Ba 'de ‑ba ‑hre Nyɩsʋa a win
'A ‑nɛ ‑nyrɔwɔ, ‑ba ‑hre 'Bablo, ‑ɛ mɔ Nyɩsʋa a win.
‑Ba da Nyɩsʋa
‑Ba ‑hʋa꞊a 'klɩ, ‑a 'mʋ 'a win' lɛ yru.
‑Ba ‑hre 'Bablo a 'kʋtɩɔ ‑bɩ.
‑Tɩ ‑mʋ', Nyɩsʋa hlɛ, ‑ba naa ꞊nɛ ꞊wlʋ klɛ ‑tɛɛ.
‑Ba 'bɛti ‑aan dɩɔnʋ lɛ :
1. 'Bablokʋtɩɔ ‑bʋ, ‑a ‑hre, dɛ a 'dɩ ‑bɩ kɔ ‑tɩ ɛ hlɛ 'lɩ ?
Nyiblo a 'dɩ ‑bɩ kɔ ‑tɩ ɛ nɛ ‑mɔ lɛ 'lɩ ?
2. Dɛ a 'dɩ ‑bɩ ɛ tʋɛ 'mʋ,
'kɩ 'ʋ Nyɩsʋa ‑mɔ' ?
'kɩ 'ʋ ‑Yusu 'Klɩsʋ ‑mɔ' ?
'kɩ 'ʋ Nyɩsʋa a ‑Hihiu ‑mɔ' ?
3. ꞊Bɩ 'kɩ 'nɛ‑ 'Bablokʋtɩɔ ‑bʋ 'kwli, nyiblo nu dɛ, ‑a ‑wɛ 'lɩ ‑ba nu ‑wɛ, ‑ʋ'ʋ‑ ‑a 'yɩ yɩ ‑blɛɛ ‑nɩ, ‑ba nu ?
4. ꞊Bɩ ɛ kɔ wuntɔdɛ, 'a di 'ʋ ꞊tuu ‑nɩ ?
5. ꞊Bɩ Nyɩsʋa pʋ 'lɩ dɛ, ɛ di nu ?
6. ꞊Bɩ ɛ kɔ tiiwin ꞊dʋ, Nyɩsʋa yɩ ‑a mʋ ‑tii ‑nɩ ?
7. ‑Tɩ a ‑tɛɛ a 'dɩ ‑bɩ Nyɩsʋa tʋɛ nɛ ‑a mʋ 'lɩ ?
8. ꞊Bɩ ɛ kɔ Nyɩsʋa a wuntɔdɛ ‑bɩ, ‑ɛ yɩ ‑a mʋ ‑hɛɛ ‑nɩ, 'kɩ ‑tɩ ‑bʋ, ‑a ‑hre, ‑ba yru꞊o lɛ ‑tɛɛ ?
9. Winbʋ a 'dɩ ‑bɩ ‑a ‑hʋɛ ‑ba na ꞊wlɩ klɛ, 'kɩ 'nɛ‑ kɩkɛ ‑bʋ a ‑nyrɔwɔ ‑bʋ 'kwli 'lɩ ?
Ba da Nyɩsʋa, ‑ba hlee 'lɩ꞊ɩ ‑mɔ.
'Bʋ mɔ, 'nɩ yɩ 'lɩ Nyɩsʋa ‑mɔ nɩ ‑hlee ‑nɩ, ꞊bɩ ‑tɩ ‑bʋ, 'n ‑hre, ɛ tʋɛ 'mʋ ‑tɩ, ꞊bʋ lee ꞊nɛ:
Yɩ‑hɛdɛ, ɛ nɔ‑ mɔ dɛ 'kuku ‑bɩ, 'n ‑nu, ꞊bʋ yru꞊o, 'kɩ 'ʋ꞊ʋ 'yɩ;
'hʋɛn a dɛ, ɛ nɔ‑ mɔ dɛ ‑bʋ, ꞊bʋ kuo ꞊wlʋ yɩ,
ta a dɛ, ɛ nɔ‑ mɔ dɛ ‑bʋ, ‑ɛ kɔ ‑ta' 'n kɔ ꞊bʋ ‑nyi꞊e 'wio, kɔ ꞊bʋ pʋ꞊ʋ 'nyrɛ lɛ;
‑hɛn a dɛ, ɛ nɔ‑ mɔ, ꞊bʋ ‑hʋa꞊a dɛ.
