Hetman Josuago Po Elalubo Buku
Hasia Nedebo Po
Te buku Bomai Po tede Mosesgo si wali sogo te Godigo bomo yai po te Israel we bidi dabe augwalibolo ma ola mawai dao. Tama elama, tama Moses isali. Te e bukude te Israel dabego te Kenan moni tǫ sainu yali po dabe wai.
Te Israel hani dabe augwali te masigi kemi tǫ bulude bagula bilaludubadi, kibu be hauwa yali, te augwali bobage sogo te Godigo augwaliba mawaiba olama sa muani te tǫ sainogo tonalua peyu tama tialio. Tialima megi da, Godigo augwaliba usu da obaso, augwali te tǫ tomoba pali. Josua agai te Moses bidali pesage selama, tama aga te Israel dabe augwaligo polalubo tobolu bidi pedelali. Josuago bukude te Israel dabego yali sę po pusali, te gagalama peyu, te Jordan ąį nogelama pali, te Kenan dabe augwali bidali tǫ sainogo te boi hwįai dao. Te hwįani po hauwa te bukude elalubao. Te boi hwįani po bage te Godigo sa muyu dąį ilali sunumi wali peyu, te buku Bomai Po Dąį 20 tede wali po wali pelama, te tama tiali. God aga digi te augwaligo Aya bidiyu, te augwaligo boi hwįani side aga polasa pabo bidi tiwai elaluali, te agai augwa wąį nǫų dabe dali wali poba mu usu nai hagede tama tiai dao.
Josuago buku pedai sela elalubao. (1) Te Dąį 1-12de Israel dabe augwaligo te Kenan tǫ sali po elalubao. (2) Te Dąį 13-22de augwaligo te tigidali hani deli deliba te tǫ doba yali po elalubao. (3) Te Dąį 23-24de te Josuago silagasu wabo po obaso, tama te Israel dabe augwaligo te bomo yai po kontrak po ma dąų walalio. Augwaligo te po weyu bidada pabo sesemane sogo God deli naga wali peduaiba po dąų wali, magi baso meni, agai moni genuai bomo hanilama ola mawai dao.
Te Josuago silagasobo po wali, te Josuago homugo ma koneani te tigidali sę Godigo bomai nogogo yali sę agai te Abrahamde bulali wąį nǫų dabe augwaliba mawaiba wali tǫ saiba wali poba mu usu nai da, te homu yalio. Tama Josuago po hanilama pusuyu, tama wali, “Te dagego Genuai Bidiba lotu wabo homu isąbaso da, teda dagego bugagia homu kone palao. Te dagego deba lotu po waibawe? Tiali goli eno da, ena we wai puluba dali, dago te Genuai Bidiba lotu waibao.” Dąį 24:15de, te po elalubao. Te e bukude genuai koneabo polalubo homu kolesaga te dao.