Nopiltzi̱n,

xikchi̱wa ken iga mitzno̱no̱tza motaj,

iwá̱n amo xike̱lka̱wa ken iga mitzne̱xtilij moye̱ꞌ.

Ximomelaꞌconfia̱ro nokta ipan toTe̱ko,

amo ximoconfia̱ro ipan yej tejpa tikmati.

Xikejla̱nto Dios ipan nochi yej tikchi̱wa iwá̱n yéj mitzpale̱wi̱j iga xiye̱ꞌnemi ipan ye̱ꞌojti.

Ijkó̱n ken te̱taj kajajwa ipiltzi̱n iga kipoxneki,

ijkó̱n no̱ Dios kajajwa inochi yej kineki.

Yej te̱ne̱xtiliá itájto̱l toTe̱ko,

te̱ta̱wiá ka̱n takomichka̱n;

kua̱ꞌ itájto̱l te̱no̱no̱tza iwá̱n teajajwa,

inó̱n teojmaka iga matiye̱ꞌnemika̱n.

Te̱piltzi̱n yej kitapejpena ken iga nemi,

kiyo̱lchika̱wa itaj;

eꞌ te̱piltzi̱n yej xejxe̱toꞌnemi,

kiyo̱lmiktiá iye̱ꞌ.

Yej pox tajtajtowa,

kijtowa miaꞌ tájto̱l yej ajaye̱kti,

eꞌ yej kitapejpena yej kijtowa,

inó̱n sí,

kimati kén iga ye̱ꞌnemi.

Te̱piltzi̱n yej kimati katiapa yej ye̱kti,

kitajto̱lkaki itaj kua̱ꞌ kino̱no̱tza;

eꞌ yej kaja̱wilmati Dios,

ayá̱ꞌ kikaki malej iga kajajwaj.

Yej ye̱ꞌtajla̱ntoꞌ kitapejpena achto te̱ yawi kijto̱ti,

eꞌ yej santajtajtowa,

igá̱najsan mopojpolowa.

Yej ayá̱ꞌ kichiliya̱rowa ipiltzi̱n kua̱ꞌ kichi̱wa yej aye̱kti,

inó̱n ayá̱ꞌ kineki;

eꞌ yej kineki ipiltzi̱n,

kichiliya̱rowa kua̱ꞌ kajasi.

Yej xejxe̱toꞌnemi ayá̱ꞌ kikakisneki kua̱ꞌ kino̱no̱tza itaj;

eꞌ yej kitajto̱lkaki kua̱ꞌ kino̱no̱tzaj,

inó̱n kimatis ken iga ye̱ꞌnemis.

Te̱piltzi̱n yej kitapejpena ken iga nemi,

kiyo̱lchika̱wa itaj;

eꞌ te̱piltzi̱n yej xejxe̱toꞌnemi,

iga yéj,

pi̱na̱wa iye̱ꞌ.

Ye̱ꞌtájto̱l tzope̱liꞌ ken tikita nekti;

te̱yo̱ltzope̱liá wa̱n teachitialtiá.

Yej kimati ken iga maye̱ꞌnemi,

ayá̱ꞌ pox tajtowa.

Yej xe̱toꞌnemi,

no̱ wel kijli̱skej iga ye̱ꞌtajla̱ntoꞌ,

siga ayá̱ꞌ pox tajtowa.

Xikno̱no̱tza mopiltzi̱n mie̱j weljoꞌ,

amo santá̱ꞌ motechko mopojpolo̱j.

Ta̱gaꞌ yej ye̱ꞌnemi,

ipilowa̱n pa̱kij iga kichi̱waj kensan kichi̱wa itaj.

Xikne̱xtili mochoochi̱n kén iga maye̱ꞌnemi;

ijkó̱n kua̱ꞌ yó̱leja ayá̱ꞌ kikajte̱was ye̱ꞌojti.

Amo ximajmawi iga tikchiliya̱rowa mochokotzi̱n kua̱ꞌ kichi̱wa yej aye̱kti,

porque iga tikmagas ayá̱ꞌ tia tikmikti̱ti,

ma̱jwaꞌ tikma̱nawi̱j iga amo mamopojpolo.

Te̱taj yej kipiá ipiltzi̱n yej wel kitapejpena kén iga ye̱ꞌnemi,

inó̱n te̱taj kajasi iga mapa̱kto.

Ken se̱ a̱ltepe̱ꞌ yej ayá̱ꞌ kola̱ltitoꞌ,

awel moma̱nawiá iga ayá̱ꞌ tzaktoꞌ;

ijkó̱n se̱ ta̱gaꞌ yej ima̱tika awel kichi̱wa iga maye̱ꞌnemi.

Chilillo iwá̱n tano̱nó̱tzal te̱ne̱xtiliá ken iga matinemika̱n;

eꞌ chokotzi̱n yej ayá̱ꞌ kino̱no̱tzaj,

yéj itechko iga pi̱na̱was iye̱ꞌ.

Xikno̱no̱tza mopiltzi̱n,

iwá̱n wel tiye̱ꞌonos,

iwá̱n yéj mitzyo̱lchikajtos.

Imo̱nsajyo siwa̱ꞌ wel te‑i̱xkajkaya̱wa,

eꞌ se̱ siwa̱ꞌ yej kiweyimati̱ltiá toTe̱ko,

kajasi iga mamoye̱ꞌita.

Má̱j vale̱rowa se̱ chokotzi̱n yej ayá̱ꞌ motapialiá yej kitapejpena ken iga maye̱ꞌnemi,

que se̱ rey yej wé̱weja iwá̱n xe̱toktiꞌ,

yej ayá̱ꞌ kineki agaj makino̱no̱tza.