\id 1TH NT0013 Maskelynes (KLV) -- David Healey \h 1 Tessalonika \toc1 Nalob̃ulat napisulan na-vǝha-sual-an aPol totosi van hǝn alat a Tessalonika \toc2 1 Tessalonika \toc3 1Tes \mt1 1 Tessalonika \mt3 Nalob̃ulat napisulan na-vǝha-sual-an aPol totosi van hǝn alat a Tessalonika \imi Ase itos nalob̃ulat napisulan egai? \ipq APol itosi. \imi Itos nalob̃ulat napisulan egai hǝn nǝsa? \ipq Itosi hǝn b̃ikel mai alat siYesu len naut a Tessalonika naṽide hǝn lǝb̃igol aGot b̃ehǝhaṽur. \imi Itos nalob̃ulat egai m̃os ase? \ipq Nalob̃ulat egai evi napisulan aPol totosi van hǝn alat siYesu len naut a Tessalonika. \imi APol itos nalob̃ulat egai ŋais mai len naut a be? \ipq APol itosi pǝpadaŋ hǝn nasihau A.D. 51 nǝboŋ totoh len naut a Korint. \io2 1) Na-ke-ivoi-an (1.1) \io2 2) Nasipaan vi tǝban aGot hǝn gamit mǝttodǝlom na-kel-uri-an tovoi. Nohǝhaṽur husur mǝtukad nadǝlomian enan sal (1.2–3.13) \io2 3) Nǝmauran togol aGot tohǝhaṽur (4.1–12) \io2 4) Nagǝmaian siNasub̃ (4.13–5.11) \io2 5) Nakelean namǝkot (5.12–24) \io2 6) Nǝ-maris-kotovi-an (5.25–28) \c 1 \s Na-ke-ivoi-an \p \v 1 Ginau aPol mai aSilas\f + \fr 1.1 \ft Len nasoruan ta Kris ike Silvanus, sake Silas, be evi naulum̃an sua ŋai.\ft*\f* mai aTimoti, namtutos nalob̃ulat napisulan egai. Namtutosi van hǝn alat a Tessalonika, lotovi siGot mai siNasub̃, aYesu Kristo. AGot teviol kǝmas hǝn navoian mai gamito, tigol nǝlomit tikad natǝm̃at tabtab.\f + \fr 1.1 \fq Silas: \ft Uman 15.22; \fq Timoti: \ft Uman 16.1; \fq Alat a Tessalonika: \ft Uman 17.1\ft*\f* \s Nasipaan tovi tǝban aGot hǝn alat lotodǝlom na-kel-uri-an tovoi \p \v 2 Nǝboŋ p̃isi namttosor husur gamito len na-sor-tuṽ-an sinamito, namtosipa vi tǝban aGot tabtab. \v 3 Nǝboŋ namttosor tuṽ len nǝhon aGot aTǝmadato, namtunau tǝlmam hǝn nauman samito hǝn nadǝlomian, nauman samito hǝn na-lǝmas-buni-an mai nǝ-daŋ-b̃uri-an mǝttokade bathut nǝ-vatvat-viri-an len aMasta sidato, aYesu Kristo.\x + \xo 1.3 \xt 1Kor 13.13\xt*\x* \v 4 Bathudud nadǝlomian aGot tolǝmas bun gamit p̃isi, namtolǝboii ke ilekis hǝn gamito hǝn mǝtb̃evi esan. \v 5 Namtolǝboii, husur na-kel-uri-an sinamito husur aYesu sagǝm hǝn gamito len nasoran ŋai, be egǝm len nǝdaŋan, egǝm len aNunun aGot, egǝm len na-lǝboi-sǝhoti-an hǝn nakitinan. Mǝtolǝboi nab̃oruan namttokade nǝboŋ namttotoh mai gamito. Namtutoh maienan hǝn namtb̃evi tarhǝt samito. \v 6 Ale mǝtosǝsǝloŋ sǝhot nasoruan len nakemkeman togǝm len aNunun aGot, naut kǝmas na-lǝŋon-isa-masuṽ-an mǝttokade. Len naṽide tomaienan, mǝtugol tǝtoṽ hǝn ginamito mai mǝtugol tǝtoṽ hǝn Nasub̃.