So̱ꞌo̱ ni̱ xa̱a̱ a̱ kii̱ꞌ ni̱ xi̱ni̱ xaꞌanꞌ Abraham Abimelec
20
I̱kanꞌ ni̱ ki̱e̱e̱ Abraham te̱ kuaꞌa̱n ra̱ nde̱e̱ nuu̱ꞌ ñu̱ꞌuꞌ Neguev, te̱ ni̱ xaꞌa̱n ku̱nduꞌu̱ꞌ ra̱ i̱i̱n ñu̱u̱, ña̱ naá te̱i̱n ñu̱u̱ Cades, xiinꞌ ñu̱u̱ Shur, ni̱ yaꞌa̱ te̱ ni̱ ke̱ta̱ ra̱ kuaꞌa̱n ku̱nduꞌu̱ꞌ ra̱ ñu̱u̱ Gerar nde̱e̱ naa i̱i̱n te̱ tukuꞌ.
2 Te̱ kii̱ꞌ nduꞌu̱ꞌ ra̱ i̱kanꞌ ndii, ni̱ kaꞌa̱n ra̱ ña̱, ñaꞌ siꞌi ra̱ Sara ndii, ñaꞌ taꞌanꞌ ra̱ nduuꞌ aꞌ. Sa̱kanꞌ na kuiiꞌ Abimelec, te̱ nduuꞌ rey ñu̱u̱ Gerar ja̱a̱nꞌ ndii, ni̱ kaꞌa̱n tyuunꞌ ra̱ ña̱ ki̱xi̱n ndi̱a̱ka̱ te̱ yivi̱ꞌ Sara ja̱a̱nꞌ nuu̱ꞌ ra̱, te̱ sa̱na̱nduuꞌ ña̱ꞌaꞌ ra̱ ñaꞌ siꞌi ra̱.
3 Ndisu̱ ñu̱u ja̱a̱nꞌ ni̱ xa̱ni Abimelec ña̱ ni̱ tuvi̱ Ndiosí nuu̱ꞌ ra̱, te̱ ni̱ kaꞌa̱n a̱ xiinꞌ ra̱ ndii:
―Te̱ xa̱ yoo ku̱vi̱ nduuꞌ u̱nꞌ, sa̱kanꞌ ña̱ ña̱ꞌaꞌ, ñaꞌ ni̱ na̱ka̱ u̱nꞌ ndii, ñaꞌ xa̱ ni̱ tu̱ndaꞌa̱ꞌ nduuꞌ aꞌ ―ni̱ katyi̱ a̱.
4 Ndisu̱ xaꞌa̱ꞌ a̱ ña̱ tiäꞌa̱an ka̱nduꞌu̱ꞌ Abimelec xiinꞌ ñaꞌ ja̱a̱nꞌ na ni̱ kaꞌa̱n ra̱ ndii:
―Tákuiꞌe, ¿ñáá sa̱ndo̱ñuꞌuꞌ u̱nꞌ i̱i̱n ñu̱u̱ ña̱ köo̱ꞌ ku̱a̱tyi̱ ni̱ xaaꞌ?
5 Xiní u̱nꞌ ndii, mi̱iꞌ Abraham ni̱ kaꞌa̱n xiinꞌ i̱ ña̱ ñaꞌ taꞌanꞌ ra̱ nduuꞌ aꞌ, te̱ sa̱kanꞌ tu̱ ñaꞌ ja̱a̱nꞌ ndii, taꞌanꞌ aꞌ nduuꞌ ra̱ ni̱ katyi̱ aꞌ xiinꞌ i̱. Xaꞌa̱ꞌ a̱ ja̱a̱nꞌ na yuꞌu̱ ndii, naá va̱ꞌa̱ nimá i̱, te̱ köo̱ꞌ ku̱a̱tyi̱ kumiꞌ i̱ ―ni̱ katyi̱ ra̱.
6 Te̱ ni̱ kaꞌa̱n ka̱ Ndiosí xiinꞌ ra̱ xiinꞌ xa̱ni̱ ja̱a̱nꞌ ndii:
―Xiní yuꞌu̱ ña̱ köo̱ꞌ ku̱a̱tyi̱ kumiꞌ u̱nꞌ xaꞌa̱ꞌ ña̱ kaa̱ꞌ, sa̱kanꞌ na kuiiꞌ nï̱ ta̱xi̱ i̱ ña̱ sa̱a̱ u̱nꞌ ku̱a̱tyi̱ nuu̱ꞌ i̱, ni̱ nde̱e̱ nï̱ ta̱xi̱ tu̱ i̱ ka̱nduꞌu̱ꞌ u̱nꞌ xiinꞌ aꞌ.
