Assurre a áníwá awurr ba
25
1 “Ni ivi ima Ittu i unkplassu yi i taka si ma mi:
Azhibarr numa nggo áníwá abanu a sa awurr a gru vu ingba i uru imbarr,
na kuma ko ma nu uni garr ku na anko.
2 Akywi ba nu umi umbarr ku a si arrurru,
akywi ba a si krizhizhi.
3 Arrurru ba a vu ingba imbarr yi na si gri anye hen.
4 A krizhizhi ba gri ingba imbarr yi na gri anye shishemi ssu ni iki isurr anye imbarr yi.
5 Uni garr ayamba wa à so nado,
na si nga korr hen.
Áníwá ba a so di na gru kurr ina.
6 “Na atsutsu ibittu aba gru du di,
‘Uni garr ayamba wa à nga ba!
Imba nga ni ma na ku na anko!’
7 “Áníwá ba a gru awurr mi na ssu ingba ambarr yi ki.
8 Arrurru ba a ddu krizhizhi ba di,
‘Imba sha anye amba wa ni inta yi,
kye iru munta yi i ko kazhi.’
9 “Akrizhizhi ba a kisa ba di,
‘Iya,
a si ta ma ki inta ni imba hen.
Imba kuma ku re amba.’
10 “Nggo arrurru ba kuma ko re anye wa,
uni garr wa à gru nga.
Áníwá akywi ba nggo a so bi ma a gru rri ga ma kuma nu unto ku iga ku,
na ka anko wa ttu.
11 “Nggo a ta so áníwá akywi ba a ku kanga,
ni ko nggurr anko di,
‘Ankpye,
ankpye!
Bwu ki inta anko di inta mirri!’
12 “Uni garr wa à ddu ba di,
‘Ingga da ki imba ure ujiji mu,
ingga si hi imba hen.’ ”
13 I Yesu da ba ni ikikre yi di,
“Ni ima yo imba bu so di gbye yi,
nggo imba si hi azhibarr a ikanga i Uvuvurr a Unushirr wa hen.”
Assurre a amirr iko atarr ba
14 Yesu da ba assurre anuma zizo da di,
“Inkindirr yi nggo à taka na yi ni Ittu i unkplassu yi ì si nâ ta si nggo ugo numa à kuma nu uzirr.
Nggo à gru ta kuma na yo amirr iko ama ba na ga ba aseki ka iko ma ka di a bu kye ku.
15 Ugo wa à hi ukyekye umbarr ku bari na ka aseki ka du ba.
A nu unuma wa inklo abwubwu akywi,
na nu unuma wa uha,
unu utarr wa à kpa abwubwu ayirr.
À na meme kre na gru kuma nu uzirr umaku.
16 Uwanggo wa nggo à kpa abwubwu akywi ka à kuma ku re aseki na ka re,
na kpa amasirr ni itu yi ki abwubwu akywi.
17 Uwanggo nggo kpa abwubwu aha meme ku kru hwri,
na kpa amasirr abwubwu aha.
18 Nggo unu utarr ambarr wa nggo a nu ma abwubwu ayirr wa,
uwa gri inklo i atiko ama yi,
ku ya udduddu ni imimi na ka wa yo sharri.
19 “Nggo atiko ambarr wa ku so ta anko na gru kanga zhi nu uzirr ku,
na ni yo ba zu du uwa ta wo inkindirr yi nggo a na ni inklo ima yi nggo à nu ba.
20 Uwanggo nggo à du ku abwubwu akywi ka à gri ka nga na gri amasirr nga kye ma,
ni da di,
‘Ankpye,
uwa ni ingga abwubwu akywi,
kye akywi anuma ngga amasirr amungga wa.’
21 “Akiko wa à ddu ma di,
‘Ingga chi ùwà nu undu!
Ùwà su uvurr iko uzizi uni gri inkindirr wre.
Nu nggo ùwà gri inkindirr ntsɨ inggi yi wre,
ingga ta nu ùwà aseki shishemi du ùwà kye ki ingga na ka.
Nga ni nyarr ndo ni ingga ku!’
22 “Uwa wanggo nggo a kpa abwubwu aha ka a mirri nga ni da di,
‘Ankpye,
uwa ni ingga abwubwu aha.
Kye,
amasirr amungga nggo abwubwu aha.’
23 “Akiko wa à ddu ma di,
‘Ingga chi ùwà nu undu!
Ùwà su uvurr iko uzizi uni gri inkindirr wre.
Nu nggo ùwà gri inkindirr ntsɨ inggi yi wre,
ingga ta nu ùwà aseki shishemi du ùwà kye ki ingga na ka.
Nga ni nyarr ndo ni ingga ku!’
24 “Uvurr iko wa nggo a nu ma abwubwu ayirr wa,
à nga ni ddu atiko wa di,
‘Ankpye,
ingga hi ùwà ì tsɨ kakami.
Ùwà di hwa aseki ka nggo ùwà si ttu hen.
Ùwà di ssu ikiri yi bi ni inkla yi nggo ùwà ì si ttu ikiri hen.
