Pablo okimpix tlatlachalistin yejuan ken itemikpan
12
Nikpiya tlinon ika ninoueyiteneuas,
maski xitlaj* niktlanis tla ninoueyiteneuas.
Ninoueyiteneua ika on tlatlachalistin yejuan ken notemikpan onikintak,
niman on tlajtlamach* yejuan toTEKO onechmachistij.
2 Ye kipiya majtlaktli uan naui xipan ika onechuikakaj iluikak kampa chanti Dios.
Xnikmati tla onechuikakaj ikan notlalnakayo noso xikan notlalnakayo,
yej san Dios kimati.
3 (Oksejpa nemechijlia ika xnikmati tla onechuikakaj ikan notlalnakayo noso ka,
san Dios kimati.)
4 Pero nikmatstikaj ika onechuikakaj iluikak kampa onikak on tlen xakaj kipiya tlajtojli para kiteijlis,
nion xnotekauilia para yakaj ma kiteijli.
5 Ueliskia ninoueyiteneuaskia pampa yoniajka iluikak,
pero xninoueyiteneua ika on.
Yej ninoueyiteneua ika on tlen kiteititia ika xnikojtik.
6 Niman tla nejua niknekiskia kuajli ninoueyiteneuaskia,
on xtontojyotl yeskia pampa nikijtoskia nochi on tlen melauak.
Pero xnikchiua para maka yakaj ma kinemili ika nejua más niueyixtikaj xken on tlen notech kitaj niman kakij.
7 ToTEKO onechtlatlachaltij keskipa ken ipan notemik.
Niman para maka ninoueyimatis ika on tlen sanoyej* kualtsin tlajtlamach* yejuan toTEKO onechititij,
onechkauilij sen tlajyouilistli yejuan ken itlaj uitstli yejuan Satanás kitekitiltia para nechtlajyouiltia ipan notlalnakayo.
Ijkon tej,
nechpajsoloua para xninoueyimati.
8 Niman yexpa yoniktlajtlanilij toTEKO para ma nechkixtili on tlajyouilistli.
9 Pero toTEKO nechijlia:
“Tikpiya noueyitetlajsojtlalis*.
Xitlaj más mitspoloua.
Nopoder más kuajli noteititia ijkuak sen tlakatl xkojtik.”
Yejua ika,
nipaki ninoueyimati ika xnikojtik,
pampa ijki nikpantlantia ipoder Cristo.
10 Nejua nipaki maski xnikojtik,
niman nechuijuikaltiaj,
niman nechpoloua tlajtlamach*,
niman nechtlaueltokatinemij,
niman nikijyouiya miyek tlajtlamach* ipampa Cristo.
Ijkin tej,
nipaki pampa ijkuak más xnikojtik,
Cristo nechmaka ipoder.
Pablo kominmatstikaj on yejuan tlaneltokaj ne Corinto
11 Yoninouikak ken sen loco pampa sano nejua ninokuajli teneua,
pero on nemejuamej onennechchiualtijkej ijki ma nikchiua.
Más kuajli yeskia yej nemejuamej kuajli noka nentlajtoskiaj,
pampa maski nejua xueyi nikijtosneki,
más ueyi nikijtosneki xken on apóstoles* yejuan nenkinseliaj ken uejueyixtokej.
12 Onemechititij ika melauak niapóstol* ika on tlamauisoltin,
tetlatlachalistin,
niman milagros,
maski onikxikoj seki pajsolouilistli ikan miyek ijyouilistli ijkuak nemotech oninen.
13 ¿Tlinon onikchiu para on oksekimej tiopamej yejuan xonikchiu nemotech?
¿San pampa onikinkauilij ma nechpaleuikan ika on tlen nechpolouaya,
nenkualanij?
Tla ijkon,
xnechtlapojpoluikan.
14 Aman ye ninemi listo para nemechontas ika yexpa,
niman oksejpa xitlaj* nemechtlajtlanis.
Nejua tej,
xniktejtemoua on tlen nenkipiyaj,
yej sano nemejuamej nemechtejtemoua,
pampa on tatajtin kintekipanoskej inkoneuan,
niman xejuamej on inkoneuan kitekipanoskej intauan.
15 Niman nejua ikan kuajli noyojlo niktemakas nochi tlen nikpiya,
niman xsan yejua on,
yej nejua no niktemakas nonemilis ipampa nemoalma.
Nikpiya noyojlo para ijkon nikchiuas.
Pero maski más nemechtlajsojtla* nemejuamej,
yej más xnennechtlajsojtlaj.
16 Maski nenkimatstokej ika xkaman itlaj onemechtlajtlanij,
sekimej kijtouaj onemechtlaixpachouilij ikan tlakajkayaualistli.
17 ¿Kenijki ouel ijkon onikchiu?
¿Tlen yej,
onemechtlaixpachouilij ijkuak onikintitlan on tokniuan nemotech?
18 Oniktlajtlanilij tokniu Tito para ma mechnotsati,
niman iuan oniktitlan okse tokniu.
Ijkuak Tito omechitato,
¿omechixpachouilij itlaj?
¿Tlen yej,
xnejli tikpiyaj san se toyojlo para itlaj tikchiuaj?
¿Tlen xnejli nouika ken nejua ninouika?
19 ¿Nemejuamej nenkinemiliaj ika titomanauisnekij nemixpan?
¡On xnejli!
Yej tejuamej titlajtouaj ixpan Dios niman ken toTEKO JesuCristo kineki.
Notlajsojkaikniuan,
nochi tlen tikchiuaj,
tikchiuaj para xmoskaltikan ipan nemotlaneltok.
20 Ninomojtia ika ijkuak nemechontas,
xnemechnextijtajsis ken nejua niknekiskia,
niman nemejuamej no xnennechitaskej ken nenkinekiskiaj.
Ninomojtia nikitas ika nemokamatlanij,
niman nemonexikolitaj,
niman nemotlauelitaj,
niman nentlauelnemij,
niman nentsotsokamej,
niman nenmijijtouaj,
niman nemoistlakouaj,
niman nemoueyimatij,
niman xkuajli nemouikaj.
21 No ninomojtia ika ijkuak oksejpa nemechontas sanoyej nipinauas ixpan Dios niman nichokas ipampa nomotlajtlakol yejuan desde yeuejkaui nenkuajchijtiuij.
Pampa xnenkajkauaj on tlen xchipauak,
on auilnemilistli niman nochi on tlen xkuajli yejuan xok ueli nenkajkauaj.