\id 2PE - Maxakalí NT [mbl] (Brazil) -2011 bd \h 2 PET \toc1 2 Pet \toc2 2 Pedro (2 Pe) \mt PET TE TAPPET KAXꞌÃMI II \c 1 \p \v 1 ꞌŨgmũn Xĩmãm Pet. Yeyox Kunnix tek xat, tu nũgkutnãhãꞌ. ꞌÃte ꞌãxop puꞌ kaxꞌãmi nũhũ tappet. Topa te ꞌãkuxa tupmãhã xix Yeyox Kunnix teꞌ, xa tu ꞌãkuxa max. Yeyox Kunnix te yũmũg kuxa kummuk xit. Topa te ꞌãkuxa mãmmã max xix Yeyox Kunnix teꞌ, ꞌũgmũg putuk. Yãꞌ max kuxa mãmꞌax, yã hãpxop takat putuk. \p \v 2 ꞌÃtep-tup, puyĩy Topa xa maxnã punethok, nũy ꞌãkuxa mãmmã punethok, xayĩy ꞌãxop Topa yũmmũg xix yũmũg xuxyã Yeyox yũmmũg. \s Topa te tikmũꞌũn xãnãhãꞌ, tu nõm yĩmõgãtux \p \v 3 Topa ꞌũkaꞌok, tu yũmũꞌã hãpxop xohix popmãhãꞌ, ꞌũyĩy hãmmax mĩy, nũy Topa max putuk, tu Topa yũmmũg. Topa te yũmũg xãnãhãꞌ, ꞌũyĩy yũmũ nũmũtik piꞌ, nũy ꞌũyõg max xeꞌẽgnãg pẽnãꞌ. Yãꞌ xexkaꞌ, tuꞌ max Topah. \v 4 Ha kaxĩy Topa te yũmũꞌã hãpxop xeꞌẽgnãg ꞌãktux xex, ꞌũyĩy hãpxopmã kummuk putup xũy kux, tu hãm xexka xohix yõg tikmũꞌũn putuk hok nõm te yãy kummugãhãꞌ, pa yũmũꞌãte Topa putuk putup. \v 5 ꞌÃxop kuxa mãm kaꞌok Topa kopah. ꞌÃpu hãpxopmã max nõynã mõg. ꞌÃxop te hãpxopmã max. ꞌÃpu hãmyũmmũg nõynã mõg. \v 6 ꞌÃxop te hãmyũmmũg. ꞌÃpu hãpxopmã kummuk putup xũy kux nõynã mõg. ꞌÃxop te hãpxopmã kummuk putup xũy kux. ꞌÃpu hãpkummugã hã tot nõynã mõg. ꞌÃxop te hãpkummugã hã tot. ꞌÃpu Topa putuk nõynã mõg. \v 7 ꞌÃxop te Topa putuk. ꞌÃpu Yeyox kopa mãm kaꞌok xop putuppax nõynã mõg. ꞌÃxop te Yeyox kopa kuxa mãm kaꞌok xop putuppax. ꞌÃpu ꞌãnõy putuppax nõynã mõg. \v 8 ꞌÃxop teꞌ mĩy punethok te kaxĩy, nũy ta Yeyox Kunnix yũmmũg xexkaꞌ, tu tikmũꞌũn pu Yeyox ꞌãktux max putup. \v 9 Pa xateꞌ mĩy ꞌohnãg te kaxĩy, nũy ta ꞌãxop hãmyũmmũg kutõgnãg, nũy hãmpẽnãg-tõgnãg putuk, nũy pa hok xop putuk. Yã Yeyox te ꞌãkuxa kummuk xit, pa xateꞌ xaxok. \p \v 10 ꞌŨkxape xop, Topa te ꞌãxop xãnãhãꞌ, tu ꞌãxop yĩmõgãtux. ꞌÃpu Topa yõg putat hã mõg kuma mog. Hã kaxĩy ꞌãkuxa mãm kux putupꞌah, \v 11 tu pexkox hã mõxakux putup, paꞌ pip putup yũmũg xuxyã Yeyox Kunnix yõg