Assurre a ugo ni ttu ikiri wa
13
1 Azhibarr ayiyirr ama wa i Yesu à gru huzzu ni iko yi na ji ko ku so nu unddu inyi ku na ta tsarr anishirr ba.
2 Anishirr ba nggo nga na ku a kri mwe kakami,
uwa gru rri ku ji so nu uddu ku nu umi ku amasirr ku,
na du anishirr ba wemi nu unddu ku.
3 Na so bre ba are shishemi na assurre di:
“Uni do numa nggo huzzu ku ttu ikiri.
4 Nggo a hi ingbingbi kiri yi,
inuma yi i kusurr na anko,
aminche nga ni ta yi ri.
5 Inuma yi kusurr na ako han,
nggo imimi yi i si ntsɨmi.
Ikiri yi i zzu hanhan mi,
nggo imimi yi ì si kri ji kuma nu umi hen.
6 Nggo azhi wa huzzu,
na tu,
ikiri yi ì kɨ nu nggo injinja yi so fafami.
7 Inuma yi kusurr ni intto,
intto yi furr ni turr yi.
8 Ingbingbi numa i kusurr ni imimi izizi,
ni zzu,
ni hurr,
ni na ingbingbi,
ato numa wa a ma ayirr yirr,
anuma wa iso titani,
ato numa wa iso titarr.
9 Undurr wa nggo ti se na atu ka iwo ure,
uwa bu wo!”
Inkindirr yi nggo du Yesu a re ku anishirr ba na assurre
10 Abiga bi Yesu ba a nga na ku,
ni zhi ma di,
“Angginggi du ùwà re ku anishirr ba na assurre?”
11 Uwa ddu ba di,
“A ka tsarr imba aseki ka nggo à sha ka sharri ni itu i Ittu i Unkplassu yi ba.
Uwa a ta si abanu ba na anko,
a sha aseki angga ka sharri ba.
12 Undurr wa nggo à hi inkindirr,
Abachi à ta nu ma ihi zizo kakami,
du ma se na yi shishemi.
Uwa a ta su undurr wa nggo si hi inkindirr hen,
Abachi à ta vu ma kpa ihi ivintsɨ yi nggo a se na yi mi glo.
13 Inkindirr yi nggo i du ingga re na ba na assurre i si nggo:
“ ‘A ko kye,
na si kye hi hen;
na so wo,
na si vu gri hen,
na si hi inkindirr hen.
14 Ure ku nggo Ishaya uni kpa are wa à da ù jaku na atu ambarr wa di:
“ ‘Imba ta di wo ni so di wo mu yo;
ni ta di kye ni so di kye mu yo.
15 Isisurr i anishirr angga ba i tsɨ kyekye;
atu ambarr ka a si wo ure hen,
ashishi ambarr ka a kattu.
Wre ba a si ta kye hi na ashishi ambarr ka hen,
na si ta wo na atu ambarr ka hen,
na si ta ri amarr hi ni isisurr imbarr yi hen,
na si ta kanga ni ingga ku,
ni di ingga du ba wre ni ivri imbarr yi hen.’a
16 Abachi à na wre ki imba nu nggo a du ashishi amba ka a kye hi,
na du atu amba ka a wo ure.
17 Ingga so da ki imba ure ujiji mu di abi kpa are shishemi na abi na wre abi kuchi ba nggo a zha ihi inkindirr inggi yi nggo imba i hi na si hi yi hen,
na zha iwo inkindirr yi nggo imba i wo na si wo yi hen.
Yesu da ba inkpi i assurre a uni do wa
18 “Imba wo yi,
ki,
uwanggo yo si inkpi i assurre a uni do wa:
19 Abangga ba nggo wo ure ku ni itu Ittu i Unkplassu yi,
na si hi inkpi yi hen,
a si nâ ta si ingbingbi ikiri yi nggo kusurr na anko,
mre umimi wa nga ni vu ba kpa inkindirr yi nggo a tsarr ba na yi glo.
20 Ingbingbi ikiri yi nggo i kusurr na ako han ka,
abangga si anishirr ba nggo a kpa ure ku korrmi na nyarr nggo a wo ku.
21 U ku si rri ba ni isisurr tanko hen.
Nggo ivri,
ka iha numa ti nga ba ni itu i ure yi,
aba ka ko nu ugo.