‑Tɩ ‑mʋ', Nyɩsʋa lee nɛ ‑a mʋ, ‑ba nu꞊o.
Dɛ ‑bʋ, ‑kɔ ‑bʋ yi, 'kɩ 'ʋ Nyɩsʋacrɩɛn kɩ, ɛ nɔ‑ ‑bʋ:
Nyɩsʋacrɩɛn, 'Flanyʋ dɛɛ ꞊nɛ «Bible» ('Bablo). Nyɩsʋacrɩɛn a 'mʋ, ɛ kɔ 'kabɩ nɩ 'hʋɛn. 'A yɩ‑hɛkɩbɩa, 'yrɩ 'kɩ ‑mʋ', Nyɩsʋa ꞊tu la, ɛ kɔ ‑tonyibli 'hʋɛn‑, ɛ nɔ‑ kɔ ‑tɩ ɛ nɛ ‑mɔ lɛ. 'Yrɩ 'kɩ a 'mʋ, 'Flanyʋ dɛ ꞊nɛ «Ancien Testament». 'Yrɩ 'kɩ a 'mʋ a 'crɩɛn, 'kɩ 'lɩ ‑Juukʋɛwin 'kwli, ‑ɛ mɔ Hebrekʋɛwin, 'kɩ ʋ 'crɩɩ la 'lɩ꞊ɩ 'lɩ.
Nyɩsʋacrɩɛn a 'kɩbɩa a 'hʋɛn a dɛ, 'yrɩ yrayrɩ ‑mʋ', Nyɩsʋa ꞊tu la, ɛ kɔ ‑tonyibli 'hʋɛn, nɔ‑ kɔ ‑tɩ ɛ nɛ ‑mɔ lɛ. 'Yrɩ yrayrɩ a 'mʋ, 'Flanyʋ dɛɛ ꞊nɛ «Nouveau Testament». 'Yrɩ yrayrɩ a 'crɩɛn, 'kɩ ʋ 'crɩɩ la 'lɩ꞊ɩ Glɛkɩkʋɛwin («grec») 'kwli. Ɛ nɔ‑ ‑a ‑ha, 'kɩ 'lɩ 'bliwin 'kwli. 'Crɩɛn a 'mʋ, ɛ nɔ‑ ꞊ble kʋa. Ɛ nɔ‑ mɔ
NYƖSƲA A ꞊HAANTITIE
Nyɩsʋa a 'yrɩ 'kɩ a 'crɩɛn ‑mʋ', nɔ‑ tʋɛ nɛ ‑a mʋ ‑tɛ ‑mʋ' Nyɩsʋa nu la 'klɔ a nunuo, kɛ ‑tɛblɩ a pɛpɛ, ‑ɛ nɩ 'nɛ‑ 'klɔ ‑mɔ, ɛ kɔ ‑tonyibli 'hʋɛn‑. Ɛ tʋɛ nɛ ‑a mʋ nɩ ‑wɛ ‑tɛ ‑mʋ' ‑tonyiblo nu la Nyɩsʋa a tete a 'wʋwla. Nyɩsʋa a tete a 'wʋwla a 'mʋ, nɔ‑ nu꞊o, 'kʋkʋʋ kɛ ꞊hɩʋɛn a 'yiye 'hʋɛn‑, 'ʋ di 'nɛ‑ 'klɔ 'kwli. Kɛɛ, Nyɩsʋa pʋ la 'lɩ꞊ɩ nɩ, 'kɩ bʋ wa ‑a mʋ ‑tonyibli.
'Ya 'ʋ 'lu de, ɛ tʋɛ nɛ ‑a mɔ꞊ɔ nɩ ‑tɛ ‑mʋ' Nyɩsʋa nu la 'lɩ Abrahamʋ a 'lɩ‑hɩha, ɛ kɔ 'a 'yonʋ 'hʋɛn‑, 'ʋ ‑hɛ 'a dakɔ. Dakɔ a 'mʋ, ʋ dɛɛ ꞊nʋ ‑Juukʋɛ, ‑ʋ'ʋ‑ Yisraɛkʋɛ, ‑ʋ'ʋ‑ Hebrekʋɛ.
