2
Nikneki xmatikan ika sanoyej* ninotekimaka chikauak nemopampa,
niman impampa on yejuan nemij ipan on ueyikalpan itoka Laodicea,
niman impampa nochimej yejuan xnechixmatij.
2 Nikinnekilia para yejuamej ma noyoleuakan,
niman ma kuajli san sekan nemikan ikan tetlajsojtlalistli*.
Nikneki para kipiyaskej on riqueza de kajsikamatilistli para uelis kimatiskej on tlen Dios kiyantikatka yejuan sano yejua Cristo.
3 Ipan Cristo iyantikaj on tesoros de on tlamatkilistli* niman de on kajsikamatilistli.
4 Yejua in nemechijlia nemejuamej para maka yakaj mechkajkayauas ika tlajtojli yejuan kakisti melauak niman kualtsin,
pero xmelauak.
5 Maski nejua xnemouan ninemi,
nemechelnamiki ipan noyojlo.
Niman nipaki ika nikmati kuajli nemouikaj niman nenkipiyaj melajki nemotlaneltok itech Cristo.
6 Ijkon ken nemejuamej onenkiselijkej Cristo Jesús para nemoTEKO,
no xnemikan san sekan iuan.
7 Yejua ipan xpiyakan nemoneluayo ken on kojtli* noneluayotia ipan tlajli.
Niman yejua ipan xmokiktsikan ken on tepantli nokiktsia ipan on cimiento*.
Niman más xmokojtilikan ipan nemotlaneltok ijkon ken omechmachtijkej.
Niman xmakakan ueyi tlaxtlauijli Dios.
Yenkuik nemilistli itech Cristo
8 Xmotakan sano nemejuamej.
Maka yakaj xkauilikan mechkajkayaua ika on xkuajli temachtilistli tlen xmelauak.
On ken on tlajtlamach* temachtilistli,
san intemachtil niman incostumbre on tlaltikpaktlakamej.
On temachtilistli xkisa itech Cristo,
9 pampa nochi tlen Dios ika tentikaj,
tiuelij tikitaj itech Cristo.
10 Niman nemejuamej nententokej ikan inemilis Dios pampa nennemij san sekan iuan Cristo yejuan kinyekana nochimej on tekiuajkej niman nochimej on yejuan kipiyaj poder.
11 No ijki pampa Cristo nemi ipan nemoyojlo,
onenkiselijkej on neskayotl itoka circuncisión*.
Pero xejua on neskayotl yejuan notetlalilia ipan tenakayo ken kichiuaj on hebreos*,
yej ika on neskayotl yejuan Cristo okitlalij ipan teyojlo.
On yejuan kipiyaj on neskayotl ipan inyojlo xok kichiuaj on tlen inxkuajli eleuilis* kineki.
12 Ijkuak onemokuatekijkej,
onenkiteititijkej ika onemotlaltôkakej iuan Cristo.
Niman no ijki iuan onenyolijkej ikan yenkuik nemonemilis.
Nochi on onochiu pampa onenkineltokakej ipoder Dios yejuan ika okiyoliuitij* Cristo niman okuiteu ipan itlalkon.
13 Ipan okseki tiempo nemejuamej nenmiktoyaj ixpan Dios ipampa nemotlajtlakol niman ipampa ieleuilis nemotlalnakayo yejuan nenkipiyayaj.
Pero aman Dios mechmaka nemilistli iuan Cristo,
niman otechtlapojpoluilij nochi totlajtlakol.
14 Dios okipopoloj on amatlanauatijli yejuan kijtouaya tline techtlajtlakolmakaya.
Pero ijkuak Cristo omik ipan kojnepanojli*,
Dios okipopoloj on amatlanauatijli.
15 Dios okitlakijkixtilij on diablo* niman on yejuan kipiyayaj poder ipan ajakatl niman okimpijpinajtij teixpan ika on imikilis Cristo ipan kojnepanojli.
Xtejtemokan on tlajtlamach* yejuan kisa iluikak
16 Yejua ika,
maka xmokauilikan yakaj ma mechistlako ika on tlen nenkikuaj niman nenkonij,
noso ika tla xnenkichiuaj on iluimej,
noso ijkuak yenkuik metstli,
noso ika tla xnenkejeuaj on tonajli sábado.
17 Nochi onkatka ken itlaj itlaseuajlo on tlen ye onkatka para uajlas,
pero nochi on tlen melauak sano yejua Cristo.
18 Maka xmokauilikan mechkixtilikan nemotetlayokolil on yejuan nopouaj ken sanoyej* yolyemankej niman kinyekteneuaj on ángeles.
Yejuamej kijtouaj ika kiseliaj intlamatkilis* intechkopa on tlatlachalistin yejuan ken intemikpan,
niman sanoyej noueyimatij ikan intlamachilis yejuan san yejuamej kinemiliaj.
19 Yejuamej xnemij san sekan iuan Cristo,
yejuan yakatstikaj ipan on itiopan.
Yejua techtlakualtia niman techsaloua san sekan ken sen tlalnakayotl yejuan kuajli sajsalijtikaj nochiuiyan.
20 Pampa yonenmikkej iuan Cristo,
xok noneki nemouikaskej ipan intlanauatiluan niman imincostumbre on tlaltikpaktlakamej.
Yejua ika,
¿tline* sanken* nemouikaj ken on tlaltikpaktlakamej yejuan xkineltokaj Cristo?
¿Tline nenkitlakamatij on tlanauatiltin
21 yejuan kijtouaj:
“In maka xkua,
nion maka xmati,
niman nion maka xtelo”?
22 Nochi in tlanauatiltin kiteneua on tlajtlamach* yejuan san panoua niman tlami ijkuak kitekitiltiaj,
niman san on tlakamej ijkon tlanauatiaj.
23 Nochi in tlanauatiltin nesi melauak ken sanoyej ueyi kijtosneki,
pampa sanoyej kinekij nouikaskej ipan intlaneltok,
niman sanoyej nochiuaj yolyemankej maski xmelauak yolyemankej,
niman hasta kitlajyouiltiaj intlalnakayo.
Pero in xitlaj* ika kimpaleuiya para kixtiskej on xkuajli eleuilistli* ipan yejuamej.