\x + \xo 1.6 \xt Uman 17.5–9\xt*\x* \v 7 Husur natenan, galit p̃isi lotokad nadǝlomian len navile p̃isi len naprovens Masetonia mai a Akaia, lolǝboi lǝb̃eris gamito, gol tǝtoṽ hǝn gamito.\f + \fr 1.7 \fq Masetonia: \ft 2Kor 1.16; \fq Akaia: \ft 2Kor 1.1\ft*\f* \v 8 Husur nasoruan siNasub̃ evivile dan gamito, ikai van hǝn naut p̃isi a Masetonia mai a Akaia, ale na-kel-uri-an husur nadǝlomian samit vi tǝban aGot, ibar naut p̃isi, gol ke sǝkad natideh am hǝn namtb̃ikel husuri. \v 9 Alat galenan lukel husur nahǝhaṽuran mǝttokade nǝboŋ namttotoh mai gamito, lukel uri ke mǝttopair dan nǝlablab gail van hǝn aGot nǝkadun nǝmauran, van hǝn aGot kitin hǝn mǝtb̃evi esan hum naslev. \v 10 Lukele am ke mǝttotoh vir natǝlmaman siYesu, aNatun aGot, aGot togol tole mǝhat dan nǝmatan. Evi aYesu egaii b̃ilav kuv gidato dan nab̃iltilol paŋpaŋ siGot b̃egǝmai. \c 2 \s Nauman siPol len naut a Tessalonika \p \v 1 Husur, bathudud nadǝlomian, gamit gabag, mǝtolǝboii ke, natohan sinamit mai gamito, savi natohan kǝmas ŋai. Ao, ikad naṽite. \v 2 Mǝtolǝboii ke a m̃o, len naut a Filippi, lomǝdas masuṽ hǝn ginamito gol namtolǝŋon isa vǝsa, be aGot eviol hǝn na-il-b̃uri-an mai ginamito hǝn namtb̃ikel na-kel-uri-an san tovoi mai gamito a Tessalonika, naut kǝmas alat lotosob̃ur lotomǝtahun ginamit len naut samito.\x + \xo 2.2 \xt Uman 16.19–24, 17.1–9\xt*\x* \v 3 Husur na-kel-uri-an sinamito sagǝm len nǝsaban. Len nǝlonamit tomasil namtogǝm hǝn namtb̃evi tarhǝt samito, nagǝgǝrasan eb̃uer. \v 4 Be nǝboŋ namttosor, namtusor hum ahai pispisul gail siGot, gai tosab̃i ke namttonor hǝn namtb̃ikel na-kel-uri-an tovoi, ale eriŋi len navǝlanamito. Imagenan namtusor, savi hǝn nǝvanuan gail lǝb̃ehǝhaṽur, be hǝn aGot, tokǝta bunus lǝboi nǝlonamito, b̃ehǝhaṽur. \v 5 Mǝtolǝboii ke namtsasor hehe hǝn gamito, ale aGot elǝboi b̃ikel koti ke namtsǝkad nalǝŋonian tǝmǝhav ideh namttosusuani o gǝras gamit hǝni. \v 6 Namtsalǝŋon nǝ-sal-suhi-an sinǝvanuan, namtsalǝŋoni len gamito o avan ideh am. \p \v 7 Husur ke namttovi hai pispisul gail seKristo, len nǝhes namttoṽati, inor hǝn mǝttaum tǝdaŋ hǝn mǝttakǝtkǝta tǝban ginamit tavoi. Be nǝboŋ namttotoh ei, namtogǝm sum̃an namttovi ut kǝmas ŋai len gamito. Ginamito, namtolǝmas bun gamito hum anana sua tovǝhasus, tokǝtkǝta tǝban anatun gail len na-lǝmas-buni-an. \v 8 Namtolǝmas masuṽ hǝn gamito gol ke namttokatǝp̃ol hǝn na-kel-uri-an tovoi siGot mai gamito, savi enan ŋai, be namtoviol hǝn ginamit gabag am