Ure ku wre ku nggo
Marrku
à charr
Yohana uni zzu anishirr na amasirr wa à ssu anko wa bi
1
1 Uwanggo yo su Ure ku wre ku ni itu i Yesu Kristi,
Uvuvurr a Abachi wa.
2 Ure ku wre ku na ase ka kuchi ka nggo Ishaya,
uni kpa are ka Abachi wa à charr da di Abachi da di,
“Ingga ta tu unitu mungga wa
du ma kuchi ku bi ssu anko wa bi ku uwa.”a
3 “Undurr so du na ankpuji,
‘Ssu anko wa bi ku Atiko wa.
Na wa ki ntto nggo a taka ni wre ku uzirr!’ ”b
4 Unitu wa a si Yohana ni di zzu anishirr na amasirr.
À di zirr na ankpuji,
na di zzu anishirr ba na amasirr,
na tsarr ba da di,
“Imba du ila ure imba yi,
ni du ba zzu imba na amasirr.
Abachi ta nggurr ila ure imba yi zhi ki imba.”
5 Anishirr shishemi a nga zhi na anga ka nu Yahudiya,
na abanu a zhi nu umi igbu ku Urushalima.
A nga ni wo ure ku Yohana ku,
na da ila ure imbarr yi,
uwa zzu ba na amasirr ni inyi nu Joda.
6 Yohana a di surr ankru ka nggo a na ka ni infunfu i alakurrmi,
na lo upri unggakpa na anklampi.
A di ta ìzì na di re̱ utu ku anisso.
7 A di tsarr anishirr ba da di:
“Undurr numa à so nga nu ugo mungga.
A mri ingga kakami.
Izhizhi i anggakpaza ima yi mi,
ingga si ma ni ku klo ni ddu ka hen.
8 Ingga zzu imba na amasirr,
uwa ta ka ni zzu imba ni Izhi Iwre i Abachi yi.”
Izzu na amasirr tuku itsarr Yesu kye yi
9 A si ni ivi ima yo i Yesu à nga zhi ni igbu nu Nazareti,
na anga ka Galili ka,
i Yohana nga ni zzu ma na amasirr ni inyi nu Joda wa.
10 Kakayirr,
Yesu à so huzzu zhi nu umi ka amasirr ku,
na hi unkplassu ku u bwu.
A hi Izhi Iwre i Abachi yi nga ni so ku nu ukpa,
ni izzu na sa anddu.
11 Aba wo ukorr zhi nu unkplassu da di,
“Ùwà yo su Uvuvurr mungga wa nggo ingga kpanye nu ùwà ku.
Izhi mungga yi i nyarr nu ùwà ku kakami.”
12 Kakayirr i,
Izhi Iwre i Abachi yi nga ni du ma rri ko na ankpuji.
13 Nabo yo,
uwa ku so ki ivi iso ine̱ (40),
ndo ni ininazzu i ijiji.
Nabo yo,
Isheta à ku tsarr ma kye.
Abitu ba Abachi ba ku so zi ma.
Yesu à yo abiga bi me̱me̱ ba
14 A vu Yohana ku ttu nu uki,
ni ivi ima yi nggo Yesu à kuma nu Galili,
ku so tsarr Ure ku wre ku Abachi ku.
15 A ddu ba di,
“Ivi yi i nga ba.
Ittu i Abachi yi i si ywhiywhirr mi.
Imba kasarr ni ila ure imba yi,
ni kpanye nu Ure ku wre ku!”
16 A ti ta so vu sarr nu unddu inyi ku Galili ku,
na hi anishirr aha bi vu ikikla,
Sima tuku Andoro uzayirr wa,
a so ta azhizhi ki vu ikikla ni inyi wa.
17 Yesu à yo ba na ddu ba di,
“Imba ga ingga yi,
ni di ingga tsarr imba nggo imba ta gri anishirr nga ni ingga ku nâ ta si nggo imba di vɨ ikikla yi.”
18 A wo meme,
kakayirr,
na du azhizhi ambarr ka,
na ga ma.
19 Na ti sha zirr a ko ntsɨ na hi amuya aha abanu,
Yakubu tuku Yohana,
amumarr bu Zabadi a so nu umi ku uddu umbarr ku,
na so na azhizhi ambarr ka ssubi.
20 Kakayirr,
Yesu à ti sa ashishi na ba,
na yo ba,
aba wo na ka aki ambarr wa Zabadi du ndo na amirr iko abu undu ba na ga Yesu.
Yesu à han izhi ndanda huzzu ku ugo numa
21 Yesu na abiga ma ba,
a nga nu Kapanahu.
