Abiga di gri ikpa imbarr na ko na aki ka ibre amu
6
1 Uniga à ti kpala ku uzayirr uniga,
angginggi han ba ni gri ikpa ambarr yi kuma na abiga ba?
Kye nggo imba di gri akpa ni kuma na abi bre amu bi ingbingbru ba nggo a si hi Abachi hen.
2 Imba si hi da abiga aba yo a taka bre ku ingbingbru yi amu hen?
Imba ti taka bre ku ingbingbru yi amu,
i iku so ni hla are ntsɨntsɨ angga ka,
ka mri imba?
3 Imba bu hi di inta i taka bre ku abitu ba Abachi ba nu unkplassu amu.
Ni ikikre yi imba bu hi di inta se nu ukyekye ku bre amu na atu a aseki ka nggo anishirr so na.
4 Imba ti se nu ure,
angginggi i du imba ba ku ni kuma na abi bre amu abi ingbingbru ba ba,
nggo abiga ba si di kye ba ssu nu ungo hen?
5 Ingga da ure kuma wre ki ingga bu ni imba ishisha.
Imba kye undurr sama nu umi umba nggo ka hla ku abiga ba ure?
6 Imba kye ina imba yi bari,
uniga à gri uniga na kuma na abi ingbingbru ba,
di a bu ku bre ba amu.
7 Ure ku nggo si di,
imba ti gri ikpa ni kuma ni ibre amu,
ina ima i tsarr di imba ka sarr uza ba.
Angginggi ka han imba ni ki ango kpa ikpala i abanu.
8 Nggo imba ka kpanye ni du abanu mu a na ki imba ndanda,
uwa si imba yo mi ka ko na ku abanu undanda ni ka abubo mri kye na amuya abiga ba mi.
9 Imba mi si hi da abi na ndanda ba si ta rri ni ittu i Abachi yi hen?
Imba si du ba re imba hen.
Abi na ntankpa,
abiga anazhi,
na abi kurr ìga,
na aniru bi na zzu amba,
na aniru bi kurr na aniru ba,
10 na abayi,
na abi kri angba ichi,
na abi hwa ahi,
na abi ki amparr,
na abi ka anishirr mri,
anishirr abama a si taka rri ni ittu i Abachi yi hen.
11 Abanu nu umi umba ku,
a di si meme yo ni ikuchi yi.
Ziza nggo,
isa i Atiko munta wa Yesu Kristi ndo nu ukyekye ku Izhi i Abachi ku à ngla imba na ttu imba zu ku atu amba nanka,
ki inkindirr i ikpanye na age̱ ka Abachi.
Gri ukpa umba ku zizi
12 Abanu nu umi umba ku a di da di,
“Ingga ka na inkindirr yi nggo ingga zha.”
Ni ima mi,
a si si aseki ka wemi mu nggo a wre ina hen.
“Ingga ka na inkindirr yi nggo ingga zha.”
Ni ima mi,
ingga si ta du inkindirr i vu ingga gri ki ugarr hen.
13 Imba di da di,
“A na ila ku umi ine umunta ku yo,
na na umi ine ku ku ila.”
Di ingga da ki imba,
Abachi taka ka ba glo aha mi.
A si da a bu di zɨ iki nu ukpa ku hen.
Na ku Atiko wa undu nu ukpa umuwa ku.
A si Atiko nggo a nu ukpa ku inkindirr yi nggo u zha.
14 Abachi nggo a ta Yesu Kristi si na taka ta inta mi si nu ukyekye umaku meme.
15 Imba si hi di ukpa umba ku u si ankpu kpa a Yesu Kristi mu hen?
Imba kye i wre ingga bu gri ukpa ku Kristi ku kuma ku nggurr bi nu unddunddu ayamba ku?
Iya!
16 Imba si hi di undurr wanggo nggo ti kurr nu unddunddu ayamba ku,
uwa mi à kaki ukpa uyirr na ku meme hen?
A kurr ni icharr nu ungbamvu ku di,
“Aba aha mi a ta kaki ukpa uyirr.”
17 Unushirr wa nggo ti nggurr itu ima bi na Atiko ku,
undurr uwama à kaki izhi iyirr ndo na Atiko ku.
18 Amuya,
duma ni ikurr ìga tankpami.
Ila ure inuma yi we nggo anishirr a di na i di si na abi ka ukpa ku unushirr.
Uwa a ta si izha amba nanko i si ikpala ku ukpa umba ku.
19 Imba bu hi du ukpa umba ku si uki ku Abachi mu i Izhi i Iwre yi di rri so.
Abachi a ni imba Izhi ima yi,
imba bu si kye di imba so ku atu a imba mu hen.
20 Nggo imba hi da Abachi à re imba ri re mu na han.
Imba bu kru isisu i Abachi nu ukpa umba ku.