SANTIAGO
ITLAJKUILOL ON APÓSTOL SANTIAGO
Santiago kintlajkuiluiya on tlaneltokaj yejuan ueuejka chajchayajtokej
1
Nejua,
Santiago,
niitekitkau Dios niman toTEKO JesuCristo.
Nemechtlajpaloua nemejuamej majtlaktli iuan ome familias tekoneuan itech Israel yejuan nenchajchayajtokej nochiuiyan ipan in tlaltikpaktli.
On tlaneltokakej noneki pakiskej ijkuak tlajyouiyaj
2 Nokniuan,
xpakikan sanoyej* ijkuak nemejuamej nenkijyouiyaj tlajtlamach* pajsolouilistli
3 pampa ye nenkimatstokej ika ijkuak on pajsolouilistli kitlatlatas nemotlaneltok.
Sano yejua nemotlaneltok mechkojtilis para más nenkixikoskej nochi on tlajtlamach* ikan yolchikaualistli.
4 Pero xkauilikan on xikoualistli ma tlami kipatla nemonemilis,
para nenyolchikajkej yeskej niman xitlaj* mechpolos.
On tlaneltokakej noneki kitlajtlaniliskej Dios tlamatkilistli
5 Tla semej nemejuamej xnenkimatij on tlen kuajli nenkichiuaskej,
xtlajtlanilikan Dios tlamatkilistli*,
niman yejua miyek mechmakas.
Yejua tej,
melauak nochimej kinmaka,
niman xitlaj* kiteixkomaka.
6 Niman ijkuak nenkitlajtlaniliskej tlamatkilistli,
xneltokakan ika yejua melauak mechmakas.
Maka xometlamatikan tla mechmakas noso ka,
pampa on yejuan ometlamati sano ijki ken on atl yejuan onkaj ne ipan mar.
On ajakatl koxonia niman kuajmapeua nanika niman oksejpa neka kitilana.
7 On yejuan ijkon kinemilia,
ma kimati ika xkiselis itlaj itech toTEKO.
8 Yejua sen ometlamatketl niman xkimati tla kuajli noso tla xkuajli tlinon kichiua.
On tlaneltokakej xkitocaroua kitlaliskej inyojlo itech on riquezas
9 On tokniu yejuan mayanki,
ma kipiya paktli pampa Dios kitlakaita niman kueyilia.
10 Niman on tokniu yejuan kinopiyalia miyek,
ma kipiya paktli pampa xok kitlalia iyojlo itech on tlen miyek kipiya.
On yejuan kinopiyalia miyek,
sano ijki ken sen xochitl yejuan onkaj ipan tepetl yejuan xkaman ueli uejkaui onkaj.
11 Ijkuak kisa tonajli niman peua chikauak tona,
on xochitl pilini niman ixochiyo uetsi,
niman on ikualtsinyo popoliui.
On yejuan kinopiyalia miyek popoliui sano ijki ken on xochitl.
Yejua miki ipan on miyek tekitl kipiya.
On tlaneltokakej noneki kixikoskej tlajtlamach* pajsolouilistli niman tetlatlatalistli
12 Tlatiochijtli yes sen tlakatl yejuan kixikos on pajsolouilistli,
pampa ijkuak kuajli yokixikoj,
kiselis sen corona ken itetlayokolil.
Kiselis yenkuik nemilistli para nochipa yejuan Dios okitlalij ipan ipromesa para on yejuan kitlajsojtlaj*.
13 Ijkuak yakaj kiselia tetlatlatalistli para ma tlajtlako,
xkuajli para kijtos ika Dios kitlatlata.
Yejua in melauak,
pampa Dios xkaman kiselia tetlatlatalistli para ma tlajtlako,
nion yejua xkaman kitlatlata yakaj para ma tlajtlako.
14 Sano yejua on xkuajli ieleuilis* sen tlakatl kitlatlata para ma tlajtlako ijkuak ieleuilis* kiyekana hasta kijtlakouilia itlamachilis.
15 On xkuajli eleuilistli yejua kitsmolinaltia on tlajtlakojli.
Niman ijkuak on tlajtlakojli yokichiu,
on tlakatl miki ixpan Dios.
16 Notlajsojkaikniuan,
maka xmixkajkayauakan.
Maka nenkinemiliskej ika Dios mechtlatlata para xtlajtlakokan.
17 Nochi kuajli tetlayokolijli* yejuan tikseliaj ualeua ne tlakpak.
Nochi on tetlayokolijli* ualeua itech toTajtsin yejuan okichijchiu nochi on tlauiltin ne ipan cielo*.
ToTajtsin xken on tlaseuajlomej yejuan nochipa nopatlajtiu,
yej yejua nochipa kichiua on tlen kuajli.
18 Dios otechselij tiikoneuan itechkopa on temachtijli yejuan melauak.
Ijkon okichiu para tejuamej ma tinemikan ken on achtoj ikoneuan itech nochi on tlajtlamach* yejuan okichijchiu.
On tlaneltokakej noneki kakiskej itemachtil Dios niman kitlakamatiskej
19 Notlajsojkaikniuan,
nikneki para nenkimatiskej yejua in:
Cada se de nemejuamej noneki nemis listo para nentlakakiskej.
Pero no xmatikan ika xmechtocaroua nimantsin nentlajtoskej,
noso nimantsin nenkualaniskej,
20 pampa ijkuak sen tlakatl kualani,
yejua xkichiua on tlen Dios kuelita.
21 Yejua ika tej,
xkajkauakan nochi tlen xchipauak niman nochi miyek tlajtlamach* yejuan xkuajli onkaj.
Xselikan ikan yolyemanilistli* itemachtil Dios yejuan okitlalij ne ipan nemoyojlo.
Yejua tej,
temachtijli kipiya poder para kimakixtis nemoalma.
22 Maka san xkakikan on temachtijli,
yej xchiuakan tlinon mechijlia on temachtijli.
Pampa tla xnenkitlakamatij,
sano nemejuamej nemokajkayauaj.
23 On yejuan san kaki on temachtijli niman xkitlakamati,
sano ijki ken sen tlakatl yejuan kita ixayak ipan sen espejo.
24 Yejua kita ixayak kenijki onkaj,
pero ijkuak yokitlalkauij on espejo,
nimantsin kelkaua kenijki onkaj ixayak.
25 Pero tla sen tlakatl kinomachtia ikan nochi iyojlo on tlanauatijli yejuan ajsitikaj* niman yejuan techmanauiya,
tla ijkon,
yejua tlatiochijtli yes ipan nochi on tlen kichiuas.
Pero on tlakatl ika onkaj nomachtijtias mojmostla,
niman xkelkauas on tlen kinomachtia,
niman no kichiuas on tlen kijlia on temachtijli.
26 Tla yakaj kinemilia ika kuajli kipiya itlaneltok ixpan Dios niman xkipiya cuidado ken tlajtlatos,
sano yejua nokajkayaua niman on tlen kineltoka xitlaj* kijtosneki.
27 On tlaneltoktli yejuan xkipiya ijtlakauilistli,
yej kipiya chipaualistli ixpan Dios,
kijtosneki ika on tlakatl kimpaleuis iknomej niman siuakaualtsitsimej* ika on tlen kimpoloua,
niman xkichiuas on tlen xkuajli yejuan kichiuaj on tlaltikpaktlakamej.