Izɨ iki yi nggo abiga ba so na
5
1 A so di bre ki ingga izɨ iki yi nggo abanu nu umi umba ku so di na.
Di imba di na ndanda mi mri anishirr ba nggo si hi Abachi hen.
Du uvuvurr à kurr na ayirr iko ma ku.
2 Imba so ga angba!
Angginggi i du imba si so yi ni vri isisurr hen?
Angginggi han imba ni ttu uni na meme wa ka nu umi ku inggurr itu bi imba yi?
3 Nu nggo ingga si se ni imba ba nu ukpa mi hen,
ingga se ni imba ba ni izhi yi.
Ingga i ka bre amu ku uni na meme wa ba,
zzu di ingga i se ni imba ba nabo.
4 Nggo imba ti nggurr bi ni isa i Atiko munta wa Yesu,
i izhi imungga yi i di se ni imba ba ndo nu ukyekye ku Yesu ku.
5 Imba ka undurr wama nu Isheta du ma tsutsarr inina ikpa ima ila ure yi,
wre ba ka kpa izhi ima yi ttungo na azhibarr a ikanga a Atiko wa.
6 Iga angba imba yi si wre hen.
Imba si hi nu nggo a ti sha ivi iyistia ntsɨmi surr ni imbimbru ikpu i di kpa yi si hen?
7 Imba kà iyisti ikuku ila ure wa yi,
wre ki imba bu so sama na abla.
Meme nggo,
imba ta si nâ ta si unfonfo uhe̱he̱ wa nggo na ma sama ni iyisti.
Ingga hi imba mi si meme yo.
Uvuvurr inkru uni to ankpurr a Iga i Ivu Sarr munta wa su Kristi nggo a ka han ma to ba.
8 Meme yo,
inta bu na Iga i Ivu Sarr yi sama ni iyisti ikuku yi,
nggo si umimi tuku ila ure.
Di inta na iga yi nu unfonfo wa nggo a na ma sama ni iyisti.
Ina ima inggi si iso krikri ni da ure jiji.
9 Nu ungbamvu mungga ku,
ingga da ki imba di imba bu si nggurr itu bi na abangga ba nggo a si di ga uzirr ku ako munta hen.
10 Ingga si so re ni itu i anishirr ba ingbingbru ba nggo a si di zirr uzirr ku ako munta hen,
abi di zharr inkindirr ba ma,
na abi di de anishirr kpa aseki,
na abi di kuttu ku ankpunkpu aseki ka nggo anishirr ngga na.
Imba ti zha di imba ta du anishirr abama,
imba taka du ingbingbru yi bari.
11 Ingga ko charr da ki imba di imba bu si nggurr itu bi nu uwanggo nggo yo itu ima ki uniga Yesu na ka so di na ntankpa,
ni kurr ìga,
nu wanggo nggo à di kri angba ichi,
nu wanggo nggo à di na anazhi,
nu wanggo nggo à su na amparr,
nu wanggo nggo à di so ahi na hwa,
nu uwanggo nggo à di ka anishirr mri.
Imba bu si ji so ni ri ila na ku hen.
12 Anggi mu ta du ingga bre ku aba abi amu?
Inta si ta bre ku abiga mu amu hen?
13 Abachi mu à ta bre ku aba abi ba amu.
Uwa ta su ure ku Abachi ku nanko,
u da di,
“Imba bu han amimi ba ka nu umi umba ku.”