22 Uwa ta si ikiri inggi yi nggo i kusurr ni intto yi,
abangga a si abangga ba nggo a wo ure ku,
ivri i izharr iki ingbingbru inggi yi,
ni ivri isisurr na aseki,
a turr ure ku huzzu ni isisurr imbarr yi du ku si na undu hen.
23 Uwa ta si ikiri inggi nggo i kusurr ni imimi i iwre yi,
abangga a si abangga ba nggo a wo ure ku na hi inkpi yi.
Aba yo ato ambarr wa di klo inkpinkpo,
ato numa ayirr yirr mri inkindirr yi nggo a ttu nggo,
abanu ato iso tani,
abanu ato iso tarr.”
Assurre a uwri
24 Yesu tsarr ba na assurre numa zizo di:
“Ittu i nkplassu i si nâ ta si ugo numa nggo à gri ingbingbi kiri ima izizi ku hi ni īlá ima.
25 Ni ibittu,
nggo anishirr rri ni kurr,
uni karr ma à gri ibibi uwri ndanda ku hi ku nu umi ku kiri ku,
na kuma nado.
26 Nggo ikiri yi furr ni ko hru ni ko surr ingbingbi,
aba kakye akpukparr wa a gru ko furr huzzu.
27 “Amirr iko ba akikye uni īlá wa ku da ku di,
‘Ankpye,
ùwà gri ingbingbi ikiri iwre nggi ku ttu ni īlá yi,
uwri u zhi nu momo mu?’
28 “Uwa à ddu ba di,
‘A su uni karr unushirr nggo na meme.’
“Amirr iko ba zhi ma di,
‘Ùwà zha inta bu ku kpo uwri ku kahre?’
29 “Uwa à kisa ba di,
‘Iya,
nggo imba ti di imba ta ku kpo uwri ku kahre,
imba ta kpo ikiri yi kye.
30 Du ikiri yi nu uwri kri ndo mi,
ma nu uga.
Ingga ta da ku abi ihwa ba nu uga du ba sarr uwri ku ssubi na lo ku zu na ambwa na ambwa,
wre nggo a taka yo uru,
na ta hwa ikiri yi gri ku surr ni iwurr amungga wa.’ ”
Assurre a ingbingbi i mosita
31 Yesu gru so tsarr ba na assurre numa zizo di:
“Ittu i unkplassu yi i si nâ ta si ingbingbi i unkunkurr numa nggo a yo ku du mosita nggo unushirr gri ku ttu ni īlá ima.
32 Ingbingbi ima iyo di si ivintsɨ yi mri kakami nu umi ku ingbingbi i inkinkurr yi we.
Aba ti ttu yi i di zzu,
ni furr.
U ku yo di kaki unkunkurr unkpi ku nggo aminche bu unkplassu ba ku di hun so na me ako ni inggingga ima yi.”
Assurre a imbimbru iyisti wa
33 Yesu da ba assurre numa zizo di:
“Ittu i unkplassu yi si ma mi:
Ayamba numa nggo à du uwa à ta na unfonfo na sha imbimbru iyistib ntsɨ kasurr ni imbimbru ikpu na agbugba,
na han yi ba zu,
imbimbru ikpu yi i gru si ssu na agbugba wa.”
Inkindirr yi nggo du Yesu na undu na assurre
34 Yesu na undu na assurre ni itsarr anishirr ba aseki ka we.
A si di da ba inkindirr numa gigyemi sama na assurre hen.
35 A di na ba meme nâ ta si nggo uni kpa are wa à da di:
“Ingga ta re na assurre nggo ingga ti ta re na anishirr ba.
Ingga ta da ba inkindirr yi nggo a sha yi sharri ba bazhi nu nggo a na ingbingbru yi mu nggo.”c
Yesu da ba inkpi i assurre a uwri wa
36 Nggo Yesu gru rri kuma nu umi iko,
na du anishirr ba,
abiga ma ba gru kuma na ku,
ku da di,
“Bre ki inta inkpi i assurre a uwri wa.”
37 I Yesu ka sa ba di,
“Ugo wa nggo à hi ingbingbi ikiri i zizi yi nggo à su Uvuvurr a Unushirr.
38 Īlá yi inggi su ingbingbru yi.
Ingbingbi ikiri zizi yi inggi sa anishirr ba we nggo a kaki anishirr bi ittu ba.
Uwri ku u si abangga ba nggo a sa abu umimi wa.