tikmũꞌũn, yãꞌ kuxa tup xop, ha Topa te ꞌãxop xat putup hãmyãxatamuk xohix kux ꞌohnãg hã. \p \v 12 Hõmã ꞌãxop teꞌ xupak nõm hãpxop xeꞌe xohix, tu ꞌãyĩpkox pip, tuꞌ mĩy punethok. ꞌÃxop te nõm yũmmũg xexkaꞌ. Pa xa nõm yũmmũgãhã ꞌũxeheh, puꞌ max. ꞌÃte nõm xop ꞌãktux putup punethok ꞌũxeheh. \v 13 ꞌÃte hãmpekpaxex ꞌũkxip, kopxix xa nõm yũmmũgã ꞌũxeheh. \v 14 ꞌÃteꞌ yũmmũg, hãpxip ꞌĩhãg xip kux putup, yãg xok putup, yã yũmũg xuxyã Yeyox Kunnix te ꞌã nõm ꞌãktux. \v 15 Hõmã ꞌãte xa yũmmũgãp-tup punethok ꞌũxeheh, xayĩy ꞌãxop nõm xaxok hok. Hãpxip ꞌĩhãg xok putup, ha ꞌa ꞌãxop te nõm hãpxop xaxok putupꞌah. \s Kunnix xeꞌẽgnãg ꞌãktux \p \v 16 ꞌOk ꞌũgmũꞌãte xa yãy yõg hãmꞌãktux hitop ꞌãktux, nũy xa hãmꞌãktux yũmũg xuxyã Yeyox Kunnix putpuꞌ nũnꞌax max xeꞌẽgnãg? ꞌÃmhok. ꞌAp hitopꞌah hãmꞌãktux. Pak mũꞌãteꞌ pẽnãhã Yeyox ꞌũxexkaꞌ, tuꞌ max. \v 17 Yã hõmãg mũꞌãteꞌ pẽnãhãꞌ. Yũmũg ꞌãtak Topa xip pepix pexkox tuꞌ, ha taꞌ xip Yeyox nũnte ꞌũgmũg mũtik, hak mũꞌãteꞌ xupak, Topa te: “Nũhũ yã ꞌũgkutok pit. ꞌÃte mõꞌyãy xeꞌẽgnãg xexkaꞌ.” Kaxĩy. Hã kaxĩy Topa te yãy kutok xexka xeꞌẽgnãg mĩy. \v 18 Yã nõm yãnmũn xupepꞌax te pexkox tuꞌ nũn, ha tak mũg pip yĩktix yĩmũꞌ, tuk mũꞌãte nõm ꞌãpak, ꞌĩhãꞌ xip yũmũg xuxyã Yeyox xip. Yãꞌ max xeꞌẽgnãg. \p \v 19 Hõmã ꞌũhittap Topa pupi hãmꞌãktux xop te Topak-tok ꞌãktux, ha ta hõnhãg mũꞌãte Yeyox pẽnãhãꞌ. Yã Topa pupi hãmꞌãktux xop te kaxꞌãmi hãmꞌãktux xeꞌeꞌ, yãꞌ koitꞌah. Yãꞌ xeꞌeꞌ. ꞌÃpu nõm hãmꞌãktux ꞌãpax, ha ꞌãxop te hãmyũmmũg putup. Kuyãnãm tat te putat tupmãhãꞌ. Hã kaxĩy Topa pupix hãmꞌãktux xop yõg hãmꞌãktux te Topa yõg putat max tupmãhãꞌ, yã Topa yõg putat tupmãp-tup, ha mõktu yã Yeyox Kunnix te putpuꞌ nũn nõm hãptup ꞌĩhãꞌ. Mãyõnnãg xexka xupep. Hã kaxĩy Yeyox xupep putup kamah. \v 20 ꞌÃpu hãmyũmmũg xeꞌeꞌ. Hõmã ꞌũhittap tik te Topa pupi hãmꞌãktux, tu hãmꞌãktux kaxꞌãmi Topa yõg tappet tuꞌ. Texĩy hãmꞌãktux? ꞌOk hãm yũmmũg xexkaꞌ, hu hãmꞌãktux? ꞌÃmhok. \v 21 ꞌOk tikmũꞌũn tep-tup, hu Topa pupi hãmꞌãktux? ꞌÃmhok. Pa Topa te tuꞌ popmãhã