Unggonggo si ankpye ni ittu i unkplassu yi?
18
1 Na attuttu ama wa abiga bu Yesu ba a nggurr bi na nga na ku,
ni zhi ma di,
“Unggonggo si ankpye wa ni Ittu i unkplassu yi?”
2 I Yesu kasarr na yo inkparr uvuvurr numa gri nga ni ichi imbarr.
3 Na da di:
“Ingga da ki imba,
imba ta si kasarr ni kaki nâ ta si amumarr atsitsa hen,
imba si ta rri ni Ittu i unkplassu yi hen.
4 Undurr wanggo ti ka itu ima yi ta yo ni imimi na kaki nâ ta si uvuvurr wanggo wa,
uwa yo si ankpye ni Ittu i unkplassu yi.
5 “Undurr wa nggo ti kpa uyirr ma mi ni isa imungga,
uwa a kpa si ingga yo.
Kru inkindirr yi nggo i ta du ùwà i la ure
6 “Undurr wa nggo ti du uyirr nu umi ku amu atsitsa angga ba nggo kpanye ni ingga ku a la ure,
ì ta wre aba bu klo ku undurr uwama ununa ni ito na ba ma tuyo ni inyi du ma gu.
7 Uje ku anishirr abi ingbingbru ba,
nu nggo aseki shishemi a se nggo ta du ba a la ure.
Aseki akama a ta la.
U uje ku undurr wa nggo du yi i la.
8 “A ta su ungo,
ka uza umuwa nggo u ta du ùwà jaku ni iga yi,
ùwà gye ku ta yo.
Uje ku abangga ba nggo a ta du anishirr ba la ure.
I ta wre ùwà bu rri ni iso sese yi sama nu ungo ka uza,
nu nggo a ta ba ùwà tu yo nu uru ku rri sese,
ùwà se na ango na aza aha.
9 Ata si ishishi nggi ti du uwa jaku ni iga yi,
uwa ttu yi ta yo glo,
i ta wre uwa bu rri ni iso sese yi ni ishishi iyirr nu nggo a bu tu ùwà yo nu uru ku asese na ashishi aha.
Assurre a ivinta ni nado wa
10 “Imba bu si kpa atsitsa angga ba chirr hen.
Ingga da ki imba,
a se na abitu ambarr nu unkplassu a di kri ikri inggi na age̱ ka Aki amunta wa nu unkplassu. [
11 Ingga Uvuvurr a Unushirr i nga ikpa abi nado ba yo ttungo.]
12 “Imba kye kingginggi,
unushirr wa nggo à se na aminta ayirr yirr,
uyirr nu umi umbarr ku à ti nado na?
Uwa à si ta kà aminta iso itirr na atirr ba (99) du ni igbre wa,
na kuma ku zha uyirr wanggo hen.
13 Uwa à ti zha ma hi,
ingga ko da ki imba,
unushirr uwama à ta se ni inyarr kakami ni itu i ivinta uyirr uwama mri iso itirr na atirr ba (99) nggo si nado ku hen.
14 Na anko ayiyirr ama yo,
Aki amungga wa nu unkplassu mi à si di kpanye di uyirr nu umi ku atsitsa angga ba a bu nado hen.
Uzumbirr ti kpala ku ùwà.
15 “Nggo uzumbirr ti kpala ku ùwà,
kuma ku da ku ila ima yi,
imba aha yo.
À ti wo ùwà na kpanye ni ila ure ima yi,
ùwà gri ma kanga na anko.
16 Nggo à ti kà iwo ùwà,
ùwà bu yo unushirr uyirr ka aha du ba ga ùwà.
‘Inkindirr yi nggo anishirr aha ka atarr a ti hi yi i si meme yo jiji,’
nâ ta si nggo ungbamvu ku Abachi u da.a
17 Uwa ti si wo imba hen,
ùwà bu gri ure ku ni kuma nu uki ku nggurr bi ku Abachi ku,
uwa à ti kisa na aba Abachi ba ba zizo,
ùwà kye ma ki unushirr wanggo nggo à si si uniga hen.
18 “Ingga ko da ki imba ure ujiji,
inkindirr yi nggo imba ti kà yi ni ingbingbru inggi yi aba a ta kà yi nu unkplassu.
Inkindirr yi nggo imba ti kpanye na yi ni ingbingbru inggi yi aba a ta kpanye na yi nu unkplassu.
19 “Ingga ko da ki imba zizo,
unto ku nggo imba aha ni ingbingbru yi ti kpanye ni inkindirr iyirr nggo barr ni itu ima yi,
Aki amungga wa nu unkplassu à ta na ki imba na yi.
20 Unto ku nggo anishirr aha ka atarr a ti nggurr bi ni isa imungga,
ingga se na ba nabo.”
Assurre a ugarr wa nggo si di nggurr zhi hen
21 Biturr kuma ku zhi Yesu di,
“Atiko,
u uzumburr à ti so kpala ki ingga,
ingga bu nggurr zhi ku ki inkpo ibirr nggi?
Ankpu itangba?”
22 Yesu ddu ma di,
“Iya!
A si si inkpo itangba hen.
A si ankpu iso tangba ki ankpu tangba.
23 “Meme nggo,
ure unggo ku utsarr di Ittu i unkplassu inggi si ma mi:
“Azhibarr numa nggo uttu numa gru yo amirr iko ama ba,
na da ba di a bu tsarr ma aseki ka nggo uwa a ga ba na ka.
24 A so na meme nggo,
aba a gri uyirr nu umi umbarr ku na rri kuma na ku,
di a ri ba inklo shishemi.
25 Uvuvurr iko wa sama ni inklo yi nggo ka ma ihan uhla ukuma.
Uttu wa à da di a bu ba ma ku re ki ugarr,
kye na ayamba ama wa na amumarr ba ni inkindirr yi nggo a se na yi,
wre ba bu han uhla ku.
26 “Uvuvurr iko wa à ji jaku na agbuzzu na age̱ ka uttu ka,
na barr di,
‘Ingga ko barr uwa,
vu isisurr ni ingga ku.
Ingga ta han ku ùwà na yi we!’
27 Uttu wa ki itito na ku,
na kà uhla ku du ku na du ma kuma.
28 “Nggo uvuvurr iko wa huzzu na kuma nu uvuvurr iko unuma nggo a so ga ma inklo ntsɨ.
Na ku ma ma vu ni ito di,
‘Han ingga inklo yi nggo ingga so ga uwa nggo!’
29 “Uvuvurr iko wa à jaku ni imimi na barr ma di,
‘Vu isisurr ni ingga ku,
ingga ta han uwa na yi we!’
30 “Uwa ka na kisa,
na ba ma ku nu ba a ttu nu uki di a ti han uwa inklo yi bari.
31 Nggo inkpu amirr iko yi a kye inkindirr ima yi i vri ba isisurr kakami,
na kakuma ku da ku uttu wa aseki ka wemi nggo a la.
32 “Uttu wa à tu ba a yo uvurr iko wa,
na ddu ma di,
‘Ùwà ugarr undanda!
Nggo uwa barr ingga,
ingga nggurr uhla umuwa ku izhi ku uwa we.
33 Uwa mi ka nggurr zhi ku ukpami uvuvurr iko wa meme,
nâ ta si nggo ingga nggurr zhi ku uwa.’
34 Uttu wa vri isisurr na ku kakami,
na du ba gri ma ku harr,
na ki ma iha du ma han uhla ku we bari.”
35 I Yesu kre assurre wa na da di,
“Aki mungga nu unkplassu ta na ki imba meme yo,
nggo imba si di nggurr zhi ku amuyirr amba ba zhi ni isisurr hen.”