nggo ku unuru.
10 Ni itu i abitu aba Abachi ba,
i wre ayamba bu lo inkindirr ttu itu ima yi.
Ima yo ta tsarr du unuma a se ku ni ichi.
11 Nu nggo inta kpanye na Atiko ku,
ayamba ka si so ku itu ima sama nu unuru hen,
ka unuru ka si so ku itu ima sama na ayamba hen.
12 A su ure ujiji nggo a da di a na ayamba a ime̱me̱ wa zhi nu unuru ku.
Ayamba nggo ngri inkpu aniru yi.
Meme mi,
Abachi nggo na aseki ka we.
13 Zhi itu muwa yi kye,
a si inkindirr i wre ayamba bu barr Abachi sa ni lo inkindirr ni itu?
14 A si ina i Abachi mu di i ta si inkindirr ishisha unuru bu gri infunfutu irire sama ni ikurr yi.
15 Infunfutu irire i wre ku ayamba na su ku inkindirr i iga angba.
Abachi à nu ayamba na yi ki inkindirr i ttu ku itu.
16 A so na meme kago na aki ka nggurr bi ka Abachi ka.
Ima yo di ingga da du unu bu si ri anta ni itu i inkindirr yi nggo ingga da hen.
Inggurr bi na Agbugba a Atiko
17 Ziza,
imba di ingga tsarr imba ure unggo ku.
Nggo imba ti nggurr bi ni ibarr yi,
imba di na ndanda mi mri ina zizi,
ima yo du ingga ka si gbyarr ki imba asa hen.
18 Inkindirr ime̱me̱ yi,
ingga wo di nggo imba ti nggurr bi imba di ga ki na nkanka nu aki ku ibarr Abachi ka.
Ingga hi di inkpu are yi nggo ingga wo a sa are ajiji.
19 Ingga i hi di iga akpa ta se ki imba,
wre imba bu hi abangga ba nggo a ko ga anko a Abachi wa jiji.
20 Nggo imba ti nggurr bi nggo,
imba si di ri si Agbugba i Atikoa ayo jiji hen.
21 I si meme yo nggo imba ti ko ri,
imba si di kri bi ikpa hen.
Abanu di kakuma ni iyo,
abanu di ri na so hwa.
22 Imba sama na ako nggo imba ka ri ni so hen?
Imba kpa iko i Abachi inggi chirr?
Imba zha di imba ta du ishisha ki abi iha abangga?
Ingga ta da ki imba angginggi?
Ka ingga ka gbyarr ki imba asa?
Iya!
Ina imba ima ka si di ingga gbyarr ki imba asa hen.
23 Ingga i kpa itsarr inggi yi nggo ingga so di ni imba zhi na Atiko ku.
Ni ibittu yi nggo a vu Atiko wa Yesu re,
uwa ba unfonfo,
24 na nyarr ku Abachi na mɨ ma,
na da di,
“Uwanggo yo su ukpa mungga ku nggo a ni ni itu imba.
Imba ri ni ka bu ri amarr mungga.”
25 Nggo a ri kre,
i Yesu ba ukucha ku a gri nu ungo na da di,
“Uwanggo yo sa ayiyi mungga wa,
nggo Abachi a shi azhi ama ahe̱he̱ ka ki imba.
Nggo imba ti so wanggo,
imba di na meme,
wre ki imba ka bu ri amarr mungga.”
26 Nggo imba ti ta unfonfo wa,
ka imba ti ta ko so nu ukucha ku,
nggo imba so da si ittu i Atiko iyo ka ma na azhibarr a ikanga ama wa.
27 Imba ti ta unfonfo wa ni so ugbyarr unkunkurr ku na anko wa nggo si wre ku Abachi hen,
imba kpala ku ukpa tuku ayiyi a Atiko wa.
28 I wre imba bu tsarr isisurr imba yi kye bari ni ta unfonfo wa ka ni so nu ukucha ku.
29 Undurr wa nggo ti ri na so na si hi da a su ukpa ku Atiko hen,
uwa ta gri ku itu ima iba.
30 Ima yo i gri ki inkpu imba yi ulolo,
abanu ka ko su ukpa,
inkpu shishemi i kɨ.
31 Nggo inta ti kye atu munta wa bari ni ri,
Abachi si ta ttu inta iba hen,
nggo inta ri na agbugba ama wa.
32 Nggo Abachi ti ttu inta iba na tsutsarr inta mi,
uwa di na meme,
wre ki inta bu si ka kɨ nâ ta si inkpu anishirr bi ingbingbru ba hen.
33 Meme yo,
amuya nggo imba ti nggurr bi ni iri yi,
imba so bi inkpu yi du ba nga bari imba ri ndo.
34 Undurr wa nggo ti hi di iyo ta ku ki ma,
uwa bu ri shi ni iko bari na kuma,
wre ku imba bu si gri unfu ku Abachi nga ku itu imba hen.
Nggo ingga ti nga,
ingga taka ni bre ki imba inkpu are yi.