Te buku 1 Storime 2 Storidago nogi ebo dao, te buku si tomode te buku Samuel me buku King tomode pusali po tiwai hauwa ma pusai elalubao. Tede wali po hauwa te deli me bukude wali po tiwai hauwa mu ma wali, tiali goli te asęani bidigo homude asęani po page, te tedali dwasianu gasagi yai asęani. Te buku sigo te bidigo yali homu po te hanilama hania pusali.

(1) Mu dao, Israel hani augwaligo God tudiba mubaso, te haniani sęgęgo augwali dolali, tiali goli Godigo augwali mu tagalobeo. Menio. Godigo sę augwali dali me idubadi, agai augwa wąį nǫų dabe dali dąų wali bomai poba usu nainogo yalio. Te homu kolesaga hanilama ola mawai hagede yali, te buku sigo hanilama pusali po te wiegi yai sę dabe te king Devit, me Solomon, me Jehosafat, me Hesekia, me Josaia, augwali nogode pedelali sę po pusali.

(2) Te buku side wali po te Godigo Moni tempel be Jerusalemde te we bidigo Godiba lotu wabo kolesagade po hauwa elalubao. Te augwaligo mena page elalubaso, te kolesaga dabe pedelali, te buku side wali pogo hania hanilama ola mawai. Tama me, augwali sigo te pris dabego me te Livai hani dabe augwaligo ebo sęde po hania hanilama pusa mawai dao.

1 Storibukude te Israel dabe augwali bulali wąį nǫų dabe nogi asęani po elalubao, te Adamde gagalasa te king Solba usu nagasali. Tama agai te king Sol me king Devit si bidu yali sę po me pusai dao.