Na Asabarr,
c Azhibarr a Isu anu Yahuda wa,
Yesu à rri ko ku so tsarr nu uki ki issubi ku.
22 Anishirr ba wo ma.
Ayisurr ambarr wa jaku ni itsarr ima yi.
À si tsarr ba,
nâ ta si itsarr i abitsarr are ba hen.
A so tsarr ba kyekye mi zzu nâ ta si uwa nggo sa akikye nu ure wa.
23 Nggo a se nu uki ki issubi ku,
ugo numa a se ni izhi ndanda na nggarr angu yi da di,
24 “Yesu anu Nazareti,
uwa zha angginggi ni inta ba?
Uwa nga ingu inta mu?
Ingga hi uwa.
Uwa yo su Uni wre wa nggo zhi na Abachi ku!”
25 Yesu a nggarr ito ni izhi ndanda yi ku,
da di,
“Ttu angu muwa!
Huzzu ku ugo wa nu ukpa!”
26 Izhi ndanda yi i mri ugo wa,
ni du ma wri kpakpa,
ni nggarr iyi,
ni huzzu kuma.
27 Anishirr ba wemi nggo a kri nabo a ku ayisurr.
Na so zhi ikpa ambarr,
da di,
“Uwama sa angginggi?
Uwanggo a si itsarr ihe̱he̱ mu?
Ugo wanggo a se nu ukyekye ki re ki izhi ndanda,
i wo ma!”
28 Nabo yo,
ure ku Yesu ku bwa kago hanhan mi na anga ka Galili ka.
Yesu du abi vri ba wre
29 Yesu na abiga ma ba ndo ni Yakubu tuku Yohana huzzu nu uki ki issubi ku,
na kuma ni iko ini Sima tuku Andoro.
30 Ukpa ku ayimbarr a Sima wa u nggurr ssu.
Nggo a ti mirri aba da ku Yesu ivri ima yi.
31 Yesu rri ko na ku,
na ko ku vu ma nu ungo,
na gɨ ma gru.
Ivri yi du ma,
uwa a gru na zzu ba ila.
32 Ni ingbahru ima yi,
azhi wa a ji ba na klo gbo,
aba gri ku Yesu abi lo na abi izhi ndanda.
33 Anishirr shishemi abu Kapanahu ba shishemi a nga ni kri na akpla ka iko ka.
34 Yesu du anishirr ba nggo a se ni ilolo yi na nkanka a wre,
na han anazhi ndanda yi huzzu ku anishirr shishemi nu ukpa.
Na si kpanye di anazhi ndanda ba bu da inkindirr hen nu nggo aba mi a hi ma.
Itsarr i Yesu nu Galili
35 Ni igambre bwu,
nggo abubo wa ni ko su wriwri,
Yesu gru huzzu ni iko yi na ko ku so barr nu unto ku nggo su ywi.
36 Sima na akpukpambarr ba a gru huzzu ku di zha ma.
37 Nggo a ko ku hi ma,
na da ku di,
“Anishirr ba namri a ko zha uwa.”
38 Yesu ddu ba di,
“Di inta kuma ni igbu numa yi meme,
di ingga ki itu mungga ku tsarr ba ure ku Abachi ku nabo.
Ima yo gri ingga nga.”
39 Yesu na abiga ma ba di zirr kago ni igbu i Galili yi.
Uwa ku di tsarr ba na aki ka issubi ka na di han anazhi ndanda huzzu ba.
Yesu adu uni lo ishi a wre
40 Uni lo ishi numa nga ni Yesu ku,
na ni kuttu na agbuzzu na barr ma di,
“Uwa ti kpanye,
uwa di ingga wre.”
41 Itito i ti Yesu na ku.
Yesu ti ungo sa na ku na di,
“Ingga kpanye.
Uwa bi wre!”
42 Ishi yi huzzu keke,
uwa wre.
43-44 Yesu gba ku utu kakami di,
“Si da ku undurr inkindirr hen.
Kuma ku tsarr unikye wa ukpa muwa ku.
Uwa ti hi du ùwà wre,
uwa bu ni Abachi aseki ka nggo Musa à da di,
uni lo ishi ta wre,
uwa bu ni ka,
na du anishirr bu hi du ùwà à wre ba.”
Na du ma kuma.
45 Nggo ugo wa huzzu na so bre ku anishirr kago ankonki.
Ima yo du Yesu à si rri ko nu umi igbu ku na du anishirr hi ma hen.
Na ku di so ni into inggi nggo su ywi mi.
Anishirr ba zha ma ku hi na di kuma na ku.