Nyɩsʋacrɩɛn a 'mʋ, ɛ hlɛ꞊ɛ nɩ ‑wɛ, ‑tɛ Nyɩsʋa nu la, 'ɛ ‑nyi la Moise 'a tete, 'kɩ 'lɩ dʋgba ‑mʋ', ʋ dɛɛ Sinai 'lu, ‑ɛ di꞊e nu, ‑tonyibli 'mʋ dɛ ‑hʋan kɔ ꞊haandɛ 'hʋɛn‑ a 'yilɛ‑hɩhɩalɛ yi, 'ɛ hlɛ꞊ɛ ‑wɛ, ‑tɛ Nyɩsʋa a dakɔ ni la ‑cɔhlʋn a pipie, 'kɩ 'ʋ Nyɩsʋa ye', ‑ɛ di꞊e nu, Nyɩsʋa 'mʋ la 'waa dɛ 'kuku 'wʋwla ‑nɩ. 'Kɩ 'lɩ 'yrɩ 'kɩ a 'crɩɛn a 'mʋ 'kwli, 'kɩ ʋ 'crɩɩ 'lɩ ‑tɩ ‑mʋ', Nyɩsʋa a winwlɔn‑hanyʋ hla la, ɛ kɔ, Wanyɔ ‑mʋ', Nyɩsʋa pʋ la lɛ, ɛ di la 'nɛ‑ ya, ɛ nɩ ke', 'ʋ 'crɩ la 'a ‑tɩ ‑wɛ.
Nyɩsʋa a 'yrɩ yrayrɩ a 'crɩɛn ‑mɔ ‑bɩ, ‑Yusu 'Klɩsʋ a ‑tɩ, ɛ nɛ ‑mɔ lɛ. ‑Yusu a 'mʋ, ɛ nɔ‑ mɔ Wanyɔ ‑mʋ', Nyɩsʋa pʋ la lɛ, ɛ di la 'nɛ‑ ya. 'Crɩɛn a 'mʋ, ɛ tʋɛ nɛ ‑a mʋ nɩ, ‑tɛ nyibli, ‑ʋ kuo ‑Yusu 'Klɩsʋ ꞊wlʋ yɩ, 'waa nɩnabʋɩ blɛɛ yɩ bʋ nɩ 'mʋ. Nyɩsʋa a ꞊tɔwin, nɔ‑ nɩ 'lɩ 'crɩɛn a 'mʋ 'kwli.
Nyɩsʋa a 'yrɩ yrayrɩ a 'crɩɛn ‑bʋ, nɔ‑ ‑a ‑ha, 'kɩ 'lɩ ‑a 'bliwin 'kwli, ‑ɛ di꞊e nu, 'blikʋɛ a pɛpɛ 'bʋ yɩ꞊ɩ nɩ ‑hre, ʋ 'mʋ ‑Yusu a ‑tɩ' lɛ yru ‑tɛɛ, ꞊wɩ yɩ, ‑tɛ Glɛkɩkʋɛ nu la ‑Yusu a ‑tɩ a lɛyuyruo ‑tɛɛ, ti ‑mʋ' ‑kɔ 'yri ʋ 'crɩ la 'crɩɛn a 'mʋ, 'kɩ 'lɩ Glɛkɩkʋɛwin 'kwli 'mʋ.
'A ‑tɩ, ɛ 'yɩ winbʋɩ a dodoyo 'pa‑, ‑a 'yɩ꞊ɩ ‑ha, kɛɛ, ‑tɩ ‑mʋ', ʋ 'crɩ la yɩ‑hɛnyrɛ, nɔ‑ kɔ 'mini ‑a ‑ha, ‑ɛ di꞊e nu, Nyɩsʋa a ‑tɩ 'mʋ lɛyruelɛ kɔ.