mai gamito. \v 9 Bathudud nadǝlomian, nau tǝlmam hǝn nauman todaŋ sinamito, tohaihai masuṽ. Len nalennǝyal mai nalenmariug namtoum habat m̃os nǝvat, hǝn asike natohan sinamit b̃emǝlas len gamito, nǝboŋ namttokel ur na-kel-uri-an tovoi siGot mai gamito. \p \v 10 Gamit, mǝttokad nadǝlomian, mǝtolǝboi mǝtb̃ikel koti ke, naṽide sinamit van hǝn gamito ikad nab̃oruan siGot lan, naṽide sinamit inor, nǝsaan eb̃uer lan. AGot am elǝboi b̃ikel koti maienan. \v 11 Mǝtolǝboi nategai ke, naṽide namttokade mai gamito esum̃an naṽide atata ideh tokade mai anatun gail. \v 12 Sum̃an atata, akis namtusor hǝn namtb̃eb̃ur nǝlomito, hǝn namtb̃igol mǝtb̃elǝŋon b̃ivoi am len nǝlomito, ale len nǝmauran samito, namtudaŋ hǝn mǝtb̃itoh b̃inor len nap̃isal aGot b̃ehǝhaṽur hǝni. Husur evi aGot tokis gamito hǝn mǝtb̃evi esan len natohan pipihabǝlan len nǝyalyalan san. \p \v 13 Bathut nategai am, namtosipa vi tǝban aGot tabtab. Husur nǝboŋ namttokel ur nasoruan siGot, mǝtosǝsǝloŋ sǝhoti, savi hum nasoruan sinǝvanuan ŋai, be hum tovi nasoruan siGot. Evi nasoruan kitin siGot, ŋa len nasoruan enan san, aGot eum len gamit mǝttoriŋ nǝlomit lan. \v 14 Bathudud nadǝlomian, bathut nadǝlomian samito, mǝtogǝm p̃itoṽ hǝn alat siYesu Kristo len naut a Jutea. Alat len naut samito lomǝdas bun gamito hǝn mǝtb̃elǝŋon isa vǝsa p̃itoṽ hǝn naJu galevis a Jutea lotomǝdas bun alat siYesu ei.\x + \xo 2.14 \xt Uman 17.5–6\xt*\x* \v 15 Evi galit lotogol ahai kelkel ur gail ta sutuai lotomat, ale lugol Nasub̃, aYesu am tomat. Lomǝdas masuṽ hǝn ginamito van lohut ginamito. Lugol aGot sahǝhaṽur, ale lukad nǝsasaan van hǝn nǝvanuan p̃isi\x + \xo 2.15 \xt Uman 9.23, 29, 13.45, 50, 14.2, 5, 19, 17.5, 13, 18.12\xt*\x* \v 16 husur lotohisi hǝn lǝb̃ip̃on gol ginamito hǝn asike namtb̃isor mai alat lǝsavi Ju. Lugol imaienan hǝn alat lǝsavi Ju asike lǝb̃ikad nǝ-lav-kuvi-an dan nǝsaan salito. Len naṽide tomaienan, lusah tuan nǝsaan salit gail tabtab vapul sǝsǝhov. Be gagai nǝlol paŋpaŋ siGot epǝŋas kavkav hǝn galito. \s APol ike teris alat siYesu a Tessalonika tǝtas am \p \v 17 Be ginamit, bathudud nadǝlomian, nǝboŋ nǝvanuan gail lotopǝpehun ginamito dan gamito, lugol ehum namtogǝm vi milesw, be sabǝlav. Namtoriŋ gamito, avil nǝlonamit sariŋ gamito. Len na-lǝŋon-masuṽ-hǝni-an sinamit, namtohisi, hisi, hǝn namtb̃eris gamito tǝtas am. \v 18 Husur namtolǝŋon ke namtb̃etǝlmam van hǝn gamito, ale ginau, aPol, nohisi van ale nohis tǝtas hǝni am, be aSetan ip̃on gol ginamito. \v 19 Namtuke namteris gamito husur ke