2
1 Amuya aniru na amba,
nggo ingga i nga ni imba ba,
ni di bre ki imba ure ku Abachi ku,
ingga si di re imba na are ka iwre iwo ka ihi i unushirr hen.
2 Nggo ingga di se ni imba ba,
ingga na isisurr mungga yi ki iyirr ni di bre ki imba are ka Yesu Kristi kayo nggo a kpa ma nu unkunkurr ku nggo.
3 Ni ime̱me̱ yi ingga i su ukpa ni di na ni isisu ni wri kpakpa.
4 Nggo ingga ti ko re ni imba ba ingga si di zha di ingga ta gba imba nu ungbrengbre mu hen.
Ingga di du Izhi i Abachi yi mu bu tsarr imba ukyekye umaku.
5 Ina ima yi i ta di imba yo isisurr nu ukyekye ku Abachi ku,
na si si ni ihi i unushirr mu hen.
Ihi i Abachi yi
6 Inta di na undu ni ihi nggi ni re na anishirr ba nggo a ka kuyi ni iyo isisurr imbarr yi ba.
Ihi inggi yi si zhi ni ingbingbru inggi yi ka na atu ba ingbingbru ba nggo ukyekye umbarr ku di kre hen.
7 Inta bre ki imba ni ihi yi nggo i zhi na Abachi ku nggo aba a zu yi sharri,
bazhi nu nggo a nise na ingbingbru yi.
Abachi à na yi wre ku inkpinkpye munta.
8 Uyirr mi nu umi ku atuttu bi ingbingbru ba a si hi yi hen.
Ka da a hi mu a ka si kpa Atiko wa nggo sa ankpye hen.
9 A na meme nâ ta si nggo a charr nu ungbamvu ku Abachi ku di:
“Unushirr nise hi meme kye,
unushirr nise wo meme kye,
unushirr nise ri amarr kama kye
ni itu i inkindirr yi nggo Abachi à na zu ku abangga ba nggo kpanye na ku.”a
10 Abachi à du Izhi ima yi tsarr inta aseki kama.
Izhi iyo i hi aseki ka we,
kye nu umi ku isisurr i Abachi ku.
11 Unggonggo hi amarr ka unuma?
A si izhi i unushirr wama yo nggo i rri so nu umi umaku.
A si meme yo na Abachi ku,
Izhi ima iyo ihi isisurr ima yi.
12 Ziza izhi yi nggo inta kpa i si si i ingbingbru inggi yi hen,
i si i Abachi.
Wre ki inta bu hi aseki ka iwre ka nggo Abachi à ni inta na ka sama ni ikpa inkindirr.
13 Inta ko re ni itu i aseki akama yo,
nggo Izhi i Abachi yi i tsarr inta,
na si si itsarr yi nggo zhi ni ihi i anishirr mu hen.
U Izhi iyiyirr inggi yo zi inta itsarr aseki ka nggo sa ka izhi yi,
ku abangga ba nggo Izhi ì so nu umi umbarr ku.
14 Undurr wa nggo ti sama ni Izhi yi,
à si kpanye nu ure ujiji ku nggo u zhi ni Izhi i Abachi yi hen.
A su ku inkindirr i ankalanttu,
nggo abangga ba nggo se ni Izhi i Abachi iyo a ka hi aseki ka nggo zhi na Abachi ku.
15 Unushirr wa nggo se ni Izhi i Abachi yi a se nu ukyekye ku bre amu ni itu i aseki ka we,
undurr si ma ni bre amu ni itu ima yi hen.
16 Nâ ta si nggo Ungbamvu ku Abachi ku à da di,
“Unggonggo hi isisurr i Atiko?
Unggonggo ma ni itsarr Abachi inkindirr yi nggo ta na?”
b
Inta ka kye are kama hi, nggo inta se ni isisurr i Kristi.