‑A dɛ Nyɩsʋa nɩ, ‑ɛ di꞊e nu, 'a ‑Hihiu 'mʋ nyibli a pɛpɛ ‑mʋ', ‑ʋ di 'crɩɛn ‑bʋ ‑hre ‑hɛɛ ‑nɩ, ʋ 'mʋ ‑Yusu ꞊wlʋ yɩ ‑kuo ‑nɩ, ʋ 'mʋ 'waa 'klɔ a pɛpɛ Nyɩsʋa ‑nyi.
'A ‑nɛ nyiblo, ‑ɛ di 'crɩɛn ‑bʋ ‑hre, 'bʋ 'yee 'lɩ dɛ, ‑ɛ 'yɩ 'sii ‑nɩ, ‑a ni lɛnyaalɛ, 'a ꞊wlʋ 'nɩ 'bie 'lɩ ꞊hlɔn, kɔ, ɛ 'nɩ 'pʋʋ 'lɩ yrʋ, kɛɛ, bʋ 'crɩɩ nɛ ‑a mʋ ‑mɔ, bʋ lee nɛ ‑a mʋ.
‑A yɩ ‑nyi Nyɩsʋa 'wio, kɔ nyibli a pɛpɛ, ‑ʋ ‑hɛɛ nɛ ‑a mʋ, 'kɩ 'ʋ 'crɩɛn ‑bʋ a ‑kʋan a ‑ta'. Ʋ nʋ‑ kɔ ‑tɩ, Nyɩsʋa 'ɛ pɩ kɛ ‑a 'bliwin, ꞊a yrui 'a win' lɛ. 'A mʋ ‑hɛɛ nɛ ‑a mʋ, a ‑hʋ nɩ. ‑A 'yɩ 'lɩ 'aan ‑hihre ‑wɛ. Kɛɛ, Nyɩsʋa, nɔ‑ yi 'a mʋ.
'Bʋ mɔ, ꞊nɩ yɩ 'crɩɛn ‑bʋ nɩ ‑hre, ‑tɛblɩ gbi nɩ 'lɩ, ‑di 'ye. ‑Tɛblɩ a 'mʋ, nɔ‑ ‑a ‑hɩhɩɛ klɛ ‑mʋ:
[ ] 'Bʋ mɔ, ꞊nɩ yɛ ‑tɛblɩ nɩ 'hʋɛn ‑bʋ kɩ, ɛ ꞊hɛn 'nyrɛ, ‑ɛ mɔ, winbʋɩ a 'mʋ, ‑tɛblɩ a 'mʋ, ɛ ꞊glaa 'lɩ lɛ, ɛ 'yɩ 'lɩ 'crɩɩn 'kɩ a pɛpɛ 'kwli ‑nɩ.
( ) 'Bʋ mɔ, ꞊nɩ yɛ ‑tɛblɩ nɩ 'hʋɛn ‑bɩ ‑bʋ kɩ, ɛ ꞊hɛn 'nyrɛ, ‑ɛ mɔ, winbʋɩ a 'mʋ, ‑tɛblɩ a 'mʋ, ɛ ꞊glaa 'lɩ lɛ, dɛ ‑mʋ', ‑ɛ 'yɩ lɛyruulɛ ‑kɔ ‑tɛɛ, ɛ nɔ‑ ɛ yrue ‑mʋ' lɛ.
* 'Bʋ mɔ, ꞊nɩ yɛɛ 'ʋ dɛ ‑bɩ ‑bʋ winbʋ ‑bɩ 'hʋɩ bʋ, ‑ɛ ‑bɩ ‑hre 'a klɛ‑hɩhɩalɛ, 'kɩ 'lɩ 'crɩɛn ‑bʋ a 'kɩbɩa ‑mʋ' kɩ, ‑ɛ mɔ winbʋɩ a klɛ‑hɩhɩalɛ.
† ꞊Nɩ yɛ dɛ ‑bɩ ‑bʋ kɩ, ɛ ꞊hɛn 'nyrɛ, ‑hre ‑tɩ ‑mʋ', ‑ɛ nɩ 'ʋ 'crɩɛnhlʋ a ‑wlu bʋ.