namttovatvat viri ke mǝteil gǝgat len aKristo. Namtukemkem hǝn gamito, mǝtosum̃an nǝprais namttokade, namttoṽiv hǝni len nǝhon aMasta sidato, aYesu, nǝboŋ b̃egǝmai. \v 20 Kitin, mǝtugol namtoṽiv hǝn gamito, namtohǝhaṽur masuṽ hǝn gamito. \c 3 \p \v 1 Nǝboŋ namtsatoh mai gamito, namtolǝŋon isa van van namtsalǝboi namtb̃idaŋ b̃uri am. Imaienan namtunau ke ivoi am hǝn ginau mai aSilas namrb̃itoh sǝb̃onamǝru len nab̃iltivile Atens.\x + \xo 3.1 \xt Uman 17.15–16\xt*\x* \v 2 Ale namrosǝvat aTimoti van hǝn gamito. ATimoti, awawa sinamǝru len nadǝlomian, eum siGot mai ginamǝru nǝboŋ namttokel ur na-kel-uri-an tovoi seKristo. Namrosǝvati hǝn b̃igol gamit mǝtb̃idaŋ am, ale hǝn b̃igol mǝtb̃elǝŋon b̃ivoi am len nǝlomito m̃os nadǝlomian samito, \v 3 hǝn na-lǝŋon-isa-vǝsa-an mǝttokade asike b̃igol gamit ideh b̃ipair dan nadǝlomian san. Husur gamit gabag, mǝtolǝboii ke aGot itabtabuh len gidato hǝn datb̃ikad na-lǝŋon-isa-vǝsa-an. \v 4 Husur, nǝboŋ namttotoh mai gamito, namtukel nalǝlǝgauan daŋir mai gamito ke nǝvanuan gail dereh lemǝdas bun gidato. Ale evisi maienan sum̃an mǝttolǝboii. \v 5 Imaienan, nǝboŋ nǝsalǝboi nǝb̃idaŋ b̃uri am, nosǝvat aTimoti hǝn b̃eus kitev nadǝlomian samito hǝn b̃elǝboii. Nunau masuṽ hǝni ke natǝmat tǝsab̃ nap̃isal ideh hǝn asike mǝttǝkad nadǝlomian len aKristo am, ale nauman namttogole hǝn mǝtb̃ikad nadǝlomian, tagǝm vi ut kǝmas. \p \v 6 Be aTimoti ivan, eris gamito, imadhatǝlmam, ale ikel mai ginamǝru na-kel-uri-an tovoi husur nadǝlomian mai na-lǝmas-buni-an samito. Ikele ke mǝtunau tǝlmam hǝn ginamito len nahǝhaṽuran, ale mǝtolǝŋon bun mǝtb̃eris ginamito sum̃an namttolǝŋon bun namtb̃eris gamito.\x + \xo 3.6 \xt Uman 18.5\xt*\x* \v 7 Imaienan, bathudud nadǝlomian, namtolǝŋon ivoi am len nǝlonamito husur gamito. Naut kǝmas nǝvanuan gail lomǝdas ginamit gol namtolǝŋon isa vǝsa, namtolǝŋon ivoi am len nǝlonamito husur nadǝlomian samito. \v 8 Gagai namtohǝhaṽur hǝn nǝmauran sinamit husur mǝtoil gǝgat len Nasub̃. \v 9 Namtuke namtesipa masuṽ vi tǝban aGot tinor hǝn nǝsa togole m̃os gamito, be nasipaan sinamit em̃idol. Namtosipa hǝn nakemkeman namttokade len nǝhon aGot husur gamito. \v 10 Len nalennǝyal mai nalenmariug namtusor tuṽ habat. Namtous aGot hǝn namtb̃eris gamit tǝtas, hǝn namtb̃igol kavkav hǝn nǝsa tom̃idol len nadǝlomian samito. \p \v 11 Ale aGot sidato tovi aTǝmadato, mai aYesu, aMasta sidato, tep̃ul p̃isal hǝn namtb̃egǝm hǝn gamito. \v 12 Nasub̃ tigol na-lǝmas-buni-an samito m̃os gamit gabag mai nǝvanuan p̃isi tepul