39 Unikarr wa nggo kuma ku hi uwri ku nggo asi Isheta.
Ihwa inggi i si ivi i ikikre yi,
abi ihwa abangga sa abitu ba Abachi ba.
40 “Nâ ta si nggo a ta nggurr uwri ku bi na tu ku nu uru,
i taka si meme yo ni ivi i ikikre i ingbingbru yi.
41 Ingga Uvuvurr a Unushirr taka tu abitu amungga ba du ba ku hla glo nu umi ki Ittu mungga ku anishirr ba we nggo di na ku abanu anko a ikuhre we,
na di na aseki amimi.
42 A taka vu ba surr nu uru unkpi,
nabo yo aba ta yì,
na ta anyinyirr.
43 Anishirr bi na wre ba ta la zanzarr zzu azhi mu ni ittu i Aki ambarr yi.
Undurr wa nggo ti se na atu ka iwo ure,
uwa bu wo.
Assurre a inkindirr itsɨ anta yi nggo kurr sharri
44 “Ittu i unkplassu yi i si nâ ta si inkindirr ì tsɨ anta nggi nggo undurr gri ku sharri ni īlá.
Nggo undurr numa à ku hi yi na ttu yi kuma ku sharri zizo,
na nyarr na kru ku vu aseki ka nggo a zu ni iko ima yi a re namri,
na kakuma ku re īlá ima yi.
Assurre a ingbinta iwre yi
45 “Ittu i unkplassu yi zizo i si nâ ta si uni re iki nggo di zha angbinta ka tsɨ anta.
46 Nggo ku hi iyirr inuma nggo i tsɨ anta kakami,
na kakuma ku vu aseki ka nggo a se na ka ni iko ima nggo a re tsatsarr,
na kuma ku re ingbinta yi.
Assurre a azhizhi ka vɨ ikikla
47 “Zizo,
Ittu i Abachi yi,
i zzu nâ ta si izhizhi i vɨ ikikla,
nggo di yo ni inyi na vɨ ikikla na nkanka.
48 Nggo i ti ssu,
abi vɨ ikikla ba a gba yi na azhizhi ssuzzu na abi,
na ji so na hla izizi yi surr ni igbigba,
na vu indanda yi kahre.
49 I taka si meme yo na azhibarr a ikikre wa.
Abitu ba Abachi ba a taka nga ni ddu anishirr amimi ba ki nanka na anishirr azizi ba.
50 Abitu ba Abachi ba a taka ta anishirr amimi ba tu surr nu uru.
Nabo yo aba taka yì na ta anyinyirr ku ivri.”
Are jiji akuku na ahe̱he̱
51 Yesu à zhi ba di,
“Imba ssu aseki angga ka hi we?”
Aba kpanye ku di,
“Yo-o,
inta ssu ka hi we.”
52 Yesu ddu ba di,
“Inkpi inggi si di abitsarr na Are ba we,
nggo a ka tsarr ba Are ka Ittu i Unkplassu yi ba a si nâ ta si akikye ni iko wa nggo à vu aseki he̱he̱ na akuku huzzu nu uki ku zu aseki umaku.”
A kà Yesu nu Nazareti
53 Nggo Yesu à bre assurr are angga ka kre na gru chi ka na anga ka igbu akama.
54 Na kuma ni igbu ni ngri ama wa.
Na ku so tsarr anishirr ba ure ku Abachi ku nu uki ku issubi ku.
Aba kye itsarr ima yi na vu angu gri,
na zhi di,
“Unggonggo a nu ugo nggo ihi inggi yi nu ukyekye ku ina iki ikagri yi?
55 Wanggo si su uvuvurr a unitarr wa yo hen?
A si yo ayirr wa yo di Maryamu hen,
nggo amuyirr ba yo a si anu Yakubu,
Isuhu,
Sima tuku Yahuda hen?
56 Amuyirr animba ba wemi a si so ni inta ba ni inggya hen?
Ugo nggo kpa ukyekye ni ihi inggi yi zhi nu momonggo?”
57 Aba a kpa vri ku kakami na kà ikpanye na ku.
I Yesu ddu ba di,
“A di kye uni kpa are ssu nu ungo na abi,
na di kpa ma chirr ni igbu ama tuku ni iko ima.”
58 Na si na aseki ka ikagri shishemi nabo hen,
nggo anishirr ba a si yo isisurr na ku hen.