7 Te̱ vi̱ti̱n ndii, na̱ta̱xi̱ ña̱ꞌaꞌ nda̱ꞌaꞌ i̱i̱ꞌ aꞌ, te̱ kaꞌa̱n ndaꞌvi ra̱ xaꞌa̱ꞌ u̱nꞌ nuu̱ꞌ i̱, te̱ ku̱ti̱a̱ku̱ u̱nꞌ, sa̱kanꞌ ña̱ i̱i̱n te̱ kaꞌán tiakú tu̱ꞌu̱n Ndiosí nduuꞌ ra̱. Ndisu̱ naaꞌ nä̱ta̱xi̱ ña̱ꞌaꞌ u̱nꞌ nda̱ꞌaꞌ i̱i̱ꞌ aꞌ ndii, ku̱vi̱ xna̱ꞌa̱ u̱nꞌ, te̱ ku̱vi̱ tu̱ sa̱kuuꞌ ne̱ ndieeꞌ ñu̱u̱ miiꞌ xaꞌndia tyuunꞌ u̱nꞌ ―ni̱ katyi̱ Ndiosí.
8 Te̱ ni̱a̱ꞌa̱ tu̱ku̱ kivi̱ꞌ ndii, ni̱ ndo̱koo̱ Abimelec, te̱ ni̱ na̱ka̱na̱ ra̱ sa̱kuuꞌ ne̱ xikaꞌ nuuꞌ nuu̱ꞌ ra̱, te̱ ni̱ kaꞌa̱n ra̱ xiinꞌ ni̱a̱ sa̱kuuꞌ ña̱ ni̱ xa̱ni ra̱ ja̱a̱nꞌ. Te̱ kii̱ꞌ ndi̱ꞌi̱ ni̱ xi̱ni̱ so̱ꞌo̱ ni̱a̱ ña̱ ni̱ kaꞌa̱n ra̱ ja̱a̱nꞌ ndii, ni̱ yi̱ꞌvi xa̱va̱ꞌa̱ ni̱a̱.
9 Sa̱kanꞌ te̱ ni̱ ka̱na̱ tu̱ ra̱ Abraham, te̱ ni̱ nda̱tuꞌu̱nꞌ ña̱ꞌaꞌ ra̱ ndii:
―¿Ndiotyun na ni̱ xa̱a̱ u̱nꞌ ña̱ kaa̱ꞌ xiinꞌ ndu̱? ¿Yo̱o̱ nduuꞌ ña̱ vä̱ꞌa̱ ni̱ xa̱a̱ i̱ xiinꞌ u̱nꞌ na ni̱ xa̱a̱ u̱nꞌ sa̱kanꞌ xiinꞌ ndu̱, te̱ taví ku̱a̱tyi̱ yuꞌu̱ xiinꞌ sa̱kuuꞌ ne̱ ndieeꞌ ñu̱u̱ miiꞌ xaꞌndia tyuunꞌ i̱ xaꞌa̱ꞌ ku̱a̱tyi̱ tyie̱ ja̱a̱nꞌ? Vä̱ꞌa̱ xa̱tyiꞌ yoo ña̱ ni̱ xa̱a̱ u̱nꞌ xiinꞌ i̱ kaa̱ꞌ.
10 ¿Yoo nduuꞌ a̱ ni̱ xa̱ni̱ni̱ u̱nꞌ na̱ti̱i̱n u̱nꞌ xaꞌa̱ꞌ ña̱ ja̱a̱nꞌ, na ni̱ xa̱a̱ u̱nꞌ sa̱kanꞌ? ―ni̱ katyi̱ ra̱.
11 Te̱ ni̱ na̱ku̱i̱i̱n Abraham ndii:
―Ni̱ xa̱ni̱ni̱ yuꞌu̱ ña̱ ñu̱u̱ yoꞌoꞌ ndii, xïtoꞌ kaꞌnuꞌ ne̱ yivi̱ꞌ Ndiosí, sa̱kanꞌ na kuiiꞌ ni̱ ka̱ꞌanꞌ i̱ ndii, ka̱ꞌni̱ꞌ te̱ yivi̱ꞌ yuꞌu̱, te̱ na̱ka̱ ra̱ ñaꞌ siꞌi i̱.
12 Ña̱ nda̱ku xna̱ꞌa̱ nduuꞌ a̱ ndii, ñaꞌ taꞌanꞌ i̱ nduuꞌ aꞌ, sa̱kanꞌ ña̱ i̱i̱n nda̱a̱ꞌ yu̱vaꞌ ndu̱, ndisu̱ ï̱i̱n nda̱a̱ꞌ si̱ꞌiꞌ ndu̱, sa̱kanꞌ na kuiiꞌ ni̱ ku̱vi̱ ni̱ tu̱ndaꞌa̱ꞌ i̱ xiinꞌ aꞌ.