hãmꞌãktux, ha Topa Koxuk teꞌ yĩygãhãꞌ. \c 2 \p \v 1 Hõmã Topa pupi hãmꞌãktux koit xop te kuxa mãm kaꞌok xop mũtik yãy kotĩnnãhãꞌ, tu hãmꞌãktux Topa pupiꞌ hãmꞌãktux, pa yãꞌ koit. Hã kaxĩy tikmũꞌũn te ꞌãxop mũtik yãy kotĩnnãp-tup, nũy ꞌãxop pu hãmyũmmũgãꞌ, pa yãꞌ koit, tu tikmũꞌũn pu hãmyũmmũgãp-tup, nũy tikmũꞌũn kuxa mãm kuxyãꞌ, tu hãmꞌãktux Topa yõg putat yõg hãmyũmmũg ꞌãktux, pa yãꞌ koit, tu yũmũg xuxyã Yeyox ꞌãktux kummuk putup. Yeyox te tikmũꞌũn pupiꞌ xok, pa nõm te hãmꞌãktux putup, hu: “Yeyox ꞌap xeꞌeꞌah.” Kaxĩy. Hã kaxĩy mĩy, ha Topa te yõg kummuk mĩyꞌax hã yãnãn putup mõꞌkaꞌok. \v 2 Topa teꞌ yãnãn putup, pa nõm kummuk xop te yãy yõg putat kummuk kopaꞌ mõg, ha tikmũꞌũn te nõm pẽnãp-tup, hu Topa yõg putat max ꞌãktux kummuk putup. \v 3 Nõm tikmũꞌũn kummuk te tayũmak putuppax, hu xa yãy yõg hãmꞌãktux hitop yũmmũgãp-tup, xayĩy ꞌãxop tuꞌ pago. Pa Topa teꞌ yũmmũg, huꞌ hip. Hãpxip kutõgnãg ꞌĩhã Topa te nõm xop yõg hãpxopmãꞌax kopit putup, nũy yõg hãpkummuk mĩyꞌax hã yãnãn. \p \v 4 Hõmã ꞌũhittap pexkox yõg nũꞌpok xop te hãpkummuk mĩy pexkox tuꞌ, ha Topa te yõg hãpkummuk mĩyꞌax yãnãn, yã nõm putyõn pexkox kũnãpaꞌ, tu nõm xex Hãmgãyãgnãg pet kopah, yã kanet kaꞌok putuk, tu nõm kĩy. Yã hãpkoxtap xexkaꞌ. Nõm teꞌ hip, yã hãpxip ꞌĩhã Topa te yõg hãpkummuk mĩyꞌax hã yãnãn putup. \v 5 Hõmã ꞌũhittap, ha ta tikmũꞌũn xohix te hãpkummuk mĩy kamah, tu Topap-tup nõg. Ha Nõe te tikmũꞌũn pu Topa yõg hãmꞌãktux xeꞌe ꞌãktux. Pa tikmũꞌũn te hãpkummuk mĩy kux ꞌohnãg, ha Topa te yõg hãpkummuk mĩyꞌax hã yãnãn. Yã Topa teꞌ xat, ha kõnãg xexka te hãm xexka mõꞌnĩy, ha tikmũꞌũn xohix xakix kõnãg kopah. Paꞌ xakix hok Nõe xix yã xape xohix teꞌ 7. Yãꞌ pip mĩpkox kopah, yã mĩptut xexka kopah, tu kõnãg yĩmũꞌ mõg. Pa tikmũꞌũn nõy xohix xakix kõnãg kopah. \v 6 Hõmã ꞌũhittap ha ta kõmẽn Xonõm yõg tikmũꞌũn xohix te Topap-tup nõg xix kõmẽn Gõmõg yõg tikmũꞌũn xohix teꞌ, ha Topa te yõg hãpkummuk mĩyꞌax hã yãnãn, ha kuxap te nõm kõmẽn tix puk xix yõg tikmũꞌũn xohix, haꞌ xakix. Topa