5
Nokniuan,
xnoneki temechtlajkuiliskej de on tiempo ijkuak uajlas toTEKO.
2 Nemejuamej kuajli nenkimatstokej ika on tonajli ijkuak uajlas toTEKO,
yejkos ijkuak xakaj kimachixtikaj,
ijkon ken on tlachteketl uajlau ijkuak tlayoua.
3 Ijkuak on tlakamej kijtojtiaskej:
“Onkaj yolseuilistli niman xakaj nion itlaj uelis techmiktis”,
nimantsin uajlas tlaxoxotonilistli impan yejuamej niman xuelis yejteuaskej.
Nochiuas ken ijkuak on siuatl san uajpejtetsi nokokoua para kinemitia ikonetsin.
4 Pero nemejuamej nokniuan,
xnennemij ipan tlayouajlotl.
Yejua ika,
on tonajli ijkuak uajlas toTEKO,
xuelis mechajsitejkos ken yakaj tlachteketl,
5 pampa nochimej nemejuamej nentekoneuan ipan tlauijli niman ipan tonajli.
Nemejuamej xnentekoneuan kampa tlayouatok nion ipan yeuajli.
6 Yejua ika tej,
maka ma tikochikan ken oksekimej,
yej ma titlajtlachixtiakan ikan kuajli totlamachilis.
7 Nochi tlakatl kochi ipan yeuajli,
niman nochi tlakatl yejuan tlauani,
ken tlauantikaj ipan yeuajli.
8 Pero tejuamej yejuan titekoneuan ipan tonajli,
ika onkaj ma nochipa tinemikan ikan kuajli totlamachilis.
Ma titotsakuilikan ikan totlaneltok niman totetlajsojtlalis* ijkon ken sen soldado notsakuilia iyelpan ikan sen escudo*.
Niman no ma tikpiyakan tlamachalistli* de on temakixtilistli sano ijki ken on casco yejuan ika kimanauiya itsontekon sen soldado.
9 Ijkin ma tikchiuakan,
pampa Dios xotechtlalij para tikseliskej itlauel,
yej para tikseliskej temakixtilistli itechkopa toTEKO JesuCristo.
10 JesuCristo topampa omik para san sekan iuan tinemiskej,
san kenijki tla xe timikij noso tla yotimikkej ijkuak uajlas.
11 Yejua ika,
xmoyoleuakan iuan cada se,
niman xmoyolchikauakan ikan tlaneltoktli iuan oksekimej ijki ken nenkichiuaj.
Pablo kintlakanonotsa on yejuan kineltokaj Cristo
12 Nokniuan,
sanoyej temechtlajtlaniliaj xkimpiyalikan tetlakaitalistli on yejuan tekitij nemouan,
yejuan mechyekanaj niman mechtlakanonotsaj,
pampa yejuamej kipiyaj tlanauatijli de toTEKO.
13 Xkintlakamatikan niman xkintlajsojtlakan* sanoyej ipampa on tekitl yejuan kichiuaj.
Xnemikan ikan yolseuilistli cada se inuan oksekimej.
14 No ijki sanoyej temechtlajtlaniliaj,
nokniuan,
para xkinchikajkanotsakan on yejuan xkinekij tekitiskej,
xkinyoleuakan on yejuan notsinkixtiaj,
xkimpaleuikan on yejuan xkojtikej ipan intlaneltok,
niman xpiyakan ijyouilistli inuan nochimej.
15 Xmotakan sano nemejuamej.
Tla yakaj kichiuiliaj itlaj xkuajli,
maka tetlakuepiltis ika on tlen xkuajli.
Yej nochipa xchiuakan on tlen kuajli para on tokniuan niman para nochi tlakatl.
16 Nochipa xnemikan ikan pakilistli.
17 Nochipa xchiuakan oración.
18 Para nochi tlen nemopan nochiuas,
xmakakan tlaxtlauijli Dios,
pampa yejua ijki kineki para xchiuakan yejuan nenkineltokaj Cristo Jesús.
19 Maka xteltikan on tlen kineki kichiuas on Espíritu Santo.
20 Maka xchichiuakan on tiotlajtojli yejuan sekimej kiseliaj itech Dios.
21 Pero xkixtlalokan nochi,
niman xkejeuakan nochi tlen kuajli.
22 Niman xtlalkauikan nochi tlajtlamach* tlen xkuajli.
23 Sano yejua Dios,
on yejuan mechmaka yolseuilistli,
ma tlami mechyolchipaua.
Niman ma kejeua nemoespíritu,
nemoalma niman nemotlalnakayo para maka ijtlakauis ijkuak uajlas toTEKO JesuCristo.
24 On yejuan omechnots kichiuas nochi in,
pampa yejua nochipa kichiua on tlen kiprometeroua.
25 Nokniuan,
xchiuakan oración topampa.
26 Xkintlajpalokan nochimej tokniuan ikan ueyi tetlajsojtlalistli*a.
27 Nemechnauatia ikan itlanauatil toTEKO ma kinomachtikan in tlajkuilolamatl imixpan nochimej tokniuan.
28 Iueyitetlajtsojtlalis toTEKO JesuCristo ma onya nemotech.
Ma ijki nochiua.