25 Ingga ì kru di inklo imuwa yi ì ta na ingga nado,
ima yo di ingga gri yi ku ya imimi ni sha yi sharri.
Kye!
Uwanggo yo si inkindirr yi nggo ùwà ni ingga.’
26 “Akiko wa à ddu ma di,
‘Ùwà undanda tuku ussussu uvurr iko.
Ùwà hi di ingga di hwa aseki ka nu unto ku nggo ingga si ttu hen,
ni di ssu ikiri yi bi ni inkla yi nggo ingga si ttu ikiri hen?
27 E-e,
à si meme yo,
ùwà ka gri yi kuma ku zu ki ingga na abi zu inklo na amasirr ba ba,
ingga ka ni ba yi na amasirr ni itu yi.
28 “ ‘Kpa yi glo na ku,
ka nu uwanggo nggo à se na abwubwu awurr ka.
29 Abangga ba nggo a se ni inkindirr shishemi,
a ta nu ba inuma sa ni itu.
Imbarr yi i ta kri mwe ba shishemi.
Uwa a ta si abangga ba nggo a sama ni inkindirr na anko,
a ta vu ba kpa ivi ntsɨ inggi yi nggo à se na yi.
30 Uwa ta su ankalanttu uvurr iko wanggo,
a ta ba ma tu ku tu yo ni ibwu.
Nabo yo uwa ta ku yì na ta anyinyirr.’
Azhibarr i ibre amu a ikikre wa
31 “Nggo Uvuvurr a Unushirr taka nga nu ukyekye ku Ittu umaku na abitu ba Abachi ba we na ku,
uwa taka so ni imburr ittu ni inkpinkpye ima yi.
32 Anishirr ba ingbingbru ba we taka nggurr bi na ku,
uwa taka ga ba ki aha,
nâ ta si nggo uni ho di hla aminta ba glo na amuwu ba.
33 Uvuvurr a Unushirr à ta zu aminta ba nu ungo ri uma,
na zu amuwu ba nu ungo mla uma.
34 “Mre uttu wa taka da ku abangga ba nggo su nu ungo ri umaku di,
‘Aki mungga à yo ki imba angu azizi.
Imba nga ni kpa aseki azizi zhi na Abachi ku.
Imba nga ni so ni ri ndo na abubo a iso ni ittu wa nggo a na yi zu ki imba zhi nu nggo a na ingbingbru inggi yi.
35 Nggo iyo i ki ingga,
imba ni ingga iri.
Uhre ù ki ingga,
imba ni ingga amasirr a iso.
Ingga i su uhe̱he̱ ni imba ba,
imba kpa ingga yo na ako amba wa.
36 Ingga so ni inkpohorr,
imba ni ingga iki isurr.
Nggo ingga lo,
imba fu ingga.
A gri ingga ku harr nu uki,
imba ku rri ni ingga ku.’
37 “Azizi ba ta zhi ma di,
‘Atiko,
inta na ku uwa meme nita nggo?
Inta hi uwa nu momonggo,
nggo uwa so ni iyo nu uhre,
inta nu uwa iri ni iso?
38 Ùwà i su uhe̱he̱ nita nggo inta kpa ùwà yo na ako munta wa,
ka ùwà sa ni inkindirr isurr inta nu ùwà ankru surr?
39 Ùwà ì lo nita nggo ni kri ni iharr nita nggo inta kuma nu ùwà ku?’
40 “Uttu wa ta da di,
‘Ingga da ki imba ure ujiji,
nggo imba ti na ku unuma nu umi ku amuyirr amba abi iklonyarr angga ba nggo sa amuyirr mungga ba,
imba na si ki ingga yo!’
41 “Mre uttu wa à ta da ku abangga ba nu ungo mla di,
‘Imba nggo Abachi à sarr antinte a surr imba,
chi share ni ingga kuma ku rri nu uru ku nggo a na ku sese mu zu ku umimi wa na abitu ama ba.
42 Iyo i ki ingga,
imba si ni ingga ila hen.
Uhre u ki ingga,
imba si ni ingga amasirr iso hen.
43 Ingga i su uhe̱he̱ ni imba ba,
imba si kpa ingga hen.
Ingga zirr ni ihorr,
imba si ni ingga inkindirr isurr hen.
Nggo ingga lo ni kri ni iharr,
imba si kuma ku rri ni ingga ku hen.’
44 “Aba a ta da di,
‘Akiko,
inta i hi ùwà nu momonggo ni iyo nu uhre ni si nu ùwà inkindirr iri,
ka i iso hen?
Ka ùwà nye ichirr,
ka ihorr,
ka ùwà lo,
ka a gri ùwà ko ku ttu nu uki,
inta ka izi ùwà?’
45 “Uttu wa à ta da ba di,
‘Ingga da ki imba ure ujiji,
nggo imba kà izi uyirr nu umi ku antsɨntsɨ angga ba,
imba kà izi si ingga yo.’
46 “Abangga ba yo a ta turr ba surr nu uru ku rri sese ku,
uwa ta si abi na wre ba a ta kuma nu unto ku iso sese ku.”