sǝsǝhov, sum̃an na-lǝmas-buni-an sinamit m̃os gamito topul sǝsǝhov. \v 13 Nasub̃ tigole hǝn nǝlomit b̃idaŋ am lan, hǝn asike mǝtb̃ikad nǝsaan ideh len gamito, be mǝtb̃inor kavkav len nǝhon aGot, aTǝmadato, nǝboŋ aMasta sidato, aYesu b̃egǝmai mai alat lotovi esan. Ganan. \c 4 \s Nǝmauran togol aGot tohǝhaṽur \p \v 1 Namtukad nahudhusoruan hǝn namtb̃ikele sal. Bathudud nadǝlomian, namtukel uri tia naṽide mǝtb̃ikade m̃au hǝn aGot b̃ehǝhaṽur hǝn nǝmauran samito. Ale nǝmauran samito gagai ikad naṽide galenan. Be len nahǝsan Nasub̃, aYesu, namtous gamito, namtoŋir gamit ke, mitimagenan habat am. \v 2 Husur mǝtolǝboi nakelean namttolav gail mai gamito len nahǝsan Nasub̃, aYesu. \v 3 Husur aGot elǝŋon ke mitikad nab̃oruan san. Elǝŋon ke asike mǝtugol naitian tosa ideh. \v 4 Elǝŋon ke mitiwol hǝn nibemit tinor hǝn nab̃oruan san, hǝn nǝvanuan gail lǝb̃eputsan gamito len nǝnauan salito. \v 5 Salǝŋon ke nalǝŋonian hǝn naitian tiwol hǝn nibemito hum alat lǝsalǝboi aGot. \v 6 Len natenan, samtemǝdas nǝbathudud nadǝlomian ideh, husur Nasub̃ dereh tipansem nǝvanuan gail sil nǝsaan galenan, hum namttokele, hum namttokel nalǝlǝgauan mai gamit a m̃o tia. \v 7 AGot elǝŋon ke timagenan husur gai sakis gidat hǝn nibedat b̃iwol hǝn gidato taṽtaṽor, be ekis gidat hǝn datb̃ikad nab̃oruan san. \v 8 Avan ideh b̃emǝtahun nap̃usanan enan, gai samǝtahun nap̃usanan sinǝvanuan ŋai, be siGot toviol hǝn aNunun mai gamito. \p \v 9 Sanor hǝn nǝb̃itos natideh husur na-lǝmas-buni-an mǝttokade hum nǝbathudud nadǝlomian, bathut aGot eṽusan gamit hǝn mǝttolǝmas bun gamit gabag.\x + \xo 4.9 \xt Jon 13.34\xt*\x* \v 10 Evoi, mǝtolǝmas bun nǝbathudud nadǝlomian p̃isi len naut a Masetonia kavkav. Naut kǝmas mǝttomaienan, namtudaŋ ke mǝtelǝmlǝmas masuṽ hǝn galito van am. \v 11 Mǝtehisi hǝn mǝtb̃itoh mǝdau, mitigol nǝsa topat len navǝlamit sǝb̃omito, ale um m̃os natohan samito hǝn navǝlamit sǝb̃omito, hum namttokele hǝn gamit tia. \v 12 Mitigol timagenan hǝn nǝmauran samit b̃igol alat lǝsǝkad nadǝlomian lǝb̃eputsan gamito len nǝnauan salito, ale gole hǝn asike mǝtb̃ipar titideh.\f + \fr 4.12 \ft Len naut egai nasoruan ta Kris elǝboi b̃ikad namilen ideh am ke: Mitigol timagenan hǝn nǝmauran samit b̃igol alat lǝsǝkad nadǝlomian lǝb̃eputsan gamito len nǝnauan salito, ale gole hǝn asike b̃ipat len avan ideh am hǝn b̃ekǝtkǝta tǝban gamito.