On tlaneltokakej noneki kauiliskej Dios ma kinmandaro
4
¿Kanon ualeua ika nemokualaniaj niman nemouijsoki?
Ualeua itech on xkuajli nemoeleuilis* yejuan sanoyej* tekiti ipan nemoyojlo.
2 Nemejuamej nenkinekij itlaj,
niman san pampa xueli nenkipiyaj,
nentemiktisnekij.
Tla se kipiya itlaj kualtsin,
nennexikolmikij,
niman pampa xueli nenkipiyaj,
nemokamauijsojkij teuan niman nenteuijsokij.
Xnenkipiyaj tlen nenkinekij pampa xnenkitlajtlaniliaj Dios.
3 Niman ijkuak nentlajtlanij,
xnenkiseliaj,
pampa nentlajtlanij ikan xkuajli eleuilistli.
Nenkinekij nenkitlajtlaniskej para nenkitekitiltiskej ipan on tlen xkuajli nemoeleuilis* kineki.
4 ¡Ay nemejuamej tlakamej yejuan xok nenkitokaj Dios!
Nemejuamej ken sen siuatl yejuan auilnemi.
¿Xnenkimatij ika on yejuan kinekij ikan xkuajli eleuilistli on tlajtlamach* yejuan onkaj ipan in tlaltikpaktli,
yejuamej nochiuaj itlauelikniuan Dios?
San akinon yejuan ikan xkuajli eleuilistli kineki on tlajtlamach* yejuan onkaj ipan in tlaltikpaktli nochiua itlauelikniu Dios.
5 Maka xnemilikan ika on Yektlajkuilojli xitlaj* kijtosneki ijkuak ijkin kijtoua:
On iEspíritu Dios yejuan okuajtitlan totech sanoyej kualani
ijkuak ikoneuan kitokaj on tlen xkuajli.
6 Pero Dios techpaleuiya ikan iueyitetlajsojtlalis para tiktlanij on xkuajli toeleuilis*.
Yejua ika,
on Yektlajkuilojli kijtoua:
Dios xkinselia on yejuan noueyimatij,
yej kimpaleuiya ikan iteiknelilis* on yolyemankej.
7 Yejua ika tej,
xmotemakakan itech Dios niman xkixnamikikan on diablo*,
niman ijkon yejua mechtlalkauis.
8 Xnisiuikan Dios niman yejua mechnisiuis.
Nemejuamej tlajtlakolejkej,
xmokixtilikan nemotlajtlakoluan ken sen tlakatl kinokixtilia on tlajli ijkuak nomajtekiya.
Nemejuamej yejuan nenkinekij tlajtlamach* ipan in tlaltikpaktli ikan xkuajli nemoeleuilis* niman no nenkinekij nenkitokaskej Dios,
xchipauakan nemoyojlo.
9 Xmajmanakan,
xmoyolkokokan,
niman xchokakan.
Xmoteltikan maka sa xuetskakan,
yej ma kisa nemixayo.
Xmoteltikan maka sa xpakikan,
yej peua xmajmanakan.
10 Xmoyolyemanilikan ixpan toTEKO,
niman yejua mechueyilis.
On tlaneltokakej xkitocaroua noteneuiliskej tlen xkuajli iuan oksekimej
11 Nokniuan,
maka xmoteneuilikan on tlen xkuajli iuan oksekimej.
On yejuan kiteneuilia sen tokniu on tlen xkuajli noso kitlajtlakolmaka,
xkitlakaita on tlanauatijli yejuan technauatia para titotlajsojtlaskej* iuan oksekimej.
Niman tla tikijtoua ika on ley xkuajli,
timochiua sen juez niman yej xtiktlakamati.
12 Pero san Dios okitemakak on tlanauatijli niman san yejua teyolkuitia niman tetlajtlakolmaka.
Yejua uelis techmakixtis noso techtlajtlakolmakas.
Pero tejua,
¿tiakinon para tikijtos tla sen tlakatl okichiu on tlen kuajli noso xkuajli?
On tlaneltokakej xkitocaroua noueyimatiskej
13 Xkakikan yejua in,
nemejuamej yejuan nenkijtouaj:
“Aman noso mostla tiaskej neka ipan sen ueyikalpan,
niman ompa tinemiskej se xipan,
niman titlanamakaskej,
niman tiktlaniskej miyek tomin.”
14 Nemejuamej xnenkimatij tlinon nochiuas mostla.
Aman tej,
¿tlinon kijtojtikaj nemonemilis?
Yejua sano ijki ken on ayautli yejuan uajnonextia pero nimantsin popoliui.
15 Yej ijkin noneki nenkijtoskej:
“Tla toTEKO kineki,
tinemiskej niman tikchiuaskej yejua in,
noso itlaj okse tikchiuaskej.”
16 Pero nemejuamej yej nenkijtouaj oksekneka.
Nemoueyimatij ika nenkiyakatstlaliaj on tlen nenkichiuaskej.
On nemoueyimatilis sanoyej xkuajli.
17 Sen tlakatl yejuan kimati tlen kuajli para kichiuas niman xkichiua,
tlajtlakoua.