te nõm Topap-tup nõg xop tuꞌ yãnãn. Hã kaxĩy tikmũꞌũn teꞌ yũmmũg Topa te tikmũꞌũn xohix yõg hãpkummuk mĩyꞌax yãnãn putup. \v 7-8 Yã No teꞌ pẽnãhãꞌ. Yã No te yãykotĩnnãhã kõmẽn Xonõm yõg tikmũꞌũn kummuk mũtik. Yã tik max No, tuꞌ pẽnãhã tikmũꞌũn teꞌ nõy hã xupxetpax, tuꞌ yĩpkox ꞌohnãg. No te tikmũꞌũn yõg hãpkummuk mĩyꞌax pẽnãhãꞌ, tuꞌ xupak, huꞌ kuxa hittup ꞌohnãg, yã ꞌãmnĩy xohix hãꞌ kuxa hittup ꞌohnãg. Kõmẽn yõg tikmũꞌũn xohix xakix, yã kuxap teꞌ kix, pa Topa te No xut, haꞌ xok ꞌohnãg. \v 9 Hã kaxĩy yũmũꞌãteꞌ yũmmũg Topa te Topap-tuppax xop mõyꞌax hãpkummuk kopah, pa Topap-tup nõg xop kĩyꞌax, ha mõktu nõm ꞌãmnĩy xupep. Yã tute Topap-tup nõg xop yõg hãpkummuk mĩyꞌax hã yãnãn putup. \v 10 Hamũn, Topa te tikmũꞌũn yõg hãpkummuk mĩyꞌax hã yãnãn xexkap-tup, yã nõm tep-tuppax hãpxopmãꞌax kummuk, huꞌ mĩy ꞌũxohix, tu Topa yõg xatꞌax mĩy ꞌohnãg. \p Hã kaxĩy nõm teꞌ koit xop, nõm te Yeyox kopa kuxa mãm kaꞌok xop pu hãmyũmmũgãhãꞌ, pa yãꞌ koit, tu hãmꞌãktux kaꞌok, pa hãmyũmmũg ꞌohnãg, tu yãy xexka peꞌpaxex, tu pexkox yõg max xop ꞌãpak ꞌohnãg, pa nõm ꞌãktux kummuk. \v 11 Nõm teꞌ koit xop ꞌũpuꞌuk, pa pexkox yõg nũꞌpok xop ꞌũkaꞌok xexkaꞌ, pa pexkox yõg nũꞌpok xop te pexkox yõg max xop ꞌãktux kummuk ꞌohnãg. \v 12 Xokxop gãy xop te hãmpeꞌpaxex max ꞌohnãg, paꞌ gãy. Ha tikmũꞌũn te nõm xak, nũy kix. Hã kaxĩy nõm teꞌ koit xop te hãmpeꞌpaxex max ꞌohnãg, paꞌ gãy, ha Topa teꞌ kuxyãp-tup. \v 13 Nõm teꞌ koit xop te tikmũꞌũn kummugãhãꞌ, ha Topa te nõm tuꞌ yãnãn putup. Tikmũꞌũn te hãpkummuk mĩyꞌax xaptop, puyĩy tikmũꞌũn nõm pẽnã hok. Pa nõm teꞌ koit xop tep-tuppax hãpkummuk mĩy, puyĩy tikmũꞌũn nõm pẽnãꞌ. Nõm te pãm mãhã ꞌãxop mũtik, yã ꞌãxop te pãm mãhãꞌ, nũy Yeyox xokꞌax peꞌãpaxeh. Yã ꞌãxop te nõm teꞌ koit xop mũtik yãyhãphup. Nõm te pãm mãhã ꞌãxop mũtik, tuꞌ koit putuppax, \v 14 tu ꞌũn kummuk pẽnãpax, tu hãpkummuk mĩyꞌax putup xũy kux ꞌohnãg, tuꞌ kuxa mãm puꞌuk xop pu hãmyũmmũgã kummuk, haꞌ kuxa mãm koitꞌax kopah. Nõm koit xop te tayũmak putup xũy, ha Topa te