\ft*\f* \s Nagǝmaian siNasub̃ \p \v 13 Bathudud nadǝlomian, nuke nisor husur natsua hǝn mǝtb̃elǝboii. Namtuke mǝtelǝboi nakitinan husur alat lotopatmari len nǝmatan, hǝn asike mǝtb̃epul hǝn nalolosaan, sum̃an alat lǝsǝkad nǝ-vatvat-viri-an ideh. \v 14 Husur datolǝboii ke aYesu tomat, tole mǝhat tǝtas; imagenan, datolǝboii ke, alat lotokad nadǝlomian len aYesu nǝboŋ lotopatmari len nǝmatan, dereh lile mǝhat. Nǝboŋ aYesu b̃egǝmai, dereh aGot tilav tǝlmam hǝn galito mai aYesu, van hǝni. \p \v 15 Namtukel nasoruan egai siNasub̃ mai gamito: gidato, dattomaur sal nǝboŋ aYesu b̃etǝlmam, asike datovi mǝhat a m̃o len alat lotopatmari len nǝmatan. \v 16 Husur Nasub̃, gai dereh tevi pan dan nǝmav. Dereh tikad na-kel-buni-an sua san towal habat, nadolon ab̃iltiŋel mai nǝwalan hǝn nǝtrampet siGot. Ale alat lotokad nadǝlomian len aKristo nǝboŋ lotomat, dereh lile mǝhat a m̃o. \v 17 Beti gidat, dattomaur sal, dattotoh, vǝha-sua ŋai aGot tisab̃ul gidato vi mǝhat mai galito, vi lan nǝmarigw, hǝn datb̃ib̃onb̃on mai Nasub̃ len namǝsav. Ŋa datitah tabtab mai Nasub̃ vi sutuai.\f + \fr 4.17 \ft Hǝn naves 15–17, ris 1Kor 15.51–52\ft*\f* \v 18 Imagenan beti, len nasoruan enan, mitigol gamit gabag mǝtelǝŋon tivoi am len nǝlomito. \c 5 \p \v 1 Bathudud nadǝlomian, sanor hǝn nǝb̃itos natideh husur nǝboŋ o namityal hǝn natgalenan lǝb̃evisi. \v 2 Husur mǝtolǝboi buni tia ke, nǝboŋ siNasub̃ dereh tegǝm hum nǝvanuan vǝnvǝnah togǝm len mariug.\x + \xo 5.2 \xt Mat 24.43; Luk 12.39; 2Pit 3.10\xt*\x* \v 3 Nǝboŋ nǝvanuan gail lǝb̃ike, “Datukad natǝm̃at, natit p̃isi ivoi, sǝkad natideh b̃emǝdas gidato,” vǝha-sua ŋai na-mǝdas-masuṽ-hǝni-an dereh tibar galito sum̃an napǝŋasan hǝn nǝpasusan togǝm hǝn napǝhaṽut totian. Ale asike, asike lugam yav dani.\x + \xo 5.3 \xt Jer 6.14, 8.11\xt*\x* \v 4 Be bathudud nadǝlomian, mǝtsatoh len nǝmargobut, gol ke Nǝboŋ siNasub̃ asike igol mǝtosǝhoṽut hum nǝvanuan vǝnvǝnah togǝm len mariug. \v 5 Husur gamit p̃isi mǝtovi anatun nam̃ial gail, anatun nalennǝyal gail. Datsavi sinalenmariug, datsavi sinǝmargobut. \v 6 Imaienan, datelǝlǝgau, sadatipatmari sum̃an alat lototǝtan hǝn Nǝboŋ enan b̃evisi. Be datehulahul, datetǝgau gat gidat sǝb̃odato. \v 7 Husur alat lotopatmari, lupatmari len mariug, mai alat lototǝrog, lotǝrog len mariug. \v 8 Avil gidato, datovi sinalennǝyal, gol ke datetǝgau gat gidat sǝb̃odato. Datimaskǝtkǝta gol nǝlodato len nadǝlomian mai na-lǝmas-buni-an, sum̃an nasoltia tokol nametǝlai len nǝmabun hǝn b̃ipat gol naṽiyesyes. Datimaskǝtkǝta gol nǝnauan sidato len nǝ-vatvat-viri-an hǝn nǝ-lav-kuvi-an dan nǝsaan, sum̃an nasoltia toriŋ nabǝhad nametǝlai hǝn b̃ipat gol nǝkadun.