13 Te̱ kii̱ꞌ ni̱ kaꞌa̱n tyuunꞌ Ndiosí xiinꞌ i̱ ña̱ ke̱ta̱ i̱ vi̱ꞌe̱ yu̱vaꞌ i̱, te̱ kuꞌu̱n i̱ yoꞌoꞌ ni̱ ja̱a̱nꞌ ku̱nduꞌu̱ꞌ i̱ ndii, ni̱ kaꞌa̱n i̱ xiinꞌ ñaꞌ siꞌi i̱ ña̱ miiꞌ ka̱ kuꞌu̱n ndu̱ ndii, kaꞌa̱n aꞌ xiinꞌ ne̱ yivi̱ꞌ ña̱ ñaꞌ taꞌanꞌ i̱ nduuꞌ aꞌ ―ni̱ katyi̱ ra̱.
14 Sa̱kanꞌ te̱ ni̱ na̱ta̱xi̱ Abimelec Sara, ñaꞌ siꞌi Abraham, nda̱ꞌaꞌ ra̱. Te̱ ni̱ ki̱ꞌi̱n tu̱ ra̱ ndiaꞌviꞌ mbe̱e̱, xiinꞌ si̱ndiki̱ꞌ, xiinꞌ ndiaꞌviꞌ te̱ xikaꞌ nuuꞌ nuu̱ꞌ ra̱, xiinꞌ sa̱va̱ ña̱ꞌaꞌ ñaꞌ xikaꞌ nuuꞌ nuu̱ꞌ ra̱, te̱ ni̱ ta̱xi̱ ña̱ꞌaꞌ ra̱ nda̱ꞌaꞌ Abraham.
15 Te̱ ni̱ kaꞌa̱n ra̱ ndii:
―Ko̱to̱ u̱nꞌ ka̱niiꞌ nuu̱ꞌ ñu̱ꞌuꞌ i̱, te̱ na̱ka̱xi̱n u̱nꞌ miiꞌ ka̱ xtani̱ mi̱iꞌ u̱nꞌ ku̱nduꞌu̱ꞌ u̱nꞌ ―ni̱ katyi̱ ra̱.
16 Te̱ ni̱ kaꞌa̱n tu̱ ra̱ xiinꞌ Sara ndii:
―Xa̱ ni̱ ta̱xi̱ i̱ nda̱ꞌaꞌ tiaa̱ taꞌanꞌ u̱nꞌ i̱i̱n mií xu̱ꞌunꞌ plata nuu̱ꞌ sa̱kuuꞌ ne̱ yivi̱ꞌ, ne̱ itaꞌ yoꞌoꞌ, te̱ ña̱ kaa̱ꞌ ku̱ndu̱u̱ ña̱ na̱tyaꞌvi̱ i̱ yoꞌó xaꞌa̱ꞌ ña̱ ni̱ ku̱ka̱ꞌa̱n nuu̱ꞌ u̱nꞌ ni̱ xa̱a̱ i̱. Te̱ xiinꞌ ña̱ kaa̱ꞌ tu̱ köo̱ꞌ kaꞌa̱n ku̱a̱tyi̱ ka̱ nuu̱ꞌ i̱ xaꞌa̱ꞌ ña̱ ni̱ xkaꞌndi̱a̱ vi̱ti̱n, te̱ köo̱ꞌ tu̱ ne̱ ku̱vi̱ ka̱ni̱a̱ꞌa xiinꞌ u̱nꞌ ―ni̱ katyi̱ ra̱.
17 Sa̱kanꞌ te̱ ni̱ kaꞌa̱n ndaꞌvi Abraham xiinꞌ Ndiosí xaꞌa̱ꞌ Abimelec, xiinꞌ xaꞌa̱ꞌ ñaꞌ siꞌi ra̱, xiinꞌ xaꞌa̱ꞌ ña̱ꞌaꞌ ne̱ xikaꞌ nuuꞌ nuu̱ꞌ ra̱, te̱ ni̱ yoo̱ siꞌe̱ ni̱a̱.
18 Sa̱kanꞌ ña̱ ni̱ nda̱si̱ Yahvé Ndiosí ña̱ nakuꞌún siꞌe̱ sa̱kuuꞌ ña̱ꞌaꞌ, ne̱ ndieeꞌ vi̱ꞌe̱ Abimelec ja̱a̱nꞌ, xaꞌa̱ꞌ a̱ ña̱ ni̱ ndo̱ꞌo̱ Sara, ñaꞌ siꞌi Abraham ja̱a̱nꞌ.