10
1 Amuya amba na aniru,
inkindirr yi nggo i so ki ingga ni isisurr,
ingga i di barr Abachi ni itu yi inggi,
i si di Abachi a bu kpa anishirr amungga ba ani Yahuda ba ttungo.
2 Ingga mi hi di a yo itu kakami ni iga Abachi yi,
ihi iga imbarr yi mu i si si izizi hen.
3 Aba si hi anko nggo Abachi à di du anishirr a si azizi na age̱ ama ka hen.
Na da aba ta zha anko nggo aba a ta zirr zizi na age̱ ka Abachi na atu ambarr,
na si kpanye na anko a Abachi wa hen.
4 Kristi à ka na Are ka du ka a sama nu ukyekye ba,
ima yo du abangga ba nggo a kpanye na Abachi nggo uwa a kye ba ki abi na uzizi na age̱ ama.
Ikpa ttungo si i anishirr we
5 Nggo Musa à charr nu nggo anishirr a di na na du Abachi à kye ba ki azizi na age̱ ama,
na da di,
“Unushirr a ti na inkindirr yi nggo Are ka a da nggo,
Are ka a ta du ma so tsitsirr.”
6 Wanggo yo si inkindirr yi nggo Ure ku wre ku u da ni itu i anko nggo anishirr a di na na du Abachi à kye ba ki azizi na age̱ ama yi nggo i zhi ni iyo isisurr:
“Ùwà bu si zhi itu muwa di,
‘A su unggonggo ta hun kuma nu unkplassu ku gri Yesu ji nga?’ ”
(Inggi i si di undurr wa nggo a ta hun kuma ku barr Kristi da a bu ji nga ni inta ba nggo.)
7 “Ni si zhi itu imuwa di,
‘Unggonggo ta ji ku gri Yesu huzzu zhi ni ibe.’ ”
(Inggi i si di a bu ji ku gri Kristi na hun zhi na abi kɨ ba ba.)
8 Inkindirr yi nggo Ungbamvu ku da i si di,
“Ure ku Abachi ku u su ywhiywhirr nu uwa ku,
u so nu ubarr angu muwa tuku ni isisurr imuwa.”
A si ure ku nggo inta da nggo du ùwà bu kpanye nu uwa ku.
9 Ùwà ti da na angu amuwa di Yesu à si Atiko,
ni ti kpanye ni isisurr imuwa di Abachi a ta ma si ni ibe,
Abachi a ta kpa ùwà ttungo.
10 Inta kpanye ni isisurr imunta da Abachi a kpa inta ki abi zirr zizi na age̱ ama,
inta da na angu amunta,
Abachi à kpa inta ttungo.
11 A charr nu Ungbamvu ku Abachi ku di,
“Uwanggo nggo à ti kpanye na Abachi ku ishisha i si ta ki ma hen.”a
12 Ida ima yi i si ku anishirr we,
nu nggo anko nggo Abachi di kpa ani Yahuda na abangga ba nggo a si si ani Yahuda hen ttungo,
anko wa a si ayirr yo.
Atiko wa a su uyirr yo ku anishirr wemi na di na wre ku abangga ba nggo a di barr ma nggo.
13 A charr nu Ungbamvu ku Abachi ku di,
“Undurr wa nggo ti yo isa i Atiko yi,
Atiko wa ta kpa ma ttungo.”b
14 A ti nise kpanye na Abachi ku,
aba a ta yo ma kingginggi?
Aba a ti nise wo ure ku Abachi ku aba a ta na kingginggi na kpanye na ku?
A ti si da ba ure ku hen,
aba a ta na kingginggi na wo ku?
15 A ti si du abi da ure a ssuzzu hen,
aba a ta na kingginggi na da ure ku?
A charr na angbamvu ka meme yo di,
“A si inkindirr inyarr iwre kakami nu nggo abi da ure ku wre ku ba a so nga nggo!”c
16 Uwa a si si ani Israila wemi mu a kpa Ure ku wre ku ni isisurr imbarr yi hen.
A charr nu ungbamvu ku Ishaya ku di,
“Atiko,
abata ngga a kpanye nu ure umuwa ku nggo inta bre ba na ku nggo?”d
17 Meme nggo,
iwo ure i di gri iyo isisurr.
Undurr ti bre ku anishirr ure ku Kristi ku nggo aba ta wo ku.
18 A si jiji mu di a wo ure ku Abachi ku?
Yo-o,
a wo ku,
a charr nu Ungbamvu ku Abachi ku mi da di,
“Are ka nggo a bre ki inta nggo a zirr kago ingbingbru yi,
aba wo ure umbarr ku kago ni imimi yi.”e
19 Ingga zhi imba zizo,
anishirr bi Israila ba a hi?
Yo-o!
Musa yo a re ni me̱me̱ na da nggo Abachi a da ku di,
“Ingga ta du anishirr ba Israila ba kri angbachi na anishirr ba nggo si sa ani Israila hen;
Ingga ta du isisurr vri imba na abi igbu abangga ba nggo a si hi inkindirr hen.”f
20 Ishaya yo à sama ni isisu na charr di,
“Abangga ba nggo a si so zha ingga hen,
aba yo a zirr ku hi ingga.
Abangga ba nggo a si zha di aba ta hi ingga hen,
na gru kakye ingga.”g
21 Ishaya da ki inta di Abachi à da ni itu i Israila di,
“Ttuttumi ingga i so na ango kuma ku
anishirr abangga ba nggo a kà iwo na kà ingga.”h