Yejkos on xompayejyeuatlakatl
2
Aman nokniuan,
temechijliskej de on ijkuak uajlas JesuCristo niman techsentlalis itech.
Sanoyej* temechtlajtlaniliaj
2 maka nimantsin nenometlamatiskej.
Maka xkauilikan yakaj mechtlamachilispolos nion maka nemomojtiskej tla yakaj kijtos ika okiselij sen tiotlajtojli,
noso kijtos okiselij sen tlajkuilolamatl yejuan otikmakakej kampa kijtos ika toTEKO yopanok ika uajlas.
3 Maka yakaj xmokauilikan itlaj ika mechkajkayauas,
pampa antes yejkos on tonajli,
achtopa miyekej kikauaskej Dios,
niman nonextis on xompayejyeuatlakatl yejuan kitlajtlakolmakaskej niman kontlajkaliskej miktlan.
4 Yejua kixnamikis nochi yejuan kipiya itokatsin Dios noso on tlen on tlakamej kimauistiliaj.
Niman ijki onotlalis ipan itiopan Dios ken melauak yejua yeskia Dios,
niman sano yejua noteneuas Dios.
5 ¿Xnenkelnamikij ika ijkuak sanken* ninemiya nemouan nemechijliaya nochi in?
6 Niman aman nenkimatstokej tlinon kiteltia on xompayejyeuatlakatl para maka uajlas ijkuak xe ajsi on tiempo para yejua.
7 Amantsin ipoder on xompayejyeuatlakatl ye tekititikaj san ichtaka*.
Pero on yejuan aman kiteltijtikaj ipoder,
san poliui kejkuaniskej.
8 Kemaj uajnonextis on xompayejyeuatlakatl,
pero toTEKO Jesús kimiktis ikan ijyo yejuan kisa ipan ikamak,
niman kixoxotonis ikan ipetlanalis ijkuak uajlas.
9 Yejkos on xompayejyeuatlakatl iuan ipoder Satanás niman kichiuas tlamauisoltin,
niman milagros* yejuan teixkajkayauaskej.
10 Kiteititis miyek tlajtlamach* yejuan xkuajli para ika kinkajkayauas on yejuan yauij ipan popolouilistli.
Yejuamej popoliuiskej pampa xokiselijkej nion xokitlajsojtlakej on tlen melauak para nomakixtiskej.
11 Yejua ika,
Dios kinkauilia ma nokajkayauakan ika on tlakajkayaualistli para ma kineltokakan on tlen xmelauak,
12 niman para ijki kintlajtlakolmakaskej nochimej on yejuan xokineltokakej on tlen melauak,
yej okuelitakej más on tlen xkuajli.
Nemij tlatlapejpeniltin yejuan makisaskej
13 Pero noneki nochipa tikmakaskej tlaxtlauijli Dios nemopampa,
tokniuan yejuan toTEKO mechtlajsojtla*,
pampa Dios omechtlapejpenij para achtoj onentlaneltokakej de on oksekimej.
Onemomakixtijkej itechkopa ipoder on Espíritu Santo para onemochijkej iyekkoneuan ijkuak onenkineltokakej on tlen melauak.
14 Yejua ika in,
Dios omechnots itechkopa on kuajli tlajtojli yejuan kiteijlia ken Dios temakixtia,
yejuan tejuamej temechmachtiaj,
para no touan nenkiseliskej on iueyilis toTEKO JesuCristo.
15 Yejua ika nokniuan,
xmoyolchikauakan ipan nemotlaneltok,
niman xkejeuakan on temachtijli yejuan otemechijlijkej ijkuak tinemiyaj nemouan niman yejuan otemechtlajkuilolmakakej.
16 Ma toTEKO JesuCristo,
niman Dios toTajtsin,
yejuan techtlajsojtla* niman ikan iteiknelilis* otechmakak yolseuilistli para nochipa niman sen kuajli tlamachalistli*,
17 ma mechyoleua niman ma mechmelajkatlali para nenkijtoskej niman nenkichiuaskej nochi tlen kuajli.