Iso yi nggo inta ta so, wre ki inta bu na ku Abachi undu
12
1 Ni ima yo,
amuya,
nggo Abachi à na ki inta inkindirr iwre,
ingga ko tsi ki imba ango ni atu imba wa na ti a han imba a to ku Abachi,
imba ni so tsitsirr ni so na ku Abachi undu ku nyarr.
Uwanggo yo a si anko nggo imba ka di kuttu ni barr Abachi ni isisurr imba nggo.
2 Si na aseki ka nggo anishirr bi ingbingbru ba a di na ka nggo hen.
Du Abachi à ka isisurr sarr ki imba na ka imba ki ahe̱he̱.
Meme nggo imba ta hi inkindirr yi nggo Abachi à zha na di nyarr yi nggo,
ni si ku meme yo nggo i ka se nggo.
3 A si ku ina wre yi nggo Abachi à ni ingga nggo,
ingga ko da ki imba wemi di,
imba bu si ba atu amba wa mri nggo imba i se nggo hen.
Ka atu amba wa kinggi ma ku ikpanye yi nggo Abachi à ni imba nggo.
4 Ukpa ku unushirr u si na anga ka shishemi.
Indu i ankla ka ukpa ka i si na nkanka.
5 Uwa a si meme yo,
ni ikri imunta yi mi,
inta nggurr bi mu ni Kristi ku ki ukpa uyirr.
6 Di inta na undu na aseki ka nggo Abachi à ni inta na anko Abachi wa.
Abachi à ti ni inta ikpa ni re ure umaku,
inta bu yo isisurr ni kpa bre ure ku kakami.
7 Abachi à ti ni inta isisurr izi abiga ba,
inta bu zi ba.
Uwa ti ni inta itsarr anishirr,
inta bu tsarr ba.
8 A ti si ire ku abiga ba du ba a gru a ta ukpa,
inta bu re ba.
Abangga ba nggo a sha inkindirr yi nggo a si na yi a nu abanu,
aba bu nu ba ni isisurr iyirr.
Abangga ba nggo a ti si bi hru anishirr,
aba bu hru anishirr ba zizi.
Abangga ba nggo di na ku anishirr uzizi,
aba bu na uzizi ku ni inyarr.
9 Imba ti kpanye na anishirr imba bu si kpanye na ba na ashishi hen.
Imba bu karr inkindirr yi nggo i si indanda nggo,
ni vu inkindirr yi nggo si izizi gri ni isisurr imba yi.
10 Kpanye ni ikpa imba yi nâ ti nggo amuya ni Kristi ku a di na nggo.
Ni di kye ikpa ssu na ashishi.
11 Si na ki lototo hen,
na undu kakami.
Na undu ku Abachi ku ni isisurr iyirr.
12 Imba bu nyarr nggo imba i so kye anko a inkindirr zhi na Abachi ku,
imba bu nyarr ni si na gbo hen.
Abanu a ti du isisurr imbarr yi i vri,
imba bu vu gri,
ni so di barr Abachi ttuttumi.
13 Inkindirr yi inggi nggo imba i se na yi nggo,
imba sha yi nu amuya abangga ba nggo a zha yi chankarr nggo.
Ni di kpa abichirr na ako amba wa.
14 Barr Abachi du yo ku abangga ba nggo a di tsutsarr imba nggo angu azizi.
Du yo ba angu azizi na bu si yo ba angu andanda hen.
15 Nyarr na abi so nyarr ba,
ni yì na abi so yì ba.
16 Nyarr ikpa gri zizi.
Si gɨ itu hen,
si ka undu numa di u su ku ankizhi hen.
Si ba ni isisurr di imba i hi mri abanu hen.
17 Unuma ti na ki imba inkindirr indanda imba si di imba ta na ku indanda meme hen.
Ta ukpa ni na inkindirr yi nggo anishirr we a kye yi si izizi.
18 Ta ukpa ni so zizi na anishirr ba we.
19 Ikpikpa amungga,
unuma ti na ki imba undanda,
imba bu si na ku undanda meme hen.
Du Abachi a han ku inkindirr yi nggo a na.
À charr na angbamvu ka Abachi ka di,
Atiko wa a da di,
“Ihan yi i si mungga.
Ingga ta han anishirr inkindirr yi nggo iwre ba ku ina imbarr yi nggo.”a
20 Si na undanda han hen.
Na inkindirr yi nggo angbamvu ka Abachi ka a da nggo di,
“Iyo ti ki unushirr wanggo à kri angbachi nu ùwà ku,
ùwà nu ma ila;
uhre u ti ki ma,
ùwà sha amasirr nu ma so.
Ùwà ti na meme ishisha i ta ki ma.”b
21 Si du undanda u mri ùwà hen,
na uzizi du ku ttu undanda ku nado.