\x + \xo 5.8 \xt Isa 59.17\xt*\x* \v 9 Husur aGot sǝtabtabuh len gidato hǝn datb̃ipanis len nab̃iltilol paŋpaŋ san. Ao, itabtabuh len gidato hǝn datb̃ikad nǝ-lav-kuvi-an dan nǝsaan sidato len aMasta sidato, aYesu Kristo. \v 10 AYesu imat m̃os gidato hǝn datb̃itoh b̃onb̃on maii vi sutuai, naut kǝmas datb̃ipatmari len nǝmatan o datb̃ilele sal len nǝmauran nǝboŋ b̃etǝlmam. \v 11 Imaienan, mitigol mǝtelǝŋon tivoi am len nǝlomit gabag, mitigol gamit gabag mitidaŋ am, hum mǝttogolgole gagai. \s Nakelean namǝkot \p \v 12 Bathudud nadǝlomian, namtuke namtisor husur alat lotoum todaŋ tǝban gamito, lotoil a m̃o hǝn gamito len naṽide siNasub̃, lotokel nalǝlǝgauan hǝn gamito hǝn asike mǝtb̃isa. Namtous gamit hǝn mǝtb̃eputsan galit len nǝnauan samito. \v 13 Husur nauman salito, len na-lǝmas-buni-an samito, mǝteputsan galito len nǝnauan samito. Mititoh mǝdau, samtib̃al mai gamit gabag. \v 14 Namtoŋir gamit ke mitikel nalǝlǝgauan mai nǝvanuan petǝmas gail hǝn lǝb̃eum; alat lǝsǝkad na-il-b̃uri-an, mǝtesusupah mai galit hǝn lǝb̃idaŋ am; mǝtevi tarhǝt silat lǝsǝdaŋ; len nǝ-daŋ-b̃uri-an mititoh mǝdau mai nǝvanuan p̃isi. \v 15 Samtigol tisa tǝlmam hǝn avan ideh togol tosa hǝn gamito. Be akis hisi hǝn mǝtb̃ivoi hǝn gamit gabag mai nǝvanuan gail p̃isi am. \p \v 16 Akis mǝtepul hǝn nakemkeman. \v 17 Mitisor tuṽ tabtab, nanoŋan teb̃uer. \v 18 Naut kǝmas natideh tovisi, sipa vi tǝban aGot hǝni, husur enan evi nalǝŋonian siGot m̃os gamito bathut mǝttovi seKristo, aYesu. \p \v 19 Samtip̃on gol aNunun aGot hum mǝttokabut gol nǝhab hǝn b̃imat.\f + \fr 5.19 \ft Namilen ke samtigol ke aNunun aGot salǝboi b̃eum am, be mitidam̃ hǝn b̃eum husur nalǝŋonian siGot.\ft*\f* \v 20 Samtemǝtahun nakelean hǝn napisulan siGot hum lǝsavi natideh. \v 21 Be mǝtebunus kitev natit p̃isi ke imabe. Mǝtetǝgau gat lotovoi. \v 22 Be bulatut dan natideh tosa. \p \v 23 AGot, toviol hǝn natǝm̃at mai gamito, tigol mǝtegǝm vi esan kavkav. AGot tigol nanunumito, nǝlomito mai nibemito kavkav, linor len nǝhon, nǝsaan teb̃uer, van vǝbar nagǝmaian siMasta sidato, aYesu Kristo. \v 24 AGot tokis gamito, mǝtolǝboi mǝtb̃eriŋ nǝlomit lan ke dereh tigol natgalenan. \p \v 25 Bathudud nadǝlomian, sor tuṽ m̃os ginamito. \v 26 Len naveveuan, mǝtesum̃ nǝtarhon nǝbathudud nadǝlomian p̃isi hǝn mǝtb̃ikel na-ke-ivoi-an sagw mai galito. \v 27 Len nahǝsan Nasub̃, nukele hǝn gamito ke, mǝteṽuruŋ nalob̃ulat napisulan egai van hǝn galit p̃isi len nǝbathudud nadǝlomian. \v 28 AMasta sidato, aYesu Kristo teviol kǝmas hǝn navoian mai gamito.