hãmꞌãktux, hu: “Yãꞌ kummuk nõꞌom”. Kaxĩy. Topa te nõm xũygãp-tup. \v 15 Nõm teꞌ koit xop te Topa yõg putat max xak, tu yãy xaxogãhãꞌ, yã hãpxeꞌe yũmmũg ꞌohnãg. Hõmã Manaꞌãm, yã Meot kutok te tayũmak putuppax, tu hãpkummuk mĩy, nũy tayũmak pop, \v 16 pa Topa te: “Kaxĩy hok”. Kaxĩy. Yã Topa te Manaꞌãm yõg yomẽn yĩgãhãꞌ, yĩy hãmꞌãktux, hu: “Kaxĩy hok”. Kaxĩy. Tu Manaꞌãm hupmãhãꞌ. Manaꞌãm xip Topa pupi hãmꞌãktux xop kopah, paꞌ kummak. Hã kaxĩy nõm teꞌ koit xop te hãpkummuk mĩy, yã Manaꞌãm putuk. \p \v 17 Tikmũꞌũn te kõnãg xupup kox tuꞌ mõg, nũy kõnãg ꞌũm tat, paꞌ nak, puxiꞌ tat ꞌohnãg. Tikmũꞌũn te hãmgõy xexka pẽnãhãꞌ, tu hãmpeꞌpaxex tex tip-tup. Pa ꞌãmuuh te hãmgõy xexka xit, ha tex ti ꞌohnãg. Hã kaxĩy tikmũꞌũn mõg, nũy nõm teꞌ koit xop yõg hãmyũmmũg ꞌãpax, pa hãmyũmmũg max ꞌohnãg. \v 18 Nõm teꞌ koit xop te yãy xexka ꞌãktux, tu hãmꞌãktux hitop tikmũꞌũn puꞌ, tuꞌ yũmmũgãhã tikmũꞌũn te yãy yõg putupꞌax mĩy, puꞌ max. Yãꞌ koit, pa tikmũꞌũn teꞌ xupak, tuꞌ mĩy. Yã hõmã tikmũꞌũn teꞌ kummuk xop nĩm, pa hõnhã putpuꞌ mõg. \v 19 Nõm teꞌ koit xop te: “ꞌÃpu ꞌũmĩy ꞌãxop te nõm putup, puyĩy ꞌũnõy ꞌãxop xat hok.” Kaxĩy. Pa yãꞌ koit. Xuxyã xop te kãmãnat xop xatpax. Hã kaxĩy tik yõg putupꞌax te tik xatpax. Hamũn, nõm teꞌ xat te xuxyã putuk, haꞌ nõy teꞌ mĩypax te kãmãnat xop putuk. \v 20 Hã kaxĩy tikmũꞌũn xohix. Tikmũꞌũn te yãy putupꞌax mĩypax, yãꞌ kummuk. Pa hãpxip ꞌĩhãꞌ kuxa mãm yũmũg xuxyã Yeyox Kunnix kopah, ha Yeyox teꞌ kuxa kummuk xit, nũyꞌ yãnãn tuꞌ kuxa max tat. Pa hãpxip ꞌĩha putpuꞌ yãy putupꞌax mĩy. Nõmhãꞌ kummuk xexkaꞌ. \v 21 Hamũn, tikmũꞌũn te Topa yõg putat xeꞌe hãꞌ mõg ꞌohnãg, yãꞌ kummuk miax. Pa tikmũꞌũn te Topa yõg putat xeꞌe hãꞌ mõg. paꞌ xak, tuꞌ mõg, yãꞌ kummuk xexkaꞌ. \v 22 Yã hãmꞌãktux hittap putuk. Yã hãmꞌãktux hittap, tu: “Kokex yõgmĩy, tu putpuꞌ mãhãꞌ.” Kaxĩy. Tu xe: “Tikmũꞌũn te xapup pix, pa putpuꞌ xe nõ yãy muk putõy hã.” Kaxĩy. Hã kaxĩy tikmũꞌũn te hãpkummuk mĩy kux, pa putpu hãpkummuk mĩy. \c 3 \s Yeyox putpuꞌ nũn putup \p \v 1 ꞌŨkxape xop, hõmã ꞌãte xa tappet kaxꞌãmiꞌ. Hõnhã ꞌãte xaꞌ kaxꞌãmi ꞌũxeheh nũhũ tappet. ꞌÃte tappet tix kaxꞌãmiꞌ, nũy xa hãmyũmmũgã ꞌũxeheh, xayĩy hãmpeꞌãpaxeh xeꞌeꞌ. \v 2 Hõmã ꞌũhittap Topa pupi hãmꞌãktux xop xeꞌẽgnãg te Topak-tok putpuꞌ nũnꞌax ꞌãktux, ha Yeyox yõg mõꞌpok xop te ꞌãxop pu nõm ꞌãktux kamah, yã Yeyox yõg hãmꞌãktux ꞌãktux. ꞌÃtep-tup, xayĩy xe nõm peꞌãpaxeh. \v 3 ꞌÃpu nũ peꞌãpaxeh hãmãxap. ꞌÃpu hãmyũmmũg. ꞌÃxop teꞌ yũmmũg, hãm xexka yõg hãmyãxatamuk xox putox ꞌĩhãꞌ pip putup tikmũꞌũn kummuk, tu yãy yõg putupꞌax kummuk mĩypax putup, tu ꞌãxop kuteꞌex kummuk putup, \v 4 tu: “Yeyox te hãmꞌãktux xex ꞌũputpuꞌ nũn putup. ꞌOk kaxĩy hãmꞌãktux? Teptu putpuꞌ nũn ꞌohnãg? Hõmã Topa teꞌ mĩy hãm xexkaꞌ xix hõnhãꞌ, yã ꞌãmnĩy xohix te yãy putuk. ꞌAp nũnꞌah. ꞌŨpip mõnãyxop, tuꞌ xakix, paꞌ nũn ꞌohnãg.” Kaxĩy. \v 5 Pa nõm tep-tupꞌah, nũy hãmpeꞌpaxeh max. Hõmã ꞌũhittap Topa teꞌ mĩy hãm xexkaꞌ, yã kõnãg hãꞌ mĩy, tu kõnãg hãꞌ xut, \v 6 tu ta hãpxip ꞌĩhã kõnãg hã hãm xexka xohix xexka koxyõy xix tikmũꞌũn xohix kõnãg hãꞌ kix. Yã Topa teꞌ xat. \v 7 Tu taꞌ xat putup, tu kuxap hãꞌ koxyõy putup hãm xexka xix pexkox yokomak xop. Yã Topa teꞌ hip. Hãpxip ꞌĩhã tute Topap-tup nõg xop yõg hãpxopmãꞌax kopit putup, nũy yõg hãpkummuk mĩyꞌax hã yãnãn. \p \v 8 ꞌÃpuꞌ xaxok hok nũ hãpxop puxet. Hãmyãxatamuk teꞌ 1.000 te ꞌãmnĩy puxet putuk Topa puꞌ, yã Topa puꞌ yãy putuk. \v 9 Topa te hãmꞌãktux xex Topak-tok putpuꞌ nũn putup. Tikmũꞌũn te hãmpeꞌpaxex hãmyãxatamuk xohix xexka nõg, paꞌ nũn ꞌohnãg. Pe ꞌãmhok, ꞌap xohixꞌah. Topa pu hãmyãxatamuk xohix ꞌohnãg. Pa Topa teꞌ hip punethok, puyĩy tikmũꞌũn yãy yõg hãpkummuk mĩy kux. Tutep-tupꞌah tikmũꞌũn koxyõy. \p \v 10 Pa nõm hãptup mõꞌnãp-tup, ha yũmũg xuxyã Yeyox putpuꞌ nũn putup. Tikmũꞌũn te xupxet hip ꞌohnãg, tu hãmpeꞌpaxex ꞌũnũn putupꞌah xupxet. Hã kaxĩy tikmũꞌũn te Yeyox hip putupꞌah, tu hãmpeꞌpaxex ꞌũnũn putupꞌah. Yã nõm hãptup mõꞌnãp-tup. Tikmũꞌũn teꞌ xupak putup hãmnũhũn xexkaꞌ, yãꞌ nõg putup pexkox yokomaꞌ xop, yã mãyõnnãg xohix puk putup, xix mãyõn, xix mãyõn hex, yãꞌ xohix puk putup, haꞌ nõg putup hãm xexka xix hãm xexka yõg hãpxop xohix. \v 11 Hã kaxĩy ꞌũnõg putup hãpxop xohix. ꞌÃxop teꞌ yũmmũg. Texĩy ꞌãxop hõnhã? Putep mũn mĩy putup hõnhã? Yã ꞌãpu hãpxopmã xeꞌe, yã Topa putuk. \v 12 ꞌÃpu Yeyox te putpuꞌ nũnꞌax hip. Topa te yãy kutok putpu nũꞌkutnãp-tup. ꞌÃpu hãpxopmã max, puyĩy hãpxip kutõgnãg ꞌĩhãꞌ nũꞌ Yeyox. Yeyox nũn putup, ha pexkox yokomaꞌ xop puk putup, haꞌ nõg putup, yã hãmpukpex xexkaꞌ, ha mãyõn hep pognãm putup, xix mãyõn hex, xix mãyõnnãg xop. \v 13 Pa Topa te hãmꞌãktux xex, ha yũmũꞌãte nõm hip, yã pexkox yokomaꞌ xop tup hip, xix hãm xexka tup. Yã Topa teꞌ mĩy putup. Ha ꞌõnte tikmũꞌũn te hãpxeꞌe mĩy putup. \p \v 14 ꞌŨkxape xop, ꞌãpu Yeyox te putpuꞌ nũnꞌax hip. Pu yã ꞌãkuxa tup, nũy hãpkummuk mĩy hok, yã Topa pu ꞌãmax, nũy yãy kix hok Topa mũtik. \v 15 ꞌÃpu hãmpeꞌãpaxeh hõnhã Topa teꞌ hip, yã ꞌap xupepꞌah Yeyox hõnhã. Tute ꞌãxop xãnãhãꞌ. ꞌÃpu ꞌõg hãpkummuk mĩy kux, ha Topa te ꞌãkuxa kummuk xit putup, nũy yãnãn, tu kuxa max tat. Yã yũmũg taknõy Paot te nõm hãpxop kaxꞌãmi kamah. Yã Topa te Paot pu nõm yũmmũgãhãꞌ. \v 16 Paot yõg hãmꞌãktux te yõgnũ putuk, tu nõm kaxꞌãmi tappet tuꞌ. Yãꞌ pip hãpxop kaꞌok ꞌũyõg tappet tuꞌ, ha tikmũꞌũn teꞌ yũmmũg mõꞌpuꞌuk. Paꞌ pip tikmũꞌũn, tu hãmyũmmũg ꞌohnãg, tup-tox kummuk, tu tikmũꞌũn pu Paot yõg tappet yũmmũgã kummuk, tuꞌ koit, yã Topa tappet xohix yũmmũgã kummuk, tu yãy kuxa mãm kux. \p \v 17 ꞌŨkxapexop, ꞌãte xa nõm kaxꞌãmiꞌ, ha ꞌãxop te nõm yũmmũg. Pa ꞌãtix, nũy hãmyũmmũg, puyĩy nõm koit xop xa yũmmũgã kummuk hok. Pa ꞌãtix, puyĩy ꞌãkuxa mãm kux hok. Yã nõm koit xop te Topa yõg xatꞌax mĩy ꞌohnãg. \v 18 Topa te xa maxnãhãꞌ. ꞌÃpu ꞌũtuxhok, puyĩy Topa xa maxnã nõynãꞌãmõg. ꞌÃpu yũmũg xuxyã Yeyox Kunnix yũmmũg nõynãꞌmõg. Yeyox te yũmũg kuxa kummuk xit. ꞌÃpu yũmũ hãmꞌãktux, hu: “Yeyox ꞌũmax xeꞌẽgnãg.” Kaxĩy. ꞌÃpu yũmũ Yeyox Kunnix xexka mĩy hõnhã, xixꞌ xexka mĩy hãmyãxatamuk xohix kux ꞌohnãg hã. \p Tu ta tuꞌ kux.