Ittu i Yohana uni zzu na amasirr wa
14
1 A si ni ivi ima yi u Hirridu uttu nu Galili wa,
a wo ure ni itu i Yesu.
2 Na da ku anishirr ba nggo a di so na ku undu nggo di,
“Mi uwanggo a ta su Yohana uni zzu na amasirr wa yo à tasi na kanga.
Ima yo i du ma à se nu ukyekye ku na aseki ka ikagri angga ka.”
3 Hirridu yo à du ba vu Yohana uni zzu na amasirr wa,
na lo ma na ache na harr ma ni itu i Hirridiya,
ayamba a Filibu uzayirr wa.
4 Yohana à da ku di:
“I si ta wre uwa bu hru Hirridiya ki uwami hen.”
5 Hirridu à ka ngu Yohana ba,
na so kru isisu di anishirr ba a ta tsi kputtu,
nggo a hi di anishirr ba a kpanye di Yohana à su uni kpa are a Abachi.
6 Nggo azhibarr a ingri a Hirridu wa a ma,
uwa na iga.
Uva a Hirridiya wa a nga ni rro na age̱ ka anishirr ankpinkpye ba na su ku Hirridu isisurr,
7 uwa da di,
“Ingga shi ku uwa azhi,
inkindirr yi nggo ùwà ti zhi yi ingga ta nu uwa na yi.”
8 Ayirr a uva wa à ddu ma di a bu da di,
“Gri ki ingga itu i Yohana uni zzu na amasirr wa ni inggya na agbugba zizami!”
9 Isisurr vri uttu wa,
uwa kye ishi azhi i ima yi,
ni ishisha i abichirr ba,
na da ku abi ta iku ba di a bu na inkindirr yi nggo uva wa à da nggo.
10 Mre aba ku ttu itu i Yohana yi nu uki ku iharr ku.
11 Na gri itu yi na agbugba ga ku uva wa,
uwa kpa yi ga ku ayirr wa.
12 Abiga bu Yohana ba kuma ku ba ankpunkpru ukpa wa gri ku zzu,
na ku da ku Yesu inkindirr yi nggo ì la nggo.
Yesu à ho anishirr ukrɨ ukywi
13 Nggo Yesu à wo ure ku ittu i Yohana yi,
na gru na abiga ama ba nayi ku rri nu uddu na kuma na abubo wa nggo anishirr a sama na wa.
Anishirr ba a wo meme nggo na gru ssuzzu ni igbu imbarr yi a ga Yesu na aza.
14 Nggo Yesu à ssuzzu nu uddu ku na hi akpa anishirr wa a kri bi ma,
itito ki ma na ba,
uwa du abu ulolo ba wre ni ilo imbarr yi.
15 Nggo ingbahru yi so ki,
abiga ma ba nga ni da ku di,
“Ingbahru i so ki,
inggya asi ankpuji.
Undurr à si di so ni inggya hen.
Du anishirr ba kuma ku re ila nu umi igbu ku,
ku atu ambarr.”
16 Yesu à ddu ba di,
“I si ta wre aba bu kuma hen.
Imba ku atu amba bu nu ba inkindirr i iri!”
17 Aba ka da ku di,
“Ivi ila yi nggo inta i se na yi,
à si unfonfo ukywi yo ni ikikla iha mre.”
18 I Yesu à ddu ba di,
“Gri ba ga ki ngga.”
19 Na da ku anishirr ba di a bu kuso na agiga ka.
Na ki ungo kpa unfonfo ukywi wa ni ikikla iha yi,
na kye hun kuma nu unkplassu,
na nyarr ku Abachi.
Na mɨ unfonfo wa ki ankpunkpu a nu abiga ma ba,
aba kpa nu anishirr ba.
20 Anishirr ba we a ri shi.
Abiga ma ba vu ankpunkpu ka nggo a ji ssu pwi ni isisa iwurr ni iha.
21 A si bre amba na amumarr kye hen,
anishirr ba nggo a ri si aniru ukrɨ ukywi.
Yesu zirr na atu ka amasirr
22 Nggo anishirr ba a ri kre ma yo i Yesu à du abiga ma ba ku rri nu uddu ku na bu kuchi kuma nu ugugarr inyi numa ku.
Uwa a ka so na yo anishirr ba anko bari.
23 Nggo a du anishirr ba kuma,
na hun kuma ni igbre wa na nkima ku barr.
Nu nggo ingbahru i ki,
i Yesu se nabo na nkima,
24 uddu ku ùka ta anko ni inyi wa ba,
unddunddu gru so go,
ni turr uddu ku kakuma nu ugo,
ankinkirr ka gru ni so nggurr nu uddu ku.
25 Nggo ambre ka à nise nggarr kre,
i Yesu a rri na ba,
na ko zirr na atu ka amasirr ka.
26 Nggo abiga ma ba a hi ma ni so zirr na amasirr wa,
isisu ki ba.
Aba da di,
“À si uzhi!”
Na nggarr angu yi hantu ku isisu.
27 I Yesu bwu angu re na ba keke di,
“Vu isisurr!
A si ingga,
si kru isisu hen!”
28 Biturr ddu ma di,
“Atiko a ta su uwa yo jiji,
uwa di ingga mi zirr na atu ka amasirr ka ni nga nu uwa ku.”
29 I Yesu yo ma di,
“Nga!”
I Biturr gru huzzu nu uddu ku na ko zirr na atu ka amasirr ka na ko kuma ni Yesu ku.
30 Nggo a hi unddunddu ku tuku ankinkirr ka amasirr ka,
isisu ki ma,
uwa gru so ji rri na amasirr wa.
Na nggarr angu yi di,
“Kpa ingga ttungo,
Atiko!”
31 Mre i Yesu na ungo na ko ma vu,
na ddu ma di,
“Uwa na kingginggi ni di iyo isisurr imuwa yi i si ntsɨmi.
Angginggi du ùwà na isisurr imuwa yi ki iha?”
32 Aba aha mi a mirri nu uddu ku unddunddu ku ù kukri.
33 Abiga ma ba nu umi ku uddu ku a kuttu na ddu Yesu di,
“Uwa su Uvuvurr a Abachi jiji.”
Yesu à du abi lo wre nu Genesareti
34 A cha inyi wa kuma nu ugugarr ku Genesareti.
35 Nggo anishirr ba nabo a hi di a si Yesu,
na da ku anishirr ba kago korrmi na anga kama we,
aba gru gri abi lolo wemi na nga na ku di a bu ni du ba wre.
36 Na barr ma di a bu kpanye na du abi vri ba sa ango nu utu nkru uma uku yo mre.
Abangga ba nggo a sa ungo na ku we a